ފާއިތުވި ދެ އަހަރުތެރޭގައި އެމްއެސްއެސްއަށް ރަނގަޅު ކާމިޔާބީތަކެއް ހޯދިފައިވާކަމަށް އެ ކުންފުނީގެ މެނޭޖިންގ ޑިރެކްޓަރު ކެޕްޓަން އަބްދުﷲ ސައީދު ވިދާޅުވެއްޖެއެވެ.

ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަދައްކަވަމުން ސައީދު ވިދާޅުވީ ޝިޕިން ކުންފުންޏަކަށް ބަލާނަމަ އެމްއެސްއެސްގައި އަދި އޮތީ ވަރަށް ކުރު ތާރީޚެއް ނަމަވެސް އެމްއެސްއެސް ވުޖޫދުވިތާ އަދި މިވީ 2 އަހަރު ކަމަށާއި، ދެ އަހަރުތެރޭގައި ރަނގަޅު ކާމިޔާބީއެއް ހޯދިފައިވާކަމަށެވެ.

އެމްއެސްއެސްއަކީ ޕްރޮފިޓް މޭކިން ކުންފުންޏެއް ކަމަށާއި، މިއަހަރު ނިމޭއިރު ހުންނާނީ ކުރިން ގެއްލުނު ބައިވެސް ކަވަރު ވެފައި ކަމަށް ސައީދު ވިދާޅުވިއެވެ. ފައިދާގައި ހިންގާ ކުންފުންޏަކަށް ކުންފުނި ހެދުނުކަމީ ދެއަހަރު ތެރޭގައި ހޯދުނު އެންމެ ބޮޑު ކާމިޔާބީ ކަމުގައި ގަބޫލުކުރައްވާކަމަށް އޭނާ ވިދާޅުވިއެވެ. މިއީ ދެމެހެއްޓެނިވި ގޮތެއްގައި ދިގު މުއްދަތަކަށް ކުންފުނީގެ ޚިދުމަތްތައް ދިނުމަށް މުހިންމު ކަމެއްކަން އޭނާ ފާހަގަކުރެއްވިއެވެ.

އޭގެ އިތުރަށް ފާހަގަކޮށްލެވޭ ކުދި ކުދި ކާމިޔާބީތައް އެބަހުރި ކަމަށާއި، އޭގެ ތެރޭގައި ޑެލިވަރީ އޯޑަރ ދޫކުރާއިރު އިތުރަށް ނަގާ ޗާޖުތައް ނެގުން ހުއްޓާލުމާއި، އެމްއެސްއެސްގެ ފްލީޓުގައި ތިބި ދިވެހިންގެ އަދަދު އިތުރުކުރެވުންވެސް ސައީދު ފާހަގަކުރެއްވިއެވެ.

ސައީދު ވިދާޅުވީ ރާއްޖޭގައި ޝިޕިން ކުންފުންޏެއް ނުހިންގޭނޭ ބައެއް މީހުން ބުނާ ބުނުމަކީ ގަބޫލުކުރައްވާ ވާހަކައެއް ނޫން ކަމަށެވެ. ކޮންމެ ކަހަލަ ވިޔަފާރިއެއްވެސް ކުރެވިދާނެ ކަމަށް ގަބޫލުކުރައްވާކަމަށް ސައީދު ވިދާޅުވިއެވެ.