ބައިނަލްއަގުވާމީ ކުޑަކުދިންގެ ދުވަސް ފާހަގަ ކުރުމުގެ ހަރަކާތްތައް ނ. ކެނދިކުޅުދޫގައި ކުރިއަށް ގެންގޮސްފި

ބައިނަލްއަގުވާމީ ކުޑަކުދިންގެ ދުވަސް ފާހަގަ ކުރުމުގެ ހަރަކާތްތައް ނ. ކެނދިކުޅުދޫގައި ކުރިއަށް ގެންގޮސްފިއެވެ.

މި ހަރަކާތް ކުރިއަށް ގެންގޮސްފައިވަނީ ދިވެހި ފުލުހުންގެ ޚިދުމަތާއި، މިނިސްޓްރީ އޮފް އެޑިއުކޭޝަނާއި، އަދި ޔުނިސެފް މޯލްޑިވްސް ގުޅިގެންނެވެ. މިއީ ކޮންމެ އަހަރަކު ކޮންމެވެސް އެއް ރަށެއްގައި ކުރިއަށް ގެންދާ ހަރަކާތެކެވެ.

ކެނދިކުޅުދޫ ކައުންސިލާއި ނ. އަތޮޅު ކައުންސިލު އަދި އެ އަތޮޅުގައި ހުރި ސަރުކާރުގެ މުއައްސަސާތަކާއި އަމިއްލަ ބައެއް ފަރާތްތަކުގެ ބައިވެރިވުމާއެކު މި މަހު 18 ވަނަ ދުވަހުން ފެށިގެން ކުރިއަށްގެންދާ އެ ހަރަކާތްތަކުގައި އެންމެ ފުރަތަމަ ހަރަކާތެއްގެ ގޮތުގައި ކުރިއަށް ގެންދިޔައީ ބިލްބޯޑު އިފްތިތާހުކުރުމެވެ. ބިލްބޯޑް އިފްތިތާހު ކޮށްދީފައިވަނީ ރަށުގެ ކުޑަކުދިންނެވެ. އެ ކުދިންނާއެކު ރޯބޯމޭންގެ ހަރަކާތްތަކެއް ކުރިއަށްގެންގޮސްފައިވެއެވެ.

އޭގެ އިތުރުން ރަށުގެ ކުޑަކުދިންގެ ކުރެހުންތައް ދައްކާލުމަށް ކުޑަކުދިންގެ ކުރެހުމުގެ މައުރަޒެއް ކުރިއަށް ގެންގޮސްފައިވެއެވެ. ކެނދިކުޅުދޫ ސްކޫލްގައި ކުރިއަށްގެންދިޔަ ކުރެހުމުގެ މައުރަޒު ހުޅުވައިދެއްވީ އެޑިއުކޭޝަން މިނިސްޓަރ ޑރ. އައިޝަތު އަލީއެވެ. މައުރަޒުގައި މި އަހަރުގެ ކުޑަކުދިންގެ ދުވަހުގެ ޝިއާރާ ގުޅޭގޮތުން ދަރިވަރުން ކުރަހާފައިވާ ގިނަ އަދަދެއްގެ ކުރެހުންތައް ދައްކާލާފައިވެއެވެ.

އަދިވެސް މީގެ އިތުރުން، ކުޑަކުދިންގެ ކަލަރ ރަން އެއް ހޮނިހިރު ދުވަހުގެ ހަވީރު ކުރިއަށް ގެންގޮސްފައިވެއެވެ. ކުޑަކުދިންނަށް ހާއްސަ ޒުންބާގެ ހަރަކާތްތަކާއި ރޯބޯމޭންގެ ހަރަކާތްތަކާއެކު ކުރިއަށް ގެންދިޔަ ކަލަރަ ރަންގައި ގިނަ އަދަދެއްގެ ކުޑަކުދިން ބައިވެރިވިއެވެ. ކަލަރ ރަންގައި އެޑިއުކެޝަން މިނިސްޓަރ ޑރ. އާއިޝަތު އަލީ އާއި ފުލުހުންގެ ބައެއް އިސް އޮފިސަރުންނާއި ފުލުހުން ބައިވެރިވިއެވެ.