ކިޔުން ތެރިކަން އަށަގަންނުވަންޖެހޭ: އަޝްރަފު
9 ޖުލައި 2017 | އާދީއްތަ 06:55އަޝްރަފް ވިދާޅުވީ މިހާރުވެސް ތަފާތު ބާވަތްތަކުގެ ފޮތްތައް ލިބެން ހުންނާނެ ކަމަށް
ދިވެހިބަހުގެ އެކަޑަމީގެ ރައީސް އަޝްރަފް އަލީ
ދިވެހިންގެ ކިބައިގައި ކިޔުންތެރިކަން އަށަގަންނުވައި ދަރިވަރުންގެ މެދުގައި ކިޔުންތެރިކަމަށް ލޯބި ޖެއްސުމަށް ދިވެހިބަހުގެ އެކަޑަމީގެ ރައީސް އަޝްރަފް އަލީ ގޮވާލައްވައިފި އެވެ.
ލިޔުންތެރިންގެ ފޮތް މައުރަޒު ހުޅުވުމުގެ ރަސްމިއްޔާތުގައި ވާހަކަ ދައްކަވަމުން އަޝްރަފް ވިދާޅުވީ ރާއްޖޭގެ ލިޔުންތެރިންނާއި އަދީބުންނާއި ޝާއިރުންގެ ގިނަ ފޮތްތައް ހުރިއިރު، އެ ފޮތްތަކުގެ ބޭނުންކޮށް މައުލޫމާތުގެ މުއްސަދިކަން އިތުރު ކުރުމަކީ މިފަދަ ތަހުޒީބު ވެފައިވާ މުޖުތަމައުއަށް ވަރަށް ބޮޑަށް ބޭނުންތެރިކަމެއް ކަމަށެވެ.
އަޝްރަފް ވިދާޅުވީ ބޭރުގެ ލިޔުންތެރިން އެކަމަށް ހުސްވެގެން ލިޔުންތެރިކަމުން ދިރިއުޅުމުގެ ކަންކަން ކުރިކަމުގައި ވިޔަސް ރާއްޖޭގައި އެކަން އެގޮތަށް ކުރިއަށް ނުދާ ކަމަށެވެ. ލިޔުންތެރިންގެ ގިނަ ފޮތްތަކެއް ބާޒާރަށް ނެރުނަސް އެކަމުން އެކަށީގެންވާ އާމްދަނީއެއް ލިބޭނީ އަދި މައުލޫމާތުގެ ހަޒާނާ މުއްސަނދި ކުރެވޭނީ އެކަމަށް ރައްޔިތުންގެ ވެސް އެއްބާރުލުން ލިބިގެން ކަމަށް އޭނާ ވިދާޅުވި އެވެ.
އަޝްރަފް ވިދާޅުވީ އެކި ދާއިރާތަކުންނާއި އެކިއެކި ބާވަތްތަކުގެ ފޮތްތައް ބުކްޝޮޕްތަކުން ލިބެން ހުންނައިރު، ފޮތް ނުލިބޭ ވާހަކަ ދެއްކެވުމުގެ ބަދަލުގައި ބޭނުންވާ ފޮތް ލިބޭތޯ ބެއްލެވުން މުހިއްމު ކަމަށެވެ. ބޭނުންވާ ފޮތް ބުކްޝޮޕްތަކުންނާއި މިފަދަ ފޮތް މައުރަޒުތަކުން ގިނަ އަދަދަކަށް ލިބެންހުންނާނެ ކަމަށްވެސް އޭނާ ވިދާޅުވި އެވެ.
އަޝްރަފް ވިދާޅުވީ ފޮތް ކިޔުމުގެ ސަގާފަތަށް ލޯބި ޖެއްސުމަށްޓަކައި މިފަދަ ފޮތް މައުރަޒުތަކަށް ބެލެނެވެރިންނާއި ދަރިވަރުން ވަޑައިގެންނެވުމަކީ ވަރަށް މުހިއްމު ކަމެއް ކަމަށް ގަބޫލު ކުރައްވާ ކަމަށެވެ.
ލިޔުން ތެރިންގެ ދުވަހަކީ ޖުލައި 8 އެކެވެ. ލިޔުންތެރިންގެ ދުވަހާއި ފޮތް މައުރަޒުތައް 1993 ވަނަ އަހަރުން ފެށިގެން ރާއްޖޭގައި ދަނީ ބާއްވަމުންނެވެ. ކުރިން ދިވެހިބަހާއި ތާރީހަށް ހިދްމަތްކުރާ ގައުމީ މަރުކަޒުގެ ބަދަލުގައި މިހާރުން ހުންނަނަކީ ދިވެހި ބަހުގެ އެކަޑެމީ އެވެ.
