ކ. މާލެ
|
27 އޭޕްރިލް 2023 | ބުރާސްފަތި 17:43
އުމުރުން އެންމެ 12 އަހަރުގެ ޚާލިދު ނިމްރު މީޑިއާއާ ވާހަކަދައްކަނީ
ސޫދާންގެ ހަނގުރާމަ
އެންމެ 12 އަހަރުގެ ޚާލިދުގެ އާދޭސް އަހާލުން ކީއްތޯއެވެ؟
 
ޒަޚަމްވި މީހުންގެ އަދަދު އުޅެނީ 4000ށްވުރެ މަތީގައި
 
ހަމަލާ ބަދަލުކުރުންތަކުގައި މަރުވި މީހުންގެ އަދަދު ވަނީ 460ށް އަރާފައި

ސޫދާންގެ އަސްކަރިއްޔާއާއި އެ ގައުމުގެ ޕެރަމިލިޓްރީ ރެޕިޑް ސަޕޯރޓް ފޯރސަސް (އާރްއެސްއެފް)އާ ދެމެދު އޭޕްރިލް 15 ވަނަ ދުވަހުން ފަށައިގެން ބަދަލު ކުރަމުންދާ ވަރުގަދަ ހަމަލާތަކަށް އަދިވެސް މަޑުޖެހުމެއް އައިސްފައެއް ނުވެއެވެ. ހަމަނުޖެހުންތައް ހުއްޓިދާނެކަމުގެ އިޝާރާތެއްވެސް ލިބިފައި ނުވާއިރު، ހަނގުރާމަ ގަދަވެފައިވާ ވެރިރަށް ޚާރްތޫމް ދޫކޮށް، އެހެން ސަރަހައްދުތަކަށް ހިޖުރަކުރާ މީހުންގެ އަދަދު އިންތިހާއެވެ. އެހެން ގައުމުތަކުން ސޫދާނަށް ހިޖުރަކޮށްގެން ދިރިއުޅެމުން ދިޔަ ގިނަ އަދަދެއްގެ ބަޔަކު، އެމީހުންގެ އުފަން ވަޒަނަށް އަނބުރާ ދާން ފަށާފައިވާއިރު، ޚާރްތޫމުގެ ރަށްވެހިންވެސް ދަނީ، ރައްކާތެރި މަންޒިލްތަކަށް ބަދަލުވަމުންނެވެ. އެފަދަ އެކަކީ، އުމުރުން އެންމެ 12 އަހަރުގެ ޚާލިދު ނިމްރުއެވެ.

އޭޕްރިލް 25 ވަނަ ދުވަހު، ސޫދާންގެ ސިއްހަތާބެހޭ ވުޒާރާއިން އާންމުކޮށްފައިވާ މައުލޫމާތަށް ބަލާއިރު، ހަމަލާ ބަދަލުކުރުންތަކުގައި މަރުވި މީހުންގެ އަދަދު ވަނީ 460ށް އަރާފައެވެ. ޒަޚަމްވީ މީހުންގެ އަދަދު އުޅެނީ 4000ށްވުރެ މަތީގައެވެ.

3 ދުވަސް ވަންދެން ޚާލިދު ބަންދުވެފައި ހުރީ އޭނާގެ ބައްޕަ މަސައްކަތްކުރާ ތަނުގެ ތެރޭގައެވެ. ކަރަންޓެއް، ފެނެއް އެތަނުގައި ނެތެވެ. ތާ އަބަދުމެ ހުންނަން ޖެހުނީ ބިރުވެރިކަމެއްގެ ތެރޭގައެވެ. ބަޑީގެ އަޑުފަށްގަނޑުން މުޅި ސަރަހައްދު ދިޔައީ ގުގުމަމުންނެވެ. ކަރަންޓު ނެތުމުގެ ސަބަބުން، އިންތިހާއަށް ހޫނުވަމުން ދިޔައިރު، ޚާލިދަށް ލޮލުފިޔަވެސް ޖަހައިނުލެވުނެވެ.

