މީހުން ނެތް ދާއިރާތަކަށް ސިއްހީ ދާއިރާގައި މުސާރަ ބޮޑު ކުރީ ގާބިލް މީހުން އުފައްދަން - އާދިލް
ހެލްތު ދާއިރާގެ މުވައްޒަފުންގެ މުސާރައިގެ އައު އޮނިގަނޑަށް ބަލާއިރު ނިސްބަތުން އެންމެ މުސާރަ ބޮޑުވީ ސްޕެޝަލިސްޓުންނާއި ސަބްސްޕެޝަލިސްޓުންނާއި ނަރުހުންނަށް
ނަރުހުން
މީހުން ނެތް ދާއިރާތަކަށް ސިއްހީ ދާއިރާގައި މުސާރަ ބޮޑު ކުރީ ގާބިލް މީހުން އުފައްދަންކަމަށް ހެލްތު މިނިސްޓްރީގެ ސްޓޭޓް މިނިސްޓަރު އަހްމަދު އާދިލް ވިދާޅުވެއްޖެއެވެ.
ރާއްޖެޓިވީގެ ފަލަ ސުރުޚީ ޕްރޮގްރާމްގައި ވަހަކަދައްކަވަމުން އޭނާ ވިދާޅުވީ ސިއްހީ ދާއިރާ އަށް ބޭނުންވާ ފަންނީ މީހުން ލިބުމުގައި އަދިވެސް ދަތިތަކާއި ކުރިމަތިލާން ޖެހޭ ކަމަށެވެ. އަދި ސިއްހީ ދާއިރާ އަށް ޝައުގުވެރިވާ މީހުން ނެތް ދާއިރާތަކުން މީހުން އުފެއްދޭނީ ރަނގަޅު މުސާރަ އެއް ލިބިގެން ކަމަށް ސަރުކާރުން ޤަބޫލުކުރާ ކަަމަށެވެ. އެހެންކަމުން މި ބަދަލާއެކު ބައެއް މަޤާމުތަކަށް މީހުން ނުލިބުމުގެ މައްސަލަ އަށް ޖުމުލަ ހައްލެއް ލިބޭނެ ކަމަށް އުންމީދުކުރައްވާ ކަމަށް އާދިލް ވިދާޅުވިއެވެ.
އާދިލް ވިދާޅުވީ ސިއްހީ ދާއިރާގެ މުސާރައިގެ އޮނިގަނޑަށް އައި ބަދަލުތަކާއެކު އައު މަޤާމުތައް ވެސް އުފައްދާފައިވާނެ ކަަމަށެވެ. އަދި 60 އަށް ވުރެ ގިނަ ދާއިރާތަކުން މުސާރަ އަށް ބަދަލުގެނެސްފައިވާ ކަމަށް އާދިލް ވިދާޅުވިއެވެ. ނަރުހުންނާއި އެހެނިހެން ދާއިރާތަކުން ވެސް މިހާރު ކުރިއަށް ދެވޭނެ މަގު އިތުރަށް ފުޅާކުރެވިފައިވާ ކަމަށް އާދިލް ވިދާޅުވިއެވެ. އާދިލް އިތުރަށް ވިދާޅުވީ ސިއްހީ ދާއިރާގައި ދިވެހިން ނެތް ދާއިރާތަކުގައި ދިވެހިން ބޭތިއްބުމަށް ވެސް މަސައްކަތްކޮށްފައިވާނެ ކަމަށެވެ.
ހެލްތު ދާއިރާގެ މުވައްޒަފުންގެ މުސާރައިގެ އައު އޮނިގަނޑަށް ބަލާއިރު ނިސްބަތުން އެންމެ މުސާރަ ބޮޑުވީ ސްޕެޝަލިސްޓުންނާއި ސަބްސްޕެޝަލިސްޓުންނާއި ނަރުހުންނަށެވެ. ކުރިން ކްލިނިކަލް ނަރުސް (ގްރޭޑް 9) އަށް އެވްރެޖުކޮށް 19،922ރ. ލިބެއެވެ. އައު ބަދަލާއެކު މީގެ ފަހުން 32،974ރ. ލިބޭނެ އެވެ. އެއީ 13،000ރ. (66 ޕަސެންޓުގެ) ކުރިއެރުމެކެވެ. ސްޕެޝަލިސްޓުންގެ މުސާރައަށް ވެސް 20 ޕަަސެންޓާއި 31 ޕަސެންޓާ ދޭތެރޭގެ ކުރިއެރުމެއް ވަނީ ގެނެސްފައެވެ.
