ކްރިކް ރިޒާގެ ފަރާތުން ސުޕްރީމް ކޯޓަށް އިސްތިއުނާފީ ނުކުތާތައް ހުށަހަޅައިފި
ބެންޗުގެ ރިޔާސަތު ބަލަހައްޓަވަނީ ފަނޑިޔާރު ހުސްނުއްސުއޫދު
ފުއްގިރި ހިޔާނާތުގެ މައްސަލައިގައި ސުޕްރީމް ކޯޓުގައި ކުރިއަށްދާ އިސްތިއުނާފު
ރ ފުއްގިރި ޚިޔާނާތުގެ މައްސަލައިގައި ދައުވާ އުފުލާފައިވާ މއ. ކުރިކީލަހިޔާ އަޙުމަދު ކްރިކް ރިޒާގެ ފަރާތުން ސުޕްރީމް ކޯޓުގައި އިސްތިއުނާފު ކޮށްފައިވާ މައްސަލައިގެ އަޑުއެހުމެއް ހޯމަ ދުވަހު ކުރިއަށް ގެންގޮސްފިއެވެ.
އޭނާގެ ފަރާތުން އިސްތިއުނާފު ހުށައަޅާފައިވަނީ މައިގަނޑު 4 ކަމެއްގެ މައްޗަށެވެ.
އޭގެ ތެރޭގައި ދައުވާ ހުށައެޅުމުގައި އުނިކަމެއްވާކަމަށް ބަޔާންކޮށް ހުށައެޅި 2 ހުށައެޅުމަކާއި، ހެއްކާ ގުޅޭ 2 ހުށައެޅުމަކާއި ގުޅިގެން ދަށު ކޯޓުން ނިންމި ނިންމުމަށް ހައިކޯޓުންވެސް ތާއީދުކޮށްފައިވާތީ އިސްތިއުނާފު ކުރި ނުކުތާތަކެއް ހިމެނެއެވެ.
ކްރިކް ރިޒާގެ ފަރާތުން ވަނީ ޝަރީއަތުގެ ކުރީގެ ހުށައެޅުމާއި ގުޅޭގޮތުން ކްރިމިނަލް ކޯޓުން ނިންމާފައިވާ ނިންމުމާއި، އެ ނިންމުމަށް ތާއީދުކޮށް ހައިކޯޓުން ނިންމާފައިވާ ނިންމުން ބާތިލުކޮށްދިނުމަށް އެދިފައެވެ. އެގޮތުން ކްރިކް ރިޒާގެ މައްޗަށް ދައުވާ އުފުލަން ޖެހޭނީ ޤާނޫނުލްއުޤޫބާތުގެ ދަށުންކަމަށް ކަނޑައަޅުއްވައިދެއްވުމަށް ވަނީ އެދިފައެވެ.
އޭގެ އިތުރުން، އަހުމަދު އަދީބާއި އަބްދުﷲ ޒިޔަތުގެ ހެކިބަހުގައި އަދުލުވެރިކަން ގެއްލިފައިވާކަމަށް ބަޔާންކޮށް އެ ހެކިބަސްތައް ބަލައިނުގަނެވޭނެކަމަށް ބުނެ ހުށައެޅި ހުށައެޅުމަށް ހެއްކާ ބެހޭ ޤާނޫނުގެ ދަށުން ވާހަކަ ދައްކައި އަލުން ގޮތެއް ކަނޑައަޅަންޖެހޭކަމަށް ނިންމަވައިދިނުމަށްވެސް އެދިފައިވެއެވެ.
އޭގެ އިތުރުން، އަދީބާއި ޒިޔަތު ތަހުގީގަށް ދީފައިވާ ބަޔާނުގެ އޯޑިއޯ ވީޑިއޯ ރެކޯޑު ކުރުމަކީ ޤާނޫނީ ގޮތުން ލާޒިމު ކަމެއްކަމަށް ކަނޑައަޅުއްވައިދެއްވުމަށްވެސް އެދިފައިވެއެވެ.
ސުޕްރީމް ކޯޓުގައި މި މައްސަލަ ބައްލަވާ ބެންޗުގެ ރިޔާސަތު ބަލަހައްޓަވަނީ ފަނޑިޔާރު ހުސްނުއްސުއޫދެވެ.
