މިހާތަނަށްވެސް އުޅެފައިވާނީ އަބުރުވެރިކަމާއެކު ކަމަށާއި، ދައުލަތުން ހެކި ހުށައަޅާފައިވަނީ އަބުރު ނަގާލުމުގެ ގޮތުންކަމަށް ކުރީގެ ރައީސް އަބްދުﷲ ޔާމީނު ވިދާޅުވެއްޖެއެވެ.
ޔާމީނު އެހެން ވިދާޅުވީ ކްރިމިނަލް ކޯޓުގައި މިހާރު ކުރިއަށްދާ ރ ފުއްގިރި ހިޔާނާތުގެ މައްސަލައިގެ ޝަރީއަތުގައެވެ.
ކްރިމިނަލް ކޯޓުގައި މި މައްސަލަ ބައްލަވަނީ ގާޒީ އަލީ ނަދީމެވެ.
ބުރާސްފަތި ދުވަހުގެ އަޑުއެހުމަކީ މި މައްސަލައިގެ ޝަރީއަތް ފެށުމަށް ބޭއްވި އަޑުއެހުމެކެވެ.
މި އަޑުއެހުމުގައި ޔާމީނުގެ ވަކީލު ވިދާޅުވީ، ހައިކޯޓުން ޝަރީއަތުގެ ކުރީގެ ހުށައެޅުންތަކާ ގުޅޭގޮތުން ނިންމި ނިންމުން 3 ނުކުތާއަކާއެކު ދިވެހިރާއްޖޭގެ ސުޕްރީމް ކޯޓުގައި އިސްތިއުނާފު ކޮށްފައިވާ ކަމަށާއި، ސުޕްރީމް ކޯޓުން ގޮތެއް ކަނޑައެޅެންދެން ދަށު ކޯޓުގެ ޝަރީއަތް މެދުޖައްސާލުމަށް ވަގުތީ އަމުރަކަށްވެސް އެދިފައިވާނެ ކަމަށެވެ.
އެއީ ބައެއް ހެކި ބަލައިގަތުމަށް އެދި ހުށައެޅި ނުކުތާއަކާއި، ދައުލަތުގެ ބައެއް ހެކި ބަަލައިނުގަތުމަށް އެދި ހުށައެޅި ނުކުތާއެއްގެ އިތުރުން، ހެކި ލިސްޓު ރިވިއުކޮށް ހެއްކާބެހޭ ޤާނޫނުގެ ދަށުން އަލުން ހުށައެޅުން ހުށައެޅުމާ ގުޅޭ ނުކުތާއެކެވެ.
ވުމާއެކު، ސުޕްރީމް ކޯޓުން ގޮތެއް ކަނޑައަޅަންދެން ޝަރީއަތުގެ އަޑުއެހުންތައް މަޑުޖައްސާލުމަށް ޔާމީނުގެ ފަރާތުން ވަނީ އެދިފައެވެ.
އޭގެ އިތުރުން، ބުރާސްފަތި ދުވަހު އިފްތިތާޙީ ބަޔާން ހުށައެޅުމަށް ދިފާއުން އަދި ތައްޔާރު ނޫންކަންވެސް ޔާމީނުގެ ވަކީލުން ފާހަގަ ކުރެއްވިއެވެ.
މި އަޑުއެހުމުގައި ޔާމީނު ވިދާޅުވީ، ދަށު ކޯޓުގައި މި ހިނގަމުންދާ މައްސަލައިގައި ވަކީލުންނާ މަޝްވަރާ ކުރެއްވުމުގެ އެކަށީގެންވާ ފުރުސަތު ލިބިވަޑައިނުގަންނަވާ ކަަމަށާއި، ރަމަޟާން މަހަށްވުމާއެކުވެސް އެކަމުގައި ގޮންޖެހުންތައް ދިމާވި ކަމަށެވެ.
އޭގެ އިތުރުން، މި މައްސަލައިގެ ޝަރީއަތް ލައިވް ކުރުމަށްވެސް ޔާމީނު އެދިވަޑައިގެންނެވިއެވެ. ޔާމީނު ވިދާޅުވީ، ފުލުހުން އެމަނިކުފާނު ފްރޭމް ކުރުމަށް މަސައްކަތް ކޮށްފައިވާ ކަމަށެވެ. އެކަންކަން ޝަރީއަތް ލައިވް ކުރުމުން އާންމުންނަށްވެސް ފެނިގެންދާނެކަމަށް ޔާމީނު ވިދާޅުވިއެވެ.
ޔާމީނު ވިދާޅުވީ، ދައުލަތުން ޝަފަހީ ހެކި ހުށައަޅާފައިވަނީ އަބުރު ނަގާލުމުގެ ގޮތުން ކަމަށެވެ. މިހާތަނަށްވެސް އުޅުއްވާފައިވާނީ އަބުރުވެރިކަމާއެކުކަމަށް ޔާމީނު ވިދާޅުވިއެވެ.
މި އަޑުއެހުމުގައި ވާހަކަ ދައްކަވަމުން ދައުލަތުގެ ވަކީލު ވިދާޅުވީ، މި މައްސަލައާ ގުޅިގެން ސުޕްރީމް ކޯޓަށް ހުށައަޅާފައިވާ އިސްތިއުނާފާ ގުޅޭ ތަފްސީލުތައް ދައުލަތަށް އަދި ލިބިފައިނުވާ ކަމަށެވެ. އަދި އެކަމުގައި ޝަރީއަތުން ނިންމާ ގޮތަކާމެދު ދައުލަތުގެ އިއުތިރާޒެއް ނެތްކަމަށް ދައުލަތުގެ ވަކީލު ވިދާޅުވިއެވެ.
އެކަމާ ގުޅޭގޮތުން ގާޒީ ވިދާޅުވީ، ސުޕްރީމް ކޯޓުގައި އިސްތިއުނާފު ކޮށްފައިވާ ނުކުތާތަކާއި ގުޅިގެން ސުޕްރީމް ކޯޓުން ކޮންމެ ނިންމުމެއް ނިންމި ނަމަވެސް، އެ ނިންމުމަކާ އެއްގޮތަށް ދަށު ކޯޓުގެ ޝަރީއަތް ކުރިއަށް ގެންދެވިދާނެ ކަމަށާއި، ޝަރީއަތް މަޑުޖައްސާލަން ޖެހޭ ފަދަ ސަބަބެއް ނެތް ކަމަށެވެ.
އޭގެ އިތުރުން، މި މައްސަލަ ކޯޓަށް ހުށައެޅިފައިވާތާ 3 އަހަރު ވެފައިވާއިރު، އިފްތިތާޙީ ބަޔާނަށް ތައްޔާރު ނުވެވިފައިވަނީ ކީއްވެތޯވެސް ގާޒީ ސުވާލު ކުރެއްވިއެވެ.
ގާޒީ ވަނީ ދެން އޮންނަ އަޑުއެހުމުގައި އިފްތިތާޙީ ބަޔާން ހުށައެޅުމަށް އިތުރު ފުރުސަތެއް ދެއްވުމަށް ނިންމަވާފައެވެ.
އޭގެ އިތުރުން، ބަންދުގައި ހުންނަ ފަރާތްތަކަށް ވަކީލުންނާ ބައްދަލުކުރުމަށް އެކަށީގެންވާ ވަގުތާއި ފުރުސަތު ލިބޭކަން ދައުލަތުން ކަށަވަރު ކުރުމަށްވެސް ގާޒީ ވަނީ ދައުލަތުގެ ވަކީލަށް ދަންނަވާފައެވެ.
ގާޒީ އަލީ ނަދީމް ވިދާޅުވީ، ހެކިބަސް ނެގުމުގެ އަޑުއެހުންތައް ލައިވް ނުކުރައްވާނެ ކަމަށާއި، އެއީ ހެއްކަށް ނުފޫޒު ފޯރުވުމުގެ ފުރުސަތު އޮތްކަމަށް ދެކިލައްވާތީ ކަމަށެވެ. ނަމަވެސް ހެކިބަސް ނަގާ ނިމުމުން އަޑުއެހުންތައް ލައިވް ކުރައްވާނެކަމަށް ގާޒީ ވިދާޅުވިއެވެ.
އެހެންނަމަވެސް ޔާމީނުގެ އެދިލެއްވުމުގެ މަތިން އެ ނިންމުން އަދިވެސް މުރާޖައާ ކުރައްވާނެކަމަށް ގާޒީ ވިދާޅުވިއެވެ.
ދެން މި މައްސަލައިގެ އަޑުއެހުމެއް އޮންނާނީ އޭޕްރީލް މަހުގެ 30 ވަނަ ދުވަހުއެވެ.
