ސަރުކާރުގެ ނިންމުމެއްގެ ގޮތުގައި އޮތީ ބައިނަލްއަގުވާމީ ގާނޫނުގެ ދަށުން ލިބެން އޮތް އެންމެ ބޮޑު މިން ރާއްޖެއަށް ހޯދުން - ޝާހިދު
28 އެޕްރީލު 2023 | ހުކުރު 17:53އެންމެ ވެލިފުކުއްގެ މިންވަރުވެސް ދޫ ނުދިނުން އެއީ ސަރުކާރުގެ ނިންމުން
އިން ވަކިކުރުމުގެ މައްސަލައިގައި ހޯދި ކާމިޔާބީއާއި ގުޅޭގޮތުން މިނިސްޓަރ ޝާހިދު ވާހަކަ ދައްކަވަނީ
ސަރުކާރުގެ ނިންމުމެއްގެ ގޮތުގައި އޮތީ ބައިނަލްއަގުވާމީ ގާނޫނުގެ ދަށުން ލިބެން އޮތް އެންމެ ބޮޑު މިން ރާއްޖެއަށް ހޯދުން ކަމަށް ފޮރިން މިނިސްޓަރ އަބްދުﷲ ޝާހިދު ވިދާޅުވެއްޖެއެވެ.
ރައީސް އޮފީހުގައި އޮތް ނޫސްވެރިންގެ ބައްދަލުމުގައި ވާހަކަދައްކަވަމުން މިނިސްޓަރ ޝާހިދު ވިދާޅުވީ މި ފާހަގަވެގެން މިދަނީ ރައީސުލްޖުމްހޫރިއްޔާގެ ރިޔާސަތުގެ ދަށުން ރާއްޖެއަށް ލިބުނު އެންމެ ބޮޑު އެއް ކާމިޔާބީ ލިބުނު ދުވަހުގެ ގޮތުގައި ކަމަށެވެ. ރާއްޖެ 1965 ވަނަ އަހަރު މިނިވަންވުމަށްފަހުގައި، ރާއްޖޭގެ އިން ކަނޑައެޅުމުގައި ބައިނަލްއަގުވާމީ އުސޫލުތަކާއި އިންޓަރނޭޝަނަލް ކަސްޓަމަރީ ލޯއާ އެއްގޮތްވާ ގޮތުގެ މަތިން 1976 ވަނަ އަހަރު ވަނީ އުތުރުގެ ބައުންޑަރީތައް ކަނޑައެޅިފައި ކަމަށެވެ.
ނަމަވެސް ތަފާތު ސަރުކާރުތަކުން އެކިއެކި މަސައްކަތް ކުރައްވާފައިވީކަމުގައި ވީނަމަވެސް، އެއްވެސް ސަރުކާރަކުން ދެކުނުގެ ބައުންޑަރީ ކަނޑައެޅުމުގެ މަސައްކަތް ނިންމާފައި ނުވާ ކަމަށެވެ. އަދި އެކަމުގެ ސަބަބުން ރާއްޖޭގެ އިގްތިސާދީ ހާއްސަ ސަރަހައްދަށް ބޭރުގެ ފަރާތްތަކުން ވަދެ، ރާއްޖޭގެ ސަރަހައްދުން ނުހައްގު ފައިދާތައް ބޭރުގެ ފަރާތްތަކުން ނަގަމުން ގެންދިޔަ ކަމަށެވެ.
މިނިސްޓަރ ޝާހިދު ވިދާޅުވީ ރާއްޖޭގެ ބަންޑާރަނައިބު ހުށަހެޅުއްވި ހުރިހާ ކަމެއް ރާއްޖެއަށް ކާމިޔާބުވެގެން ދިޔަ ކަމަށެވެ. އެއީ ދިވެހިރާއްޖެއަށާއި، ދިވެހި ރައްޔިތުންނަށް ލިބުނު ނަސްރެއް އަދި ފަތަހައެއް ކަމަށާއި، މި ސަރުކާރުގެ ދުރުވިސްނޭ ހާރިޖީ ސިޔާސަތު އަދި ރައީސްގެ ހާރިޖީ ސިޔާސަތުގެ ދަށުން ދުނިޔޭގެ އެންމެ މޮޅު ލޯޔަރުންލައްވާ ކުރެއްވި މަސައްކަތް ކާމިޔާބުވެގެން ގޮސްފައިވާ ކަމަށެވެ.
