ފަނޑިޔާރު އަލީ ހަމީދަށް އަވަސް ޝިފާއަކަށް އެދެން: އަދީބު
އަލީ ހަމީދަށް ފަރުވާދޭން ފެށި ބުރާސްފަތި ދުވަހު
ސުޕްރީމް ކޯޓުގެ ފަނޑިޔާރު އަދި ޖޭއެސްސީގެ ރައީސް އަލީ ހަމީދު
ސުޕްރީމް ކޯޓުގެ ފަނޑިޔާރު އަލީ ހަމީދަށް އަވަސް ޝިފާއެއް ދެއްވުމަށް އެދިވަޑައިގަންނަވާ ކަމަށް ޖަލުގައި ހުންނެވި ކުރީގެ ނައިބު ރައީސް އަހުމަދު އަދީބު ވިދާޅުވެއްޖެ އެވެ.
ގާނޫނީ ވަކީލުން މެދުވެރިކުރައްވައި އަދީބު ފޮނުއްވި މެސެޖެއްގައި ވިދާޅުވީ އަލީ ހަމީދަށް އަވަސް ޝިފާއެއް ދެއްވުމަށް އެދި ދުއާ ކުރައްވާ ކަމަށެވެ.
ޖުޑިޝަލް ސާރވިސް ކޮމިޝަން(ޖޭއެސްސީ)ގެ ރައީސް ކަން ވެސް ކުރައްވާ އަލީ ހަމީދަށް ކުއްލި އާލާސްކަންފުޅެއްގައި އައިޖީއެމްއެޗް ހޮސްޕިޓަލުގައި އެޑްމިޓްކޮށް ފަރުވާދޭން ފެށީ މިދިޔަ ބުރާސްފަތި ދުވަހުގެ ހަވީރު އެވެ.
އަލީ ހަމީދަށް ފަރުވާދޭން ފެށީ މޭފުޅަށް އެރި ތަދަކާ ގުޅިގެންނެވެ. މައުލޫމާތު ލިބޭ ގޮތުގައި އެމަނިކުފާނުގެ ހާލުކޮޅު މިހާރު ދަނީ ރަނގަޅުވަމުންނެވެ.
އަލީ ހަމީދަށް އަވަސް ޝިފާއެއް ދެއްވުމަށް އަދީބު އެދިވަޑައިގަންނަވާފައިވާއިރު، އަދީބު ވެސް އުޅުއްވަނީ އާލާސްކަންފުޅާ އެވެ. ގްލުކޯމާ ޖެހިފައިވުމާއި، އެތެރެހަށީގެ ސިސްޓް އުފެދުމުގެ އިތުރުން ކިޑްނީގައި ހިލަ ހުރުމުގެ ސަބަބުން ފަރުވާ ހޯދުމަށް ރާއްޖެއިން ބޭރަށް ފޮނުވައިދިނުމަށް އަދީބުގެ އާއިލާއާއި ގާނޫނީ ވަކީލުން ދަނީ ސަރުކާރުގައި އެދެމުންނެވެ.
ނަމަވެސް، އަދީބު ފިއްލަވާފާނެ ކަމަށް ބުނެ ސަރުކާރުން ދަނީ އެ ހުއްދަ ދިނުމަށް އިންކާރު ކުރަމުންނެވެ.
