އިންވަކިކުރުމުގެ މައްސަލައިގައި ޑރ. ޝަހީދުގެ ތައުރީފް ސަރުކާރަށް
28 އެޕްރީލު 2023 | ހުކުރު 18:06މި ހުކުމަކީ 2010 ވަނަ އަހަރުގެ ޖުލައި މަހު ރާއްޖެއިން ދައުވާކުރި، އަންކްލޯސްގެ އާޓިކަލްގެ 76 ގެ ދައުވާތަކާ ސީދާ ގުޅޭ ހުކުމެއް ނޫން
ކުރީގެ ފޮރިން މިނިސްޓަރ އަހުމަދު ޝަހީދު
ރާއްޖެއާއި ޗާގޮސް ސަރަހައްދުގެ އިން ކަނޑައެޅުމުގައި އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ (އިޓްލޮސް) ގައި ރާއްޖެއިން ހޯދި ކާމިޔާބަށް ކުރީގެ ފޮރިން މިނިސްޓަރު ޑރ. އަހުމަދު ޝަހީދު ތައުރީފު ކުރައްވައިފިއެވެ.
ރާއްޖޭގެ ކުރީގެ ފޮރިން މިނިސްޓަރުކަންވެސް ކުރައްވާފައިވާ ޝަހީދު ކުރެއްވި ޓްވީޓެއްގައި ވިދާޅުވީ ކަނޑުގެ އިމުގެ މައްސަލާގައި މޮރިޝަސްގެ ކަނޑުގެ ސަރަހައްދު ކަމަށް އެ ގައުމުން ވާކާލާތު ކުރާ ސަރަހައްދުން ފަހަތަށް ޖެހުމަށް ރައީސް އިބްރާހިމް މުހައްމަދު ޞާލިހު، މޮރިޝަސް އަށް ފޮނުއްވި ސިޓީފުޅާ އެއްގޮތަށް ކޯޓުން ރާއްޖޭގެ ކޮޅަށް ނިންމުމަކީ ކާމިޔާބެއް ކަމަށެވެ.
ޝަހީދު ވިދާޅުވީ އިޓްލޮސްގައި މުހިންމު ގިނަ ޕޮއިންޓްތަކެއް ރާއްޖޭގެ ކޮޅަށް ކާމިޔާބު ވުމުން ބަންޑާރަ ނާއިބު އިބްރާހިމް ރިފްއަތަށް މަރުހަބާ ވިދާޅުވާ ކަމަށެވެ. އަދި ރައީސް އިބްރާހިމް މުހައްމަދު ޞާލިހް މޮރިޝަސް އަށް ފޮނުއްވި ސިޓީއާ އެއްގޮތަށް ކޮސްޓް ރިކަވަރީ ކްލޭމްސް މޮރިޝަސް އިން ދޫކޮށްލުމުން ރައީސް އިބްރާހިމް މުހައްމަދު ޞާލިހަށް ތަހުނިޔާ ދަންނަވާ ކަމަށެވެ.
ޝަހީދު ވިދާޅުވީ މި މައްސަލައަކީ ސޯޝަލް މީޑިއާގައި ގިނަ ބަޔަކު ބުނަމުންދާ ވަރުގެ ސާދާ އަދި ސީދާ މައްސަލައެއް ނޫނެވެ. މި ހުކުމަކީ 2010 ވަނަ އަހަރުގެ ޖުލައި މަހު ރާއްޖެއިން ދައުވާކުރި، އަންކްލޯސްގެ އާޓިކަލްގެ 76 ގެ ދައުވާތަކާ ސީދާ ގުޅޭ ހުކުމެއް ނޫން ކަމަށެވެ.
ޝަހީދު ވަނީ ރާއްޖޭގެ އީއީޒެޑްގެ މައްސަލަތަކުގައި ދެން ހުރި ކަންކަމުގައި ވެސް ރާއްޖެއަށް ކާމިޔާބަށް އެދިވަޑައިގެންފައެވެ.
ރާއްޖެއާއި މޮރިޝަސްގެ ކަނޑުގެ ސަރަޙަދުން ފުށުއަރާ ސަރަޙައްދުގެ އިން ވަކި ކުރުމުގެ މައްސަލަ، ރާއްޖެއަށް ބޮޑު ބައި ލިބޭގޮތަށް، އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ (އިޓްލޮސްއިން) އިން ވަނީ ނިންމާފައެވެ.
އިޓްލޮސްއިން ނިންމި ނިންމުމުގައި ވަނީ ރާއްޖޭން ފާހަގަކުރި ނުކުތާތަކަށް ތާއީދުކޮށްފައެވެ. އިޓްލޮސްގެ ސްޕެޝަލް ޗޭމްބަރުން އިއްވި ނިންމުމުގައި ބުނީ، ތިލަ ދިޔަވަރުގައި ފެންނަ އޮންނަ ފަރަކުން، އިން ވަކިކުރުމަށްޓަކައި އިކުއިޑިސްޓަންސް ރޮނގު ދެމޭނެ އެއްވެސް ހަމައެއް ނެތް ކަމަށެވެ. އެއާއެކު މޮރިޝަސްއާ ދެކޮޅަށް މައްސަލަ ނިމުމުން، ދެގައުމުގެ ފުށުއަރާ ސަރަހައްދުން ރާއްޖެއަށް ވަނީ 4،687 އަކަކިލޯމީޓަރުގެ އިތުރު ސަރަހައްދެއް ކަށަވަރުވެފައެވެ.
