އެމްއެސްއެސްގެ ޚިދުމަތް އިތުރަށް ފުޅާކޮށް ދުބާއީ އަދި ސިންގަޕޫގައި އައު އޮފީހެއް ހުޅުވަނީ
50 އާއި 60 އިންސައްތަ މުދާ އެތެރެކުރަނީ އެކުންފުނިން
އެމްއެސްއެސްގެ މެނޭޖިން ޑިރެކްޓަރު މުހައްމަދު ނާޒިމް ވާހަކަފުޅުދައްކަވަނީ
މޯލްޑިވްސް ސްޓޭޓް ޝިޕިން (އެމްއެސްއެސް)ގެ ޚިދުމަތް އިތުރަށް ފުޅާކުރުމުގެ ގޮތުން ދުބާއީ އަދި ސިންގަޕޫގައި އައު އޮފީހެއް ހުޅުވުމަށް މަސައްކަތް ކުރަމުންދާ ކަމަށް އެ ކުންފުނީގެ މެނޭޖިން ޑިރެކްޓަރު މުހައްމަދު ނާޒިމް ވިދާޅުވެއްޖެއެވެ.
ރާއްޖެޓީވީގެ ފަސްކާފު ޕްރޮގްރާމްގައި އެމްއެސްއެސްގެ އެމްޑީ ނާޒިމް ވިދާޅުވީ ރާއްޖެއަށް އެތެރެކުރާ މުދަލުގެ 50 އާއި 60 އިންސައްތަ މުދާ އެތެރެކުރަނީ އެކުންފުނިން ކަމަށާއި، ރާއްޖެއިން ބޭރުގެ ގައުމުތަކަށް ވިއްކާ މުދާ އެކްސްޕޯޓު ކުރުމުގައި އެކުންފުނީގެ ދައުރު ވަރަށް ބޮޑު ކަމަށެވެ.
އެމްއެސްއެސްގެ ޚިދުމަތްތައް ފުޅާކުރުމަށް ކުރަމުންދާ މަސައްކަތްތަކަށް އަލިއަޅުއްވާލައްވައި ނާޒިމް ވިދާޅުވީ ދުބާއީގެ އިތުރުން ސިންގަޕޫރުގައި އައު އޮފީހެއް ހުޅުވުމަށް މަސައްކަތް ކުރަމުންދާ ކަމަށެވެ. އެގޮތުން މިހާރު އެންމެ ބޮޑު ސަމާލުކަމެއް ދެނީ ދުބާއީގެ އޮފީސް ހުޅުވުމަށް ކަމަށް އޭނާ ވިދާޅުވިއެވެ.
ދުބާއީގައި ހުޅުވޭ އައު އޮފީހުގައި އެމްއެސްއެސްގެ ހުރިހާ އޮޕަރޭޝަނެއް ހިނގާނެކަން ފާހަގަކުރައްވައި ނާޒިމް ވިދާޅުވީ ސީނިއަރ މެނޭޖްމަންޓް ލެވަލްގައި މަދު ދިވެއްސެއް އެ އޮފީހުގައި މަސައްކަތް ކުރި ނަމަވެސް އެ އޮފީހަށް ނަގާނީ ދުބާއީން ލިބޭ މުވައްޒަފުން ކަމަށެވެ.
މީގެ އިތުރުން ނާޒިމް ވިދާޅުވީ ދުބާއީއަކީ ވިޔަފާރީގައި ވަރަށް ގިނަ ފަސޭހަތައް ލިބިދޭ ގައުމެއް ކަމަށެވެ. އެހެންކަމުން މަސައްކަތްތައް ފަސޭހަކަމާއެކު ޑިވަލޮޕް ކުރެވޭނެ ކަމަށް ނާޒިމް ވިދާޅުވިއެވެ.
މިހާރު އެމްއެސްއެސްއިން ބޯޓު ދަތުރުކުރަނީ ހަމައެކަނި އިންޑިއާ އަދި ކޮލަންބޯއަށެވެ. ކުރިއަށް އޮތްތަނުގައި އައު ބޯޓުތައް ގެންނާނެ ކަމަށާއި، ޚިދުމަތްތައް ފުޅާވާނެ ކަމަށް ނާޒިމް ވިދާޅުވިއެވެ. އަދި ވިދާޅުވީ ބޯޓު ސީދާ ދަތުރު ނުކުރި ނަމަވެސް ޝިޕިންއާ ގުޅުންހުރި ހުރިހާ ގައުމަކުން މުދާތައް ގެނައުމުގެ ފުރުސަތު އެބަ އޮތް ކަމަށާއި، ޚިދުމަތް ނުލިބޭ ގައުމެއް ނެތް ކަމަށް ދެންނެވި ނަމަވެސް ދޮގަކަށް ނުވާނެ ކަމަށެވެ.