އަހަރެންގެ ނަމަކީ ޚާލިދު ނިމްރު. އުމުރަކީ 12 އަހަރު. ބަންދު ދުވަސްތަކުގަ، ބައްޕަ މަސައްކަތް ކުރާތަނަށް ދަން އަހަރެން. އެދުވަހުވެސް ބައްޕައާ އެކީ ދިޔައީ ފޮޓޯގްރަފީގެ މަސައްކަތްތައް ކުރިއަށް ދާ ގޮތް ބަލާލަން. ފޮޓޯގްރާފަރުންގެ ކަންކަން ކުރިއަށް ދާ ގޮތް ބަލާލަން.
ޚާލިދު ނިމްރު؛ ސޫދާންގެ ކުޑަކުއްޖެއް

އިމާރާތުގައި ތިބި ބޮޑެތި މީހުންނާއެކު އެ އިމާރާތުން ބޭރަށް ނުކުތުމަށްފަހު ޚާލިދު ވަނީ އޭނާގެ ތަޖުރިބާތައް، ޗައިނާ ގްލޯބަލް ޓެލެވިޜަން ނެޓްވަރކް (ސީޖީޓީއެން)އާ ހިއްސާކޮށްފައެވެ. ޚާލިދު ބުނިގޮތުގައި އޭނާ ކުރާހާވެސް އުއްމީދަކީ ހަނގުރާމަ ނިމުމަކަށް އައުމެވެ.

ޚާލިދު ކިޔައިދިން ގޮތުގައި އޭނާއަކީ ލިބޭ ބަންދު ދުވަސްތަކުގައި، ބައްޕަ މަސައްކަތްކުރާ ތަނަށް ގޮސްއުޅޭ ކުއްޖެކެވެ. އެދުވަހުވެސް އޭނާ އެތަނަށް ދިޔައީ ބައްޕައާ އެކުގައެވެ. ފޮޓޯގްރާފަރުންނާއެކު، އެމީހުން ކުރާ މަސައްކަތްތައް ބަލައިލުމުގެ ބޭނުމުގައެވެ.

ޚާލިދު ބުނިގޮތުގައި އެމީހުން އަތުގައި ކައިބޮއެ ހަދާނެ އެއްޗެއްވެސް ނެތެވެ. ހުރިހާ ކޮޅަކުންހެން ފެންނަމުންދިޔައީ ބަޑީގެ ވަޒަންތައް ކަމަށް ޚާލިދު ސިފަކޮށްދިނެވެ.

އޭރު ގަޑިން ހެނދުނު 9 ޖަހާނީ. އަހަރެން އިނީ ވީޑިއޯ ގޭމް ކުޅެން. އެކަމަކު ކުއްލިއަކަށް އިވެންފެށީ ބަޑިޖަހާ އަޑު. ފުރަތަމަ ހީކުރީ އެއީ އާދައިގެ ކަމެއް ކަމަށް. ކުޑަދޮރު ކައިރިއަށް ޖެހިލިން، ޔަގީންކޮށްލަންވެގެން. އަޑު އައީ ވަރަށް ދުރުންކަން އެނގުނު. އެކަމަކު، އިސާހިތަކު ހާލަތު ބަދަލުވެއްޖެ. އާރްއެސްއެސްގެ ފައުޖު، އަހަރުމެން ތިބި އިމާރާތާ ވަރަށް ކައިރިއަށް އައީ. ހަމަ އެވަގުތު، އިމާރާތުން ކަރަންޓުވެސް ކަނޑާލި.
ޚާލިދު ނިމްރު؛ ސޫދާންގެ ކުޑަކުއްޖެއް

އިމާރާތުގައި ތިބި ބޮޑެތި މީހުން، ކޮޓަރިއެއްގެތެރޭގައި ޚާލިދު ބަންދުކޮށް، ފޮރުވިއެވެ. އެއީ ޚާލިދުގެ ރައްކަލަކަށްޓަކައި ކުރި ކަމެކެވެ. ބޭރުގައި ކުރަމުންދިޔަ ހަނގުރާމަ ދިޔައީ ހައްތަހާ ގަދަވަމުންނެވެ. ވައިގެ މަގުން ބޮން އަޅަން ފެށުމާއެކު، އެންމެންގެ ނުތަނަވަސްކަމާއި ބިރު ބޮޑުވިއެވެ. 3 ވަނައަށް ވީ ދުވަހު، ހާލަތު ގޯހުން ގޯހަށް ހިނގައްޖެއެވެ. އިމާރާތް ދޫކޮށް ދިއުމަށް އެމީހުން ނިންމިއެވެ.

