ފައިނަލަށް ރެއާލް ފުރިހަމައަށް ތައްޔާރު، އަންޗެލޮޓީގެ އިތުބާރު ކުޅުންތެރިންނަށް
ކޮޕަ ޑެލްރޭ މުބާރާތުގެ ފައިނަލުން ކޮންމެ ނަތީޖާއެއް ނިކުތްނަމަވެސް، ރެއާލުން ޖެހިގެން އޮތް މެޗަށް ނިކުންނާނީވެސް އެންމެ ފުރިހަމައަށް ތައްޔާރުވެގެން
ރެއާލް މެޑްރިޑުގެ ކޯޗު ކާލޯ އަންޗެލޮޓީ
ކޮޕަ ޑެލް ރޭ މުބާރާތުގެ ފައިނަލަށް ރެއާލް މެޑްރިޑު ފުރިހަމައަށް ތައްޔާރު ކަމަށާއި، ޓީމުގެ ކުޅުންތެރިންނަށް އިތުބާރު އޮންނާނެކަމަށް، ރެއާލް މެޑްރިޑުގެ ކޯޗު ކާލޯ އަންޗެލޮޓީ ބުނެފި އެވެ.
އަންޗެލޮޓީ މިހެން ބުނީ ފައިނަލްގައި އޮސަސޫނާއާ ދެކޮޅަށް ނިކުންނަ މެޗުގެ ކުރިން އޮތް ޕްރެސް ކޮންފަރެންސްގައި ވާހަކަދައްކަމުންނެވެ. އަންޗެލޮޓީ ބުނީ އޭނާ ވާދަކުރަން އޮތީ ކޮޕަ ޑެލްރޭގެ ފައިނަލަކާއި، ޔުއެފާ ޗެމްޕިއަންސް ލީގުގެ ސެމީ ފައިނަލެއް ކަމަށެވެ. އޭނާ ފާހަގަކުރިގޮތުގައި، ނިކުންނާނީ އޭނާގެ "ދިރިއުޅުމާ" ކުޅޭކަށް ނޫނެވެ. އަންޗެލޮޓީ ބުނީ އޭނާގެ ދިރިއުޅުމުގެ ކަންކަން އޮތީ ހަމަޖެހިފައިކަމަށާއި، ހަމައެކަނި މިވަގުތު އޮތް ޓާސްކަކީ ކޮޕަ ޑެލްރޭ ފައިނަލްކަމަށެވެ. އޭނާ ބުނީ ސީޒަނުގެ ކުރީކޮޅު އެއީ މާ މުހިންމު މުބާރާތެއްގެ ގޮތުގައި ނުބެލިނަމަވެސް، މިހާ ހިސާބަށް އައިއިރު އެ މުބާރާތްވެސް މުހިންމުވެއްޖެކަމަށެވެ. އަންޗެލޮޓީ ބުނީ ކޮޕަ ޑެލްރޭގެ ފައިނަލާއި ޗެމްޕިއަންސް ލީގުގެ ސެމީ ފައިނަލް އޮތުމާއެކު، ފައިނަލްގެ ކުރިން އަމިއްލަ ދަނޑުގައި ތައްޔާރުވެލެވެން ވަގުތު ލިބުމަކީވެސް ހިތްހަމަ ޖެހުމެއް ކަމަށެވެ. އޭނާ ފާހަގަކުރިގޮތުގައި ކޮޕަ ޑެލްރޭ މުބާރާތުގެ ފައިނަލުން ކޮންމެ ނަތީޖާއެއް ނިކުތް ނަމަވެސް، ރެއާލުން ޖެހިގެން އޮތް މެޗަށް ނިކުންނާނީވެސް އެންމެ ފުރިހަމައަށް ތައްޔާރުވެގެންނެވެ.
މީގެ އިތުރުން އަންޗެލޮޓީ ބުނީ މިވަގުތަށް ހުރިހާ ފޯކަސްއެއް ހުރީ ފައިނަލަށް ކަމަށާއި، ކުޅުންތެރިންގެ ވިސްނުންވެސް ހުންނާނީ އެގޮތަށް ކަމަށެވެ. އެކަން ފާހަގަކޮށް އަންޗެލޮޓީ ބުނީ، މިއީ ރެއާލަށް ލިބޭ ވަރަށް ރަނގަޅު ފުރުސަތެއް ކަމަށެވެ. އެއީ އެ ތަށި ކާމިޔާބު ކުރެވިއްޖެނަމަ، ވާދަކުރެވޭ ހުރިހާ މުބާރާތެއް ދެ ސީޒަންގެ ތެރޭގައި ކާމިޔާބު ކުރެވޭނެ ކަމަށް އޭނާ ބުންޏެވެ. އޭނާ ބުނީ މިވަގުތު ހުރިހާ މަސައްކަތެއް ހުސްކުރަންވީ އެކަމަށް ކަމަށާއި، މިއީ ރެއާލަށް ނަސީބު މެޗެއް ކަމަށެވެ.
އިތުރަށް އޭނާ ބުނީ ކުޅުންތެރިންނަށް އަބަދުވެސް ފުރިހަމައަށް އިތުބާރު އޮންނާނެކަމަށެވެ. އޭނާ ފާހަގަކުރިގޮތުގައި ކޯޗަކަށް ހުންނަ މީހާ ވާންޖެހޭނީ ކުޅުންތެރިންނަށް އިތުބާރުކުރާނެ މީހަކަށެވެ. ސަބަބަކީ ކޯޗުވެސް އެދޭ ފަދައިން ކުޅުންތެރިންވެސް ބޭނުންވާނީ ކުލަބަށް ކާމިޔާބު ލިބުންކަމަށާއި، ގުޅިގެން ކުރެވޭ މަސައްކަތުގެ ނަތީޖާ އަބަދުވެސް ކާމިޔާބުވާނެ ކަމަށެވެ.
ރެއާލުން އޮސަސޫނާއާ ދެކޮޅަށް ނިކުންނާނީ ހޮނިހިރު ދުވަހުގެ ރޭ ދަންވަރު އެކެއް ޖަހާއިރުއެވެ.
