މިހާރު ކުރިއަށްދާ އިންޓަރ އޮފީސް ވޮލީބޯޅަ މުބާރާތުގައި އާބަންކޯ އިން ކުޅުނު ދެ ވަނަ މެޗުން ވެސް މޮޅުވީއިރު، ވެމްކޯ އިން ކުޅުނު ފުރަތަމަ މެޗު ކާމިޔާބުކޮށް ފެށުން ރަނގަޅުކޮށްފި އެވެ.

ބުދަ ދުވަހުގެ ހަވީރު ހުޅުމާލޭ ވޮލީ ކޯޓުގައި ކުޅުނު މެޗުގައި އާބަންކޯ އިން ނިކުތީ މޯލްޑިވްސް އެއާޕޯޓްސް ކޮމްޕެނީ ލިމިޓެޑު (އެމްއޭސީއެލް)އާ ދެކޮޅަށެވެ. މިއީ އާބަންކޯ އާއި އެމްއޭސީއެލްގެ ދެ ވަނަ މެޗެވެ. ފުރަތަމަ މެޗުން އާބަންކޯ މޮޅުވީއިރު، އެމްއޭސީއެލް ވަނީ ބަލިވެފަ އެވެ. އެމްއޭސީއެލްގެ މައްޗަށް އާބަންކޯ އިން ކުރި ހޯދީ ފަސޭހަކަމާއެކު ސީދާ ތިން ސެޓުންނެވެ. މެޗުގެ ސެޓުތައް ދިޔައީ 25-16، 25-13 އަދި 25-19 އިންނެވެ. މެޗުގެ މޮޅު ކުޅުންތެރިޔަކަށް ހޮވުނީ އާބަންކޯގެ ޝަމާއިލް ޙުސެއިންނެވެ.

ބުދަ ދުވަހުގެ ރޭ ވެމްކޯ އިން ނިކުތީ މޯލްޑިވްސް ކަރެކްޝަން ސާވިސްއާ ދެކޮޅަށެވެ. ވާދަވެރި ކުޅުމަކަށްފަހު ވެމްކޯ އިން މެޗު ކާމިޔާބު ކުރީ ތިން ސެޓު އެއް ސެޓުންނެވެ. މެޗުގެ ފުރަތަމަ ދެ ސެޓު ކާމިޔާބު ކުރީ ވެމްކޯ އިންނެވެ. އެއީ ފުރަތަމަ ސެޓު 25-20 އަދި ދެ ވަނަ ސެޓު 25-22 އިންނެވެ. ނަމަވެސް ކަރެކްޝަން އިން ވަނީ 17-25 އިން ތިން ވަނަ ސެޓު ހޯދައިފަ އެވެ. ވެމްކޯ އިން ހަތަރު ވަނަ ސެޓު ކާމިޔާބު ކުރީ 25-19 އިންނެވެ. މެޗުގެ މޮޅު ކުޅުންތެރިޔަކަށް ހޮވުނީ ވެމްކޯގެ ބިދޭސީ ކުޅުންތެރިޔާ ވިނީތު ކުމާރު އެވެ.

މުބާރާތުގައި ބުރާސްފަތި ދުވަހުގެ ހަވީރު ބައްދަލު ކުރާނީ ސްޓެލްކޯ އާއި އެމްޕީއެލް އެވެ. ބުރާސްފަތި ދުވަހުގެ ރޭ ބައްދަލު ކުރާނީ އާބަންކޯ އާއި ޕޮލިހެވެ.