އެންމެ 12 އަހަރުގެ ޚާލިދުގެ އާދޭސް އަހާލުން ކީއްތޯއެވެ؟

ސޫދާންގެ އަސްކަރިއްޔާއާއި އެ ގައުމުގެ ޕެރަމިލިޓްރީ ރެޕިޑް ސަޕޯރޓް ފޯރސަސް (އާރްއެސްއެފް)އާ ދެމެދު އޭޕްރިލް 15 ވަނަ ދުވަހުން ފަށައިގެން ބަދަލު ކުރަމުންދާ ވަރުގަދަ ހަމަލާތަކަށް އަދިވެސް މަޑުޖެހުމެއް އައިސްފައެއް ނުވެއެވެ. ހަމަނުޖެހުންތައް ހުއްޓިދާނެކަމުގެ އިޝާރާތެއްވެސް ލިބިފައި ނުވާއިރު، ހަނގުރާމަ ގަދަވެފައިވާ ވެރިރަށް ޚާރްތޫމް ދޫކޮށް، އެހެން ސަރަހައްދުތަކަށް ހިޖުރަކުރާ މީހުންގެ އަދަދު އިންތިހާއެވެ. އެހެން ގައުމުތަކުން ސޫދާނަށް ހިޖުރަކޮށްގެން ދިރިއުޅެމުން ދިޔަ ގިނަ އަދަދެއްގެ ބަޔަކު، އެމީހުންގެ އުފަން ވަޒަނަށް އަނބުރާ ދާން ފަށާފައިވާއިރު، ޚާރްތޫމުގެ ރަށްވެހިންވެސް ދަނީ، ރައްކާތެރި މަންޒިލްތަކަށް ބަދަލުވަމުންނެވެ. އެފަދަ އެކަކީ، އުމުރުން އެންމެ 12 އަހަރުގެ ޚާލިދު ނިމްރުއެވެ.

އޭޕްރިލް 25 ވަނަ ދުވަހު، ސޫދާންގެ ސިއްހަތާބެހޭ ވުޒާރާއިން އާންމުކޮށްފައިވާ މައުލޫމާތަށް ބަލާއިރު، ހަމަލާ ބަދަލުކުރުންތަކުގައި މަރުވި މީހުންގެ އަދަދު ވަނީ 460ށް އަރާފައެވެ. ޒަޚަމްވީ މީހުންގެ އަދަދު އުޅެނީ 4000ށްވުރެ މަތީގައެވެ.

3 ދުވަސް ވަންދެން ޚާލިދު ބަންދުވެފައި ހުރީ އޭނާގެ ބައްޕަ މަސައްކަތްކުރާ ތަނުގެ ތެރޭގައެވެ. ކަރަންޓެއް، ފެނެއް އެތަނުގައި ނެތެވެ. ތާ އަބަދުމެ ހުންނަން ޖެހުނީ ބިރުވެރިކަމެއްގެ ތެރޭގައެވެ. ބަޑީގެ އަޑުފަށްގަނޑުން މުޅި ސަރަހައްދު ދިޔައީ ގުގުމަމުންނެވެ. ކަރަންޓު ނެތުމުގެ ސަބަބުން، އިންތިހާއަށް ހޫނުވަމުން ދިޔައިރު، ޚާލިދަށް ލޮލުފިޔަވެސް ޖަހައިނުލެވުނެވެ.

އިމާރާތުގައި ތިބި ބޮޑެތި މީހުންނާއެކު އެ އިމާރާތުން ބޭރަށް ނުކުތުމަށްފަހު ޚާލިދު ވަނީ އޭނާގެ ތަޖުރިބާތައް، ޗައިނާ ގްލޯބަލް ޓެލެވިޜަން ނެޓްވަރކް (ސީޖީޓީއެން)އާ ހިއްސާކޮށްފައެވެ. ޚާލިދު ބުނިގޮތުގައި އޭނާ ކުރާހާވެސް އުއްމީދަކީ ހަނގުރާމަ ނިމުމަކަށް އައުމެވެ.

