ސަވާރީ ބޯޓު: 6 މީހުން ސަލާމަތްކޮށްފި، ބޯޓު އަޑިއަށް!
4 މެއި 2023 | ބުރާސްފަތި 09:43ބޯޓުގައި ދިވެހިންނާއި ބިދޭސީން ވެސް ތިބި
އެމް ސަވާރީ ބޯޓުގެ ފަޅުވެރިން ކޯސްޓު ގާޑަށް ނަގަނީ
ގެއްލިގެން ހޯދަމުންދާ "އެމް ސަވާރީ" ބޯޓު އަޑިއަށް ގޮސްފައިވާ ކަމަށާއި، އޭގަ ތިބި 6 މީހުން ސަލާމަތްކޮށްފައިވާ ކަމަށް އެމްއެންޑީއެފުން ބުނެފިއެވެ.
އެމްއެންޑީއެފުން ބުނީ މިއީ ރޭ މެންދަމު 01:30 ހާއިރު މާލެއިން ފުރައިގެން ވ. ފެލިދޫއަށް ދަތުރުކުރި ބޯޓެއް ކަމަށެވެ. މި ބޯޓް ފުރިފަހުން ޚަބަރެއް ނުވެގެން އެމްއެންޑީއެފް ކޯސްޓްގާޑްގެ މެރިޓައިމް ރެސްކިއު ކޯޑިނޭޝަން ސެންޓަރ (އެމްއާރުސީސީ) ބުރާސްފަތި ދުވަހުގެ ހެނދުނު 06:30 ގައި ރިޕޯޓްކޮށްފައިވާކަމަށެވެ.
މި އުޅަނދުގެ ޚަބަރެއް އެންމެފަހުން ވެފައި ވަނީ ކ. ގުރައިދޫ އިރުން 10 ނޯޓިކަލް މޭލު ބޭރުން ކަމަށް އެމްއެންޑީއެފުން ބުނެއެވެ. މި ބޯޓް ހޯދުމުގެ މަސައްކަތް އެމްއެންޑީއެފް މާލެ އޭރިއާ ކޯސްޓްގާޑް ސެކަންޑް ސްކޮޑްރަންއިން ވައިގެ މަގުންނާއި ކަނޑުމަގުން ކޮށްފައިވެއެވެ.
އެމްއެންޑިއެފުން ބުނީ އެމް ސަވާރީ ބޯޓު ހޯދުމަށް ހިންގާ ސާރޗް އެންޑް ރެސްކިޔު އޮޕަރޭޝަންގެ ތެރެއިން މިބޯޓުން ދަތުރުކުރި 6 މީހުން އެމްއެންޑީއެފް ކޯސްޓްގާޑުން ސަލާމަތްކޮށްފައިވާ ކަމަށެވެ. ބިދޭސީންނާއި ދިވެހިން ވެސް ތިބި ކަމަށް އެމްއެންޑީއެފުން ބުނެއެވެ.
މިމީހުން ފެނިފައި ވަނީ ކޯސްޓްގާޑުން ހޯދަމުންދިޔަ ސަރަހައްދު ތެރެއިން އެމްއެންޑީއެފް ޑޯނިއަރ އެއަރކްރާފްޓަށެވެ. މި 6 މީހުން މިހާރު ކޯސްޓްގާޑް ޝިޕް ޣާޒީއަށް ނަގާފައިވާއިރު އެންމެންގެ ހާލު ރަނގަޅެވެ. ދަތުރުކުރި ބޯޓް އަޑިއަށް ގޮސްފައިވާކަމަށް ކެޕްޓަން މައުލޫމާތު ދީފައިވާ ކަމަށް ވެސް އެމްއެންޑީއެފުން ބުނެއެވެ.
