ދެވޭނެ އެންމެ ބޮޑު މުސާރަ ކަނޑައަޅަން ކުލަބުތަކުން އެއްބަސްވެއްޖެ: ޔޫއޭފާ

ފުޓްބޯޅަ ކުލަބުތަކުން ކުޅުންތެރިންނަށްދޭ މުސާރަ ޔޫއޭފާއިން ކަނޑައަޅާ ވަރެއްގައި ހިފެހެއްޓުމަށް ޔޫރަޕުގެ ހުރިހާ ކުލަބަކުން އެއްބަސްވެއްޖެ ކަމަށް ޔޫރަޕުގެ ފުޓްބޯޅަ