އެމް.އެސް.އެސް ގެ އެންމެ ބޮޑު ބޯޓު ހިލައާއި ވެއްޔާއެކު ރާއްޖެއަށް
އެމްއެސްއެސް ކްރޯމްއަކީ ކޮންސްޓްރަކްޝަންް މުދާ އުފުލަން ޚާއްސަ ބޯޓެއް
އެމް.އެސް.އެސް ކްރޯމް
މޯލްޑިވްސް ސްޓޭޓް ޝިޕިންގ (އެމްއެސްއެސް)ގެ އެންމެ ބޮޑު ބޯޓު "އެމް.އެސް.އެސް ކްރޯމް" މުދަލާއެކު ރާއްޖެ އައިސްފިއެވެ.
މިއީ މިބޯޓު މުދަލާއެކު ރާއްޖެއަށް ކުރި ފުރަތަމަ ދަތުރެވެ. އެހެންކަމުން މޯލްޑިވްސް ޕޯޓްސް ލިމިޓެޑް (އެމްޕީއެލް)އިން ވަނީ ވޯޓަރ ސެލިއުޓަކުން އެމް.އެސް.އެސް ކްރޯމްއަށް މަރުހަބާ ކިޔާފައެވެ.
މި ބޯޓަކީ ކޮންސްޓްރަކްޝަން ސާމާނަށް ޚާއްސަ ބޯޓެކެވެ. އެމް.އެސް.އެސް ކްރޯމުން ރާއްޖެއަށް ކުރި ފުރަތަމަ ދަތުރުގައި 41،500 މެޓްރިކް ޓަނުގެ ހިލައާއި، ވެލި ރާއްޖެ ގެނެސްފައިވެއެވެ.
މި ބޯޓުގެ ދަތުރުތަކާއެކު ރާއްޖެއަށް ކޮންސްޓްރަކްޝަންގެ ބާވަތްތައް އެތެރެކުރަން އިތުރަށް ފަސޭހަވެގެންދާނެއެވެ.
މޯލްޑިވްސް ސްޓޭޓް ޝިޕިންގ ގެ ޚިދުމަތް ފަށަައިގަތީ އުޅަނދެއް ކުއްޔަށް ނަގައިގެންނެވެ. އެއަށްފަހު 2021 ވަނަ އަހަރުގެ ނޮވެމްބަރު މަހު އެމް.އެސް.އެސް.އިން ވަނީ ކުންފުނީގެ އަމިއްލަ އުޅަނދު "އެމް.އެސް.އެސް ގެލީނާ" އާއެކު ކާރގޯ ޚިދުމަތް ފަށާފައެވެ.
މޯލްޑިވްސް ސްޓޭޓް ޝިޕިންގ ކޮމްޕެނީ ޕްރައިވެޓް ލިމިޓެޑްއަކީ ސްޓޭޓް ޓްރޭޑިންގ އޯގަނައިޒޭޝަން ޕލކ.ގެ 99.99 އިންސައްތަ، އަދި ފިއުލް ސަޕްލައިސް މޯލްޑިވްސް ޕްރައިވެޓް ލިމިޓެޑުގެ 0.01 އިންސައްތަ ހިއްސާ ހިމެނޭ ކުންފުންޏެކެވެ.