ޚާލިދު ކިޔައިދިން ގޮތުގައި އޭނާއަކީ ލިބޭ ބަންދު ދުވަސްތަކުގައި، ބައްޕަ މަސައްކަތްކުރާ ތަނަށް ގޮސްއުޅޭ ކުއްޖެކެވެ. އެދުވަހުވެސް އޭނާ އެތަނަށް ދިޔައީ ބައްޕައާ އެކުގައެވެ. ފޮޓޯގްރާފަރުންނާއެކު، އެމީހުން ކުރާ މަސައްކަތްތައް ބަލައިލުމުގެ ބޭނުމުގައެވެ.

ޚާލިދު ބުނިގޮތުގައި އެމީހުން އަތުގައި ކައިބޮއެ ހަދާނެ އެއްޗެއްވެސް ނެތެވެ. ހުރިހާ ކޮޅަކުންހެން ފެންނަމުންދިޔައީ ބަޑީގެ ވަޒަންތައް ކަމަށް ޚާލިދު ސިފަކޮށްދިނެވެ.

އިމާރާތުގައި ތިބި ބޮޑެތި މީހުން، ކޮޓަރިއެއްގެތެރޭގައި ޚާލިދު ބަންދުކޮށް، ފޮރުވިއެވެ. އެއީ ޚާލިދުގެ ރައްކަލަކަށްޓަކައި ކުރި ކަމެކެވެ. ބޭރުގައި ކުރަމުންދިޔަ ހަނގުރާމަ ދިޔައީ ހައްތަހާ ގަދަވަމުންނެވެ. ވައިގެ މަގުން ބޮން އަޅަން ފެށުމާއެކު، އެންމެންގެ ނުތަނަވަސްކަމާއި ބިރު ބޮޑުވިއެވެ. 3 ވަނައަށް ވީ ދުވަހު، ހާލަތު ގޯހުން ގޯހަށް ހިނގައްޖެއެވެ. އިމާރާތް ދޫކޮށް ދިއުމަށް އެމީހުން ނިންމިއެވެ.

ނަމަވެސް އިމާރާތުން ބޭރަށް ނުކުމެ ބަލައިލިއިރު ކަމަކުދާކަށް ނެތެވެ. އެމީހުންގެ ކާރުތައް ވަނީ ހަލާކުކޮށްލާފައެވެ. މަގުމަތީގައި ދުއްވުންވެސް ރައްކާތެރި ކަމަކަށް ނުފެނުނެވެ. ނަމަވެސް މާ ބޮޑު ގެއްލުންތަކެއް ނުވެ އޮތް އެއް ކާރު އޮތުމުން، އެ ކާރުގެ ބޭނުން ހިފީއެވެ.

ސޫދާނުގެ އާބާދީގެ 4 ބައިކުޅަ 1 ބައި ހާ މީހުންނަކީ މިހާރުވެސް ކާބޯތަކެތީގެ އެހީތެރިކަމަށް ބަރޯސާވާ ބަޔަކަށް ވާއިރު، އެފްރިކާ ބައްރުގައި 3 ވަނައަށް އެންމެ ބޮޑު ގައުމުގެ ގޮތުގައި އޮތް ސޫދާން މިހާރު އޮތީ އިންސާނީ ކާރިސީ އަނދަވަޅެއްގެ ތުންފަތް މަތީގައެވެ.

ސޫދާންގެ މަސްރަހު ގޯހުން ގޯހަށް ގޮސްފައިވަނީ އެގައުމުގެ ވެރިކަންކުރާ ކައުންސިލްގެ މައްސަލާގައި، އެ ގައުމުގެ އަސްކަރީ ލީޑަރާއި އޭނާގެ ނައިބާ ދެމެދު އުފެދުނު ދެބަސްވުންތަކަކާ ގުޅިގެންނެވެ. އާރްއެސްއެފްގެ ލީޑަރު، މުހައްމަދު ހަމްދާން ޑަގަލޯ (އާންމު ނަމުން ދަންނަވާނަމަ ހިމިދްތީ) އާއި، ސޫދާން އަސްކަރިއްޔާގެ އިސްވެރިޔާ، ޖެނެރަލް އަބްދުލްފައްތާހު އަލްބުރުހާނާ ދެމެދު ހިނގަމުންދާ ކުރަމުންދާ ކުރިމަތިލުންތަކާއި ބަދަލު ކުރަމުންދާ ހަމަލާތަކުގެ ސަބަބުންނެވެ.