ރަސްދޫ ޕޮލިސް ސްޓޭޝަނުގައި ބަންދުކޮށްފައި ހުރި މީހަކު އެތަނުގެ އާރމަރީ ފަޅާލި ވާހަކަ ފުލުހުން ދޮގުކޮށްފިއެވެ.
ފުލުހުން ބުނީ، މި މައްސަލައިގައި ހިމެނެނީ އއ ރަސްދޫ ޕޮލިސް ސްޓޭޝަނުން ބަލަމުންދާ މައްސަލައަކާއި ގުޅިގެން ހައްޔަރު ކޮށްފައި ހުރި 25 އަހަރުގެ ދިވެހި ފިރިހެނެއް ކަމަށެވެ.
އޭނާ ގޮޅިން ފިލާފައިވަނީ މެއި މަހުގެ 5 ވަނަ ދުވަހު ގޮޅިން ނެރެފައި ހުއްޓައެވެ.
އެމީހާ ހޯދުމުގެ މަސައްކަތް ފުލުހުން މިހާރު ގެންދަނީ ކުރަމުންނެވެ. އޭނާއަކީ ޝަރީއަތް ނިމެންދެން ބަންދު ކޮށްފައި ހުރި މީހެއްކަމަށްވެސް ފުލުހުން މައުލޫމާތު ދެއެވެ.
ފުލުހުން މައުލޫމާތު ދޭ ގޮތުގައި މި މައްސަލައާ ގުޅުވައި ޕޮލިސް ސްޓޭޝަންގެ ތަނެއް ފަޅާލިކަމަށް ބުނެ ސޯޝަލް މީޑިއާގައި ފަތުރާފައިވަނީ ތެދު މައުލޫމާތެއް ނޫނެވެ. އޭނާ ރަސްދޫ ޕޮލިސް ސްޓޭޝަނުން އެއްވެސް އެއްޗެއް ގެންގޮސްފައިނުވާކަމަށްވެސް ފުލުހުން ބުނެއެވެ.
ސޯޝަލް މީޑިއާގައި ދައުރުވެފައިވާ ގޮތުގައި އޭނާ ވަނީ ފުލުހުންގެ ރަސްދޫ ސްޓޭޝަން އާރމަރީ ނުވަތަ ހަތިޔާރު ރައްކާކުރާތަން ފަޅާލައި، ބައެއް ތަކެތި ވަގަށް ނަގައިގެން ފިލާފައެވެ. އެކަމާ ގުޅިގެން ފުލުހުންގެ ސްޕެޝަލް އޮޕަރޭޝަންގެ ޚާއްސަ އޮޕަރޭޝަނަކަށް މާލެ އިން ރަސްދޫ އަށް ޓީމެއް ފޮނުވާކަމަށްވެސް ޚަބަރުތައް ބުނެފައިވެއެވެ.
