ވެހި އޯ ލެވެލް ސަކްސެސް ޕްރޮގްރާމުގައި ބައިވެރިވި މުދައްރިސުންނަށް އެވޯޑު ދީފި
4 މެއި 2023 | ބުރާސްފަތި 03:5126 ސްކޫލަކުން 37 މުދައްރިސުން ވަނީ އެވޯޑް ޙާޞިލުކުރައްވާފައި
މުދައްރިސުންނަށް އެވޯޑު ދިނުން
"ވެހި އޯ ލެވެލް ސަކްސެސް ޕްރޮގްރާމް 2023" ގެ ދަށުން މުދައްރިސުންގެ އަގު ވަޒަންކޮށް އެވޯޑު ދީފިއެވެ.
ޢިއްޒުއްދީން ސްކޫލުގައި ބުދަ ދުވަހުގެ ރޭ ބޭއްވި ޙަފްލާ ޝަރަފްވެރިކޮށްދެއްވާ، އެވޯޑުތައް ހަވާލުކޮށްދެއްވީ އެޑިޔުކޭޝަން މިނިސްޓަރު ޑރ. ޢާއިޝަތު ޢަލީއެވެ.
"ވެހި އޯ ލެވެލް ސަކްސެސް ޕްރޮގްރާމް" އަކީ ސްކޫލް ވެހި ޕްރޮގްރާމްގެ ދަށުން އޯ ލެވެލް އިމްތިޙާނުން ދަރިވަރުންނަށް ރަނގަޅު ނަތީޖާ ހޯއްދަވައިދެއްވާ، އެ ނަތީޖާ ހިފެހެއްޓެވުމަށް ނަމޫނާ މަސައްކަތްތަކެއް ކުރައްވާ މުދައްރިސުންގެ އަގުވަޒަންކުރުމަށްޓަކައި މިނިސްޓްރީ އޮފް އެޑިޔުކޭޝަނުން ފަށާފައިވާ ޕްރޮގްރާމެކެވެ. މި ޕްރޮގްރާމްގެ ދަށުން ރާއްޖޭގެ 26 ސްކޫލަކުން 37 މުދައްރިސުން ވަނީ މި އެވޯޑް ޙާޞިލުކުރައްވާފައެވެ.
3 ކެޓެގަރީއަކުން މި އެވޯޑްތައް ދީފައިވެއެވެ. އެއީ އޯލެވެލް އެލީޓް އެވޯޑާއި، އޯލެވެލް އެޗީވްމަންޓް އެވޯޑުގެ އިތުރުން އޯލެވެލް އެކްސެލެންސް އެވޯޑެވެ.
އޯލެވެލް އެލީޓް އެވޯޑަކީ އެ މުދައްރިސަކު ކިޔަވައިދޭ މާއްދާއިން މެދުނުކެނޑި 15 އަހަރު ދަރިވަރުންގެ އޯ ލެވެލް އިމްތިހާނުގެ ނަތީޖާ 60 އިންސައްތަ އަށް ވުރެ މަތީގައި ހިފެހެއްޓެވި މުދައްރިސުންނަށް ދީފައިވާ އެވޯޑެކެވެ.
އޯލެވެލް އެޗީވްމަންޓް އެވޯޑަކީ އެ މުދައްރިސަކު ކިޔަވައިދެއްވާ މާއްދާއިން މެދުނުކެނޑި 10 އަހަރު ދަރިވަރުންގެ އޯ ލެވެލް އިމްތިހާނުގެ ނަތީޖާ 60 އިންސައްތަ އަށް ވުރެ މަތީގައި ހިފެހެއްޓެވި މުދައްރިސުންނަށް ދީފައިވާ އެވޯޑެކެވެ.
މީގެ އިތުރުން އޯލެވެލް އެކްސެލެންސް އެވޯޑަކީ އެ މުދައްރިސަކު ކިޔަވައިދެއްވާ މާއްދާއިން މެދުނުކެނޑި 5 އަހަރު ދަރިވަރުންގެ އޯ ލެވެލް އިމްތިހާނުގެ ނަތީޖާ 60 އިންސައްތަ އަށް ވުރެ މަތީގައި ހިފެހެއްޓެވި މުދައްރިސުންނަށް ދީފައިވާ އެވޯޑެކެވެ.
މި ޕްރޮގްރާމްގެ ސަބަބުން މުދައްރިސުން އުނގަންނައިދިނުމުގައި ކުރިއަރައި ދިއުމަށާއި ރަނގަޅު ނަތީޖާ ހޯއްދެވުމުގައި ދެމިތިބުމަށް އިތުރު ހިތްވަރެއް ލިބިގެންދާނެ ކަމަށް އެޑިއުކޭޝަން މިނިސްޓްރީން ބުނެފައިވެއެވެ. އަދި ދަރިވަރުންނަށް ނަމޫނާ ދެއްކުމުގައި މެދުނުކެނޑި އެންމެ އުސް ހަރުފަތުގައި މަސައްކަތް ކުރުމަށް ހިތްވަރަކަށް ވެގެންދާނެއެވެ.
"ސްކޫލް ވެހި" ޕްރޮގްރާމަކީ ސްކޫލްތަކުގެ ހިންގުން އިތުރަށް ހަރުދަނާކޮށް، ދަރިވަރުންގެ ނަތީޖާ ރަނގަޅުކުރުމަށްޓަކައި ކުރިއަށްގެންދާ ޕްރޮގްރާމެކެވެ. މި ޕްރޮގްރާމްގެ ތެރެއިން ބިނާކުރަނިވި އުނގަންނައިދިނުމުގެ ޙަރަކާތްތައް ތަރައްޤީކުރުމަށާއި، ތަޢުލީމީ ދާއިރާ ކުރިއެރުވުމަށް މުދައްރިސުންނަށް އެހީތެރިކަން ފޯރުކޮށްދެއެވެ. މިހާރު މި ޕްރޮގްރާމްގައި ރާއްޖޭގެ އެކި ކަންކޮޅުތަކުން ޖުމްލަ 153 ސްކޫލުން ބައިވެރިވެއެވެ.
