އަލް މަޝްއަރު ހައްޖު އެންޑް އުމްރާ ގްރޫޕުން އުމްރާއަށް ދިޔަ އުމްރާވެރިން ބުދަ ދުވަހުން ފެށިގެން ރާއްޖެ އަންނާނެ ކަަމަށް އިސްލާމިކް މިނިސްޓްރީން ބުނެފިއެވެ.

އިސްލާމިކް މިނިސްޓްރީން ބުނީ އަލް މަޝްއަރު ހައްޖު އެންޑް އުމްރާ ގްރޫޕުގެ ހަވާލުގައި 1444 ވަނަ އަހަރު ރަމަޟާންމަހު އުމްރާއަށް ދިޔަ 207 އުމްރާވެރިންގެ މިއަދުން ފެށިގެން ރާއްޖެ އަންނަން ފަށާނެކަމަށް އެ ކުންފުނިން މިނިސްޓްރީއަށް މައުލޫމާތު ދީފައިވާ ކަމަށެވެ.

އުމްރާވެރިން ރާއްޖެއަށް އައުމަށް ހަމަޖެހިފައިވާ ގޮތަށް ބަލާއިރު، 26 އޭޕްރީލް ގައި 8 އުމްރާވެރިން، 27 އޭޕްރީލް ގައި 130 އުމްރާވެރިން، 28 އޭޕްރީލް ގައި 39 އުމްރާވެރިން އަދި 29 އޭޕްރީލް ގައި 30 އުމްރާވެރިން ރާއްޖެއަށް އަންނާނެ ކަމަށެވެ.

އަލް މަޝްއަރު ހައްޖު އެންޑް އުމްރާ ގްރޫޕުން އުމްރާ އަށް ދިޔަ މީހުން ބުދަ ދުވަހުން ފެށިގެން ރާއްޖެ އަންނަން ފަށާފައިވާއިރު، އެ ގުރޫޕްގެ ފަރާތުން އުމްރާއަށް ދިޔަ އުމްރާވެރިންނަށް ރާއްޖެއަށް އައުމަށް ދަތިކަން ދިމާވީ އެ ގުރޫޕުން މީހުންގެ ފްލައިޓް ޗާޓަރު ކުރި ޓްރެވަލް އެޖެންސީއަށް ދޭން ޖެހޭ ފައިސާ އަދިވެސް ނުދައްކާތީ އެ މީހުން ރާއްޖެ ގެނެސްދެވެން ނެތް ކަމަށް އެ ކުންފުނިން ބުނުމާ ގުޅިގެންނެވެ.

މިއަހަރުގެ ރަމަޟާން މަހު އަލް މަޝްއަރު އުމްރާ ގުރޫޕުގެ ފަރާތުން އުމްރާއަށް މީހުން ގެންގޮސްފައިވަނީ 36،500 ރުފިޔާށެވެ. މި ޕެކޭޖްގައި މައްކާ އާއި މަދީނާގައި ތިބުމުގެ ހަރަދާއި ދެކޮޅު ޓިކެޓާއި ވިސާ އާއި ދަތުރުފަތުރު އަދި ތިން އިރުގެ ކެއުމުގެ ހަރަދު ހިމެނެއެވެ.