އެމްއެސްއެސްގެ ފުރަތަމަ ބޯޓު މުދަލާއެކު މާލޭގައި ބަނދަރުކޮށްފި

ގައުމީ ޝިޕިންގ ކުންފުނި މޯލްޑިވްސް ސްޓޭޓް ޝިޕިންގ (އެމްއެސްއެސް)ގެ ފުރަތަމަ އަމިއްލަ ބޯޓު މުދަލާއެކު ރާއްޖޭގައި ބަނދަރުކޮށްފިއެވެ.

އެމްއެސްއެސްގެ ފުރަތަމަ އަމިއްލަ ބޯޓު "އެމްއެސްއެސް ގެލީނާ" ގަތުމުގެ ކުރިން އެކުންފުނިން ރާއްޖެއަށް މުދާ އެތެރެ ކުރަމުން އައީ ބޯޓެއް ޗާޓަރު ކޮށްގެންނެވެ. އެގޮތުން 2020 ވަނަ އަހަރުގެ މާރޗް މަހުގައި މިކުންފުނި އުފައްދައިގެން އެންމެ ފުރަތަމަ ބޭނުން ކުރީ އައިބީރިއަން އެކްސްޕްރެސްގެ ބޯޓެކެވެ. އޭގެ ފަހުން އައިބީރިއަން އެކްސްޕްރެސްގެ ލީޒް ހަމަވުމުން، އެމްސީޕީ ލިޒް ބޭނުންކޮށްގެން އެމްއެސްއެސްއިން ވަނީ 13 މަސް ދުވަހު ކޮންޓެއިނާގެ ޚިދުމަތް ރާއްޖެއަށް ދީފައެވެ.

އެމްއެސްއެސް އުފެދުނު ފަހުން ރާއްޖެއަށް އެތެރެކުރި މުދަލުގެ ބޮޑު އިންސައްތައެއް އެކުންފަނިން ވަނީ ހިއްސާކޮށްފައެވެ. އެގޮތުން އެމްއެސްއެސްއިން ވަނީ މިހާތަނަށް ޖުމްލަ 767،201 ފްރައިޓް ޓަނު ރާއްޖެ އެތެރެ ކޮށްފައެވެ.

މިބޯޓު މިއަދު ހެނދުނު މާލޭ ކޮމާޝަލް ހާބަރުގައި ބަނދަރުކުރުން ފާހަގަކުރުމަށް އެމްޕީއެލްގައި ބޭއްވި ޚާއްސަ ރަސްމިއްޔާތުގައި ވާހަކަ ދައްކަމުން އެމްއެސްއެސްގެ މެނޭޖިން ޑިރެކްޓަރ ކެޕްޓަން އަބްދުﷲ ސައީދު ވިދާޅުވީ މިދާއިރާގައި މަސައްކަތް ކުރާނެ ދިވެހީން އުފެއްދުމަށް ގިނަގުނަ މަސައްކަތްތަކެއް ކުރަމުން އަންނަ ކަމަށެވެ.

އެމްއެސްއެސްގެ ދަތުރުތައް ކުރުމަށް ހަމަޖެހިފައި ވަނީ ރާއްޖެއާ ލަންކާއާ ދެމެދުއެވެ. އެމްއެސްއެސްގެ ޖެނެރަލް މެނޭޖަރ، ކެޕްޓަން މުހައްމަދު ނާޒިމް ވިދާޅުވީ އެކުންފުނީގެ އަމާޒަކީ މާލޭއާއި ކޮލޮމްބޯއާއި ދެމެދު ކޮންމެ އަށް ދުވަހަކުން ދަތުރެއް ބޭއްވުން ކަމަށެވެ. މީގެއިތުރުން މި ބޯޓަކީ 780 ކޮންޓެއިނާގެ ޖާގައާއި 60 ޓަނުގެ ކްރޭން އަދި 60 ރީފާރ އުފުލޭވަރުގެ ބޮޑު ބޯޓެއްކަންވެސް ކެޕްޓަން ނާޒިމް ވަނީ ފަހަގަކުރައްވާފައެވެ.

މޯލްޑިވްސް ސްޓޭޓް ޝިޕިންގ ކޮމްޕެނީ ޕްރައިވެޓް ލިމިޓެޑުގެ ނަމުގައި ސަބްސިޑަރީ ކުންފުންޏެއް އުފައްދާ ރަޖިސްޓްރީ ކޮށްފައިވަނީ މާޗް މަހުއެވެ. އެމްއެސްއެސްގެ ނަމުގައި ކުންފުނި އުފެއްދުމުގެ މައިގަނޑު މަގްސަދަކީ ދިވެހިރާއްޖެއަށް އެތެރެކުރާ މުދާ ވީހާވެސް ހެޔޮ އަގެއްގައި ދިވެހި ކުންފުންޏެއް މެދުވެރިކޮށް ގެނެވޭނެ މަގުފަހިކޮށް ދިނުމެވެ.

އެ ކުންފުންޏަކީ އެސްޓީއޯގެ 99.99 އިންސައްތަ އަދި ފިއުލް ސަޕްލައިސް މޯލްޑިވްސް ޕްރައިވެޓް ލިމިޓެޑުގެ 0.01 އިންސައްތަ ހިއްސާ ހިމެނޭ ކުންފުންޏެކެވެ.