އިޓާލިއަން ލީގުގެ ޔުވެންޓަސްގެ ކޯޗުކަމުން  މެސިމޯ އަލެގްރީ ވަކި ނުކުރާނެ ކަމަށް އެ ކުލަބުގެ ޗީފް ފުޓްބޯލް އޮފިސަރ ފްރެންސެސްކޯ ކަލްވޯ ބުނެފި އެވެ.

ކަލްވޯ މިހެން ބުނީ އަލެގްރީގެ ކުރިމަގާ ގުޅޭ ގޮތުން އިޓަލީގެ މީޑިއާއަކުން ކުރި ސުވާލަކަށް ޖަވާބު ދެމުންނެވެ. އޭނާ ބުނީ ކުރިއަށް އޮތް ތަނުގައި ވެސް ޔުވެންޓަސްގެ ކޯޗުކަމުގެ މަގާމުގައި އަލެގްރީ ހުންނާނެކަން އެއީ ވަރަށް ސާފު ކަމެއް ކަމަށެވެ. ކަލްވޯ ފާހަގަ ކުރި ގޮތުގައި ޔުވެންޓަސް އިން އަލެގްރީ އެ ޓީމުގެ ކޯޗަކަށް ހަމަޖެއްސީ ހަތަރު އަހަރުގެ އެއްބަސްވުމެއްގެ ދަށުންނެވެ. އެހެންކަމުން، އަދި އެ އެއްބަސްވުމުގެ ދެބައިކުޅަ އެއްބައި ވެސް ފުރިހަމަ ނުވާތީ އޭނާ މަގާމުން ދުރުކުރުމުގެ ވިސްނުން ނުގެންގުޅޭ ކަމަށެވެ. ކަލްވޯ ބުނީ އަލެގްރީ ވަނީ ޔުވެންޓަސްއާއެކު 11 ތައްޓެއް ކާމިޔާބުކޮށްފައި ކަމަށާއި، އަނެއްކޮޅުން ޔުއެފާ ޗެމްޕިއަންސް ލީގުގެ ފައިނަލްގައި ދެ އަހަރު ކުޅެފައިވާތީ އެއީ ވެސް އަލެގްރީ ދުރުކުރުމުގެ ވާހަކަ ނުދެއްކޭނެ ސަބަބެެއް ކަމަށެވެ.

ޔުވެންޓަސްގެ ކޯޗުކަމާ އެންމެ ފުރަތަމަ އަލެގްރީ ހަވާލުވީ 2014 ވަނަ އަހަރު އެވެ. އެއަށްފަހު އޭނާ ކުލަބު ދޫކޮށްލީ 2019 ވަނަ އަހަރު އެވެ. އެ މުއްދަތުގައި އަލެގްރީ ވަނީ އެ ޓީމަށް 11 ތަށި ހޯދައިދީފަ އެވެ. އެއީ ފަސް އިޓާލިއަން ލީގާއި، ހަތަރު އިޓާލިއަން ކަޕް އަދި ދެ އިޓާލިއަން ސުޕަ ކަޕް އެވެ. ޔުވެންޓަސް އިން ވަކިވިތާ ދެ އަހަރު ފަހުން، ދެ ވަނަ ފަހަރަށް އަލެގްރީ އެ ޓީމާ ހަވާލުވީ 2021 ވަނަ އަހަރުގެ ޖުލައި މަހު އެވެ. ދެ ވަނަ ފަހަރަށް އޭނާ އެ ކުލަބާ ހަވާލުވީ ހަތަރު އަހަރުގެ އެއްބަސްވުމެއްގެ ދަށުންނެވެ.