އަހަރުމެން އަތަކު ކާނެ އެއްޗެއްވެސް ނެތް. ބޭރަކަށްވެސް ނުދެވޭ. ފެންވެސް ހުރީ ކަނޑާލާފަ. އާރްއެސްއެފްއިން އައި ވަރަށް ކައިރިއަށް. އަހަރުމެންގެ ވަށައިގެން ހަމަލާ ބަދަލު ކުރުންތައް ގަދަވި. އަހަރުމެން މަސައްކަތް ކުރިން ފިލޭތޯ. އިމާރާތް ދޫކޮށް ދާންވެސް ދިޔައިން. ވަޒަންތައް ދިޔައީ އުދުހެމުން. ހުރިހާތާކު އޮތީ ދުން. ބަޑިޖަހަމުން މަގުތަކުގަ މީހުން ދުވަމުން ދިޔައީ. ޚިޔާލަށްވެސް ނުގެނެވޭ ކަހަލަ ގޮތަކަށް އޭރުގެ ހާލަތު އޮތީ.
ޚާލިދު ނިމްރު؛ ސޫދާންގެ ކުޑަކުއްޖެއް

ނަމަވެސް އިމާރާތުން ބޭރަށް ނުކުމެ ބަލައިލިއިރު ކަމަކުދާކަށް ނެތެވެ. އެމީހުންގެ ކާރުތައް ވަނީ ހަލާކުކޮށްލާފައެވެ. މަގުމަތީގައި ދުއްވުންވެސް ރައްކާތެރި ކަމަކަށް ނުފެނުނެވެ. ނަމަވެސް މާ ބޮޑު ގެއްލުންތަކެއް ނުވެ އޮތް އެއް ކާރު އޮތުމުން، އެ ކާރުގެ ބޭނުން ހިފީއެވެ.

ސޫދާނުގެ އާބާދީގެ 4 ބައިކުޅަ 1 ބައި ހާ މީހުންނަކީ މިހާރުވެސް ކާބޯތަކެތީގެ އެހީތެރިކަމަށް ބަރޯސާވާ ބަޔަކަށް ވާއިރު، އެފްރިކާ ބައްރުގައި 3 ވަނައަށް އެންމެ ބޮޑު ގައުމުގެ ގޮތުގައި އޮތް ސޫދާން މިހާރު އޮތީ އިންސާނީ ކާރިސީ އަނދަވަޅެއްގެ ތުންފަތް މަތީގައެވެ.

ހަނގުރާމަ ދިގުލާ ހިނގައިދާނެތީ އަހަރެން ވަރަށް ބިރުގަނޭ. މައުސޫމު އެތައް ބައެއްގެ ފުރާނަ ގެއްލި، މުޅި ސޫދާން ސުންނާފަތި ވެދާނެތީ ވަރަށް ބިރު ގަނޭ... އަހަރެންގެ އުއްމީދަކީ މި ހަނގުރާމަ ނިމުން.
ޚާލިދު ނިމްރު؛ ސޫދާންގެ ކުޑަކުއްޖެއް

ސޫދާންގެ މަސްރަހު ގޯހުން ގޯހަށް ގޮސްފައިވަނީ އެގައުމުގެ ވެރިކަންކުރާ ކައުންސިލްގެ މައްސަލާގައި، އެ ގައުމުގެ އަސްކަރީ ލީޑަރާއި އޭނާގެ ނައިބާ ދެމެދު އުފެދުނު ދެބަސްވުންތަކަކާ ގުޅިގެންނެވެ. އާރްއެސްއެފްގެ ލީޑަރު، މުހައްމަދު ހަމްދާން ޑަގަލޯ (އާންމު ނަމުން ދަންނަވާނަމަ ހިމިދްތީ) އާއި، ސޫދާން އަސްކަރިއްޔާގެ އިސްވެރިޔާ، ޖެނެރަލް އަބްދުލްފައްތާހު އަލްބުރުހާނާ ދެމެދު ހިނގަމުންދާ ކުރަމުންދާ ކުރިމަތިލުންތަކާއި ބަދަލު ކުރަމުންދާ ހަމަލާތަކުގެ ސަބަބުންނެވެ.

އެންމެ ފަހުން އަޕްޑޭޓް ކުރީ: 3 ހަފްތާ ކުރިން
ރިވިއު ކުރީ: އައިޝަތު ރިޔާޒް
0%
0%
0%
25%
0%
75%
ކޮމެންޓް