ތައިލަންޑުގެ ބޮޑުވަޒީރުގެ މަގާމަށް ކުރިމަތިލައްވައި ކެމްޕެއިންކުރައްވަމުން ގެންދަވާ، ކުރީގެ ބޮޑުވަޒީރު ތަކްޝިން ޝިނަވަޓްރާގެ އެންމެ ހަގު ދަރިކަނބަލުން ޕޭތުންގތާން ޝިނަވަޓްރާއަށް ފިރިހެން ބޭފުޅަކު ލިބިވަޑައިގެންފިއެވެ. އޭނާއަށް ބޭފުޅަކު ލިބިވަޑައިގެންފައި މި ވަނީ އިންތިޚާބަށް ދެ ހަފުތާއަށް ވެފައި ވަނިކޮށެވެ. ދަރިކަލުންނާއި ފިރިކަލުންނާއެކު ނަންގަވާފައިވާ ފޮޓޯއެއް ޓްވީޓްކުރައްވައި ޕޭތުންގތާން ވިދާޅުވެފައިވަނީ، ރައްކައުވުމުގެ އާލާސްކަންފުޅު ރަނގަޅުވުމަށް ކުޑަ ދުވަސްކޮޅެއް ނެންގެވުމަށްފަހު ނޫސްވެރިންނާ ބައްދަލުކުރައްވާނެ ކަމުގައެވެ.

މޭ 14 ވަނަ ދުވަހު ފެއްޓުމަށް ތާވަލްކޮށްފައިވާ ތައިލަންޑްގެ އިންތިޚާބަށް ކުރިމަތިލައްވާފައިވާ ބޭފުޅުންގެ ތެރެއިން އެންމެ ކުރީގައި އުޅުއްވާކަމަށް ޕޯލްތަކުން ދައްކަނީ ޕޭތުންގތާން ޝިނަވަޓްރާއެވެ. ކުރިން ބޮޑުވަޒީރުކަން ކުރެއްވި އެކަމަނާގެ ބައްޕާފުޅު ތަކްޝިން ޝިނަވަޓްރާއާއި ބޮޑުދައިތާފުޅު ޔިންގލަކް ޝިނަވަޓްރާވެސް މިވަގުތު ދިރިއުޅުއްވަމުން ގެންދަވަނީ ގައުމުން ބޭރުގައެވެ. އެއީ ކޮރަޕްޝަންގެ ދައުވާއަށް ފިއްލެވުމަށްޓަކައެވެ.

ކުރިން އާރމީ ޗީފްގެ މަގާމްގައި ހުންނެވި، ތައިލަންޑުގެ މިހާރުގެ ބޮޑުވަޒީރު ޕްރަޔުތު ޗާންއޮޗާ ވެރިކަމަށް ވަޑައިގެންފައިވަނީ 2014 ވަނަ އަހަރު އަސްކަރިއްޔާގެ މަދަދާއެކު ގެނައި އިންގިލާބަކުންނެވެ. އަދި އޭގެ ފަހުން ކޯޓު އަމުރެއް ނެރުއްވައި، އޭރުގެ ބޮޑުވަޒީރު ޔިންގލަކް ޝިނަވަޓްރާ މަގާމުން ވަކިކުރެއްވިއެވެ.

ތަކްޝިން ޝިނަވަޓްރާވެސް ވަކިކުރެއްވުނީ 2006 ވަނަ އަހަރު ގެނެވުނު އިންގިލާބެއްގައެވެ.

ކުރިޔަށް އޮތް އިންތިޚާބްގައި ތައިލަންޑުގެ 52 މިލިއަން މީހުންނަށް ވޯޓުލުމުގެ ހައްގު ލިބެއެވެ. ވޯޓުލައިގެން ހޮވާނީ ތިރިގޭގެ 500 މެމްބަރުންނެވެ. ނަމަވެސް އަސްކަރިއްޔާގެ ބާރުގެ ދަށުން އެކުލަވާލާފައިވާ ގާނޫނު އަސާސީ ބުނާގޮތުން، މަތިގެ ނުވަތަ ސެނެޓަށްވެސް، ބޮޑުވަޒީރަކު އިޚްތިޔާރުކުރުމުގައި ބޮޑު ދައުރެއް ދީފައި ވެއެވެ. ސެނެޓުގައި ގިނައިން ތިބެނީ އަސްކަރިއްޔާއަށް ވަފާތެރި މެމްބަރުންނެވެ. އެހެންކަމުން އަސްކަރިއްޔާގެ މަދަދު ނެތް ބޭފުޅަކަށް ތައިލަންޑުގައި ވެރިކަމަށް ވަޑައިގަތުން ދަތިކަމަކަށްވެއެވެ.