ސްޓޯމް ވޯޓަރ މެނޭޖްމެންޓް ސިސްޓަމް އަޕްގްރޭޑްކުރުމުގެ މަޝްވަރާތައް ކުރިއަށް އެބަދޭ: ޝާހް
ސްޓޯމް ވޯޓަރ މެނޭޖްމެންޓް ސިސްޓަމްގެ އަގުތައް މިނިސްޓްރީ އަށް ވަނީ ފޮނުވާފައި
އެމްޑަބްލިޔުއެސްސީގެ އެމްޑީ ހަސަން ޝާހު
މާލޭގެ ސްޓޯމް ވޯޓަރ ސިސްޓަމް އަޕްގްރޭޑްކުރުމަށް ކުރަން ޖެހޭ މަސައްކަތް ކުރުމުގެ މަޝްވަރާތައް މިހާރުވެސް ކުރިއަށް ދާ ކަމަށް މޯލްޑިވްސް ވޯޓަރ އެންޑް ސްވަރޭޖް ކޮމްޕެނީ (އެމްޑަބްލިއުއެސްސީ)ގެ މެނޭޖިން ޑިރެކްޓަރު ހަސަން ޝާހް ވިދާޅުވެއްޖެއެވެ.
ޝާހު އެފަދައިން ވިދާޅުވީ ރާއްޖެޓީވީގެ ފަލަސުރުޚީ ޕްރޮގްރާމްގައި ވާހަކަދައްކަވަމުންނެވެ. އޭނާ ވިދާޅުވީ މާލޭގެ ސްޓޯމް ވޯޓަރ ސިސްޓަމްގެ ޑިޒައިން އިތުރަށް ފުޅާކޮށް ފުރިހަމަކުރަން ޖެހޭކަމަށެވެ. އޭނާ ވިދާޅުވީ މާލޭގެ ސްޓޯމް ވޯޓަރ ސިސްޓަމް އަޕްގްރޭޑްކޮށްފައި ވަނީ ކުރީގެ ރައީސް އަބްދުﷲ ޔާމީންގެ ވެރިކަމުގައި އަމީނީ މަގުގެ މާފަންނުކޮޅާ ވީ ދިމާއިން ފެންބޮޑުވާ މަައްސަލައަށް ވަގުތީގޮތުން ހައްލެއް ހޯދުމުގެ ގޮތުން ކަމަށެވެ. އެމްޑަބްލިއުއެސްސީން ޑިޒައިން އެންޑް ބިލްޑް އުސޫލުން އެ މަސައްކަތްކޮށްދިނީ ހައުސިން މިނިސްޓްރީން އެޕްރޫވްކޮށް ތަންފީޒްކުރާ ގޮތަށް ކަމަށް ވެސް ވިދާޅުވިއެވެ. އަދި އެ ޑިޒައިން ކުރި އިރާއި މިހާރާއި އަޅާ ބަލާއިރު ގިނަ ބަދަލުތަކެއް މާލެ އަށް އައިސްފައިވާ ކަމަށް އޭނާ ވިދާޅުވިއެވެ.
އޭރު އެ ނިޒާމުގެ ދަށުން އެކުލަވާލާފައިވާ ޕަމްޕްތައް މިހާރުވެސް މަސައްކަތް ކުރަމުންދާ ކަމަށާއި އެ ނިޒާމް އެކުލަވާލާފައި ވަނީ ފެންބޮޑުވާތާ ދެ ގަޑިއިރު ތެރޭގައި ފެން ހިންދާ ގޮތަށް ކަަމަށް ވިދާޅުވިއެވެ. އެ ޕަމްޕުތަކަކީ އޮޓޮމެޓިކް ޕަމްޕްތަކެއް ކަަމަށް ވީނަމަވެސް އެއީ 9 ކިލޯވޯޓުގެ ޕަމްޕަށް ވުމުން، ފެން ބޮޑުވުމުގެ މައްސަލައަށް އެންމެ އެކަށީގެންވާ ހައްލު ނުލިބޭކަމަށް އޭނާ ވިދާޅުވިއެވެ. އެ ނިޒާމް ބަދަލުކޮށް ކެޕޭސިޓީ އިތުރުކުރަންޖެހޭ ކަމަށާއި، ޑިޒައިނުގެ ނިޒާމަށްވެސް ބަދަލު ގެންނަންޖެހޭ ކަމަށް ޝާހު ވިދާޅުވިއެވެ.
ޝާހު ވިދާޅުވީ ފެންބޮޑުވުން ހައްލުކުރުމަށްޓަކައި ކުރާ މަސައްކަތުގެ ތެރެއިން ސްޓޯމް ވޯޓަރ މެނޭޖްމެންޓް ސިސްޓަމްގެ އެއްބަސްވުން އައުކުރުމުގެ މަސައްކަތް ހިމެނޭ ކަމަށެވެ. މިހާރު އެކަމަށް ބޭނުންވާ އަގުތަށް މިނިސްޓްރީ އަށް ފޮނުވާފައިވާ ކަމަށް ވެސް ވިދާޅުވިއެވެ. މީގެ އިތުރުން އާދަޔާ ޚިލާފަށް ގިނައިން ވާރޭ ވެހިއްޖެ ނަމަ ޑިޒާސްޓަރ މެނޭޖްކުރާ އިދާރާތަކުން ތައްޔާރުވެ ތިބެން ޖެހޭ ކަމެއް ކަމަށާއި އެ ހޭލުންތެރިކަން ވަރަށް ބޮޑަށް އިތުރުވެފައިވާ ކަމަށް ޝާހު ވިދާޅުވިއެވެ.
