ކްލޮޕްގެ މައްސަލަ އިނގިރޭސި އެފްއޭ އިން ބަލަނީ، ފިޔަވަޅު އެޅުމުގެ ފުރުސަތު ބޮޑު

ލިވަޕޫލްގެ ކޯޗު ޔާގަން ކްލޮޕްގެ އަޚުލާޤީ މައްސަލައެއް އިނގިރޭސި އެފްއޭ އިން ތަހުގީގު ކުރަން ފަށައިފި އެވެ.

އެފްއޭ އިން ބަލަމުން އަންނަ ކްލޮޕްގެ މައްސަލަ އަކީ ޕްރިމިއާ ލީގުގައި ލިވަޕޫލުން ޓޮޓެންހަމާ ދެކޮޅަށް ކުޅުނު މެޗުގެ ރެފްރީއަކަށް ހުރި ޕޯލް ޓިއާނީއާ ގުޅޭ ގޮތުން އޭނާ ދެއްކި ވާހަކަ އެވެ. އެ މެޗަށްފަހު ކްލޮޕް ބުނީ، ޕޯލް ޓިއާނީ ލިވަޕޫލާމެދު ޒާތީ ގޮތެއް ގެންގުޅޭ ކަމަށާއި އެފަދަ ކަމެއް ނޯންނަ ކަމަށް އޭނާ ބުނި ނަމަވެސް އެކަން ޤަބޫލު ނުކުރާނެ ކަމަށެވެ. މީގެ އިތުރުން އެ މެޗުގައި ކްލޮޕަށް ރީނދޫ ކާޑު ދެއްކި ވަގުތު، ޕޯލް ޓިއާނީ ބުނަން ނުވާވަރުގެ އެއްޗެއް ބުނި ކަމަށް ވެސް ކްލޮޕް ވަނީ ބުނެފަ އެވެ.

އެ މައްސަލަ އިނގިރޭސި އެފްއޭ އިން ބަލަން ފެށީ، ޕޯލް ޓިއާނީގެ މައްސަލައެއް ނެތް ކަމަށް ޕްރޮފެޝަނަލް ގޭމްސް މެޗު އޮފިޝަލްސް ލިމިޓެޑު (ޕީޖީއެމްއޯއެލް) އިން ވެސް ނިންމާފައި ވަނިކޮށެވެ. ޕީޖީއެމްއޯއެލް އަކީ އިނގިރޭސި ޕްރިމިއާ ލީގުގެ މެޗުތަކުގައި އިންސާފު ކުރަން ތިބޭ ރެފްރީންގެ ކަންކަން ބަލަހައްޓަމުން އަންނަ ކޮމެޓީ އެވެ. އެ ކޮމެޓީން ބުނީ އެ މެޗުގައި ރެފްރީ ޕޯލް ޓިއާނީ ދެއްކި އެންމެހާ ވާހަކަތަކުގެ ރެކޯޑިން ބެލި ކަމަށާއި، ރެފްރީ އަމަލުކޮށްފައި ވަނީ އެންމެ ޕްރޮފެޝަނަލް ގޮތުގައި ކަމުގެ ޔަޤީންކަން ދޭ ކަމަށެވެ.

އެކަމާ ގުޅިގެން އިނގިރޭސި އެފްއޭ އިން މިހާރު އަންނަނީ ކްލޮޕްގެ މައްސަލަ ބަލަމުން ކަމަށް ބޭރުގެ މީޑިއާތަކުގައި ވަނީ ބުނެފަ އެވެ. އަދި އެ މައްސަލައިގައި ކްލޮޕަށް ފިޔަވަޅު އެޅުމުގެ ފުރުސަތު ވަރަށް ބޮޑު ކަމަށް ވެސް ވަނީ ބުނެފަ އެވެ. ސަބަބަކީ ރެފްރީންނާ ގުޅޭ ގޮތުން ސާބިތު ނުހިފޭ ވަރުގެ ވާހަކަތައް ދައްކާތީ އާއި ކްލޮޕްގެ އަމަލުތައް ހުރި ގޮތުންނެވެ. ކްލޮޕަށް އަޅާނެ ވަކި ފިޔަވަޅެއް މިހާތަނަށް ސާފުވެފަައި ނުވި ނަމަވެސް، ބައެއް މީޑިއާތަކުގައި ބުނެފައި ވަނީ އޭނާ އަށް ޖޫރިމަނާއެއް އަންނާނެ ކަމަށެވެ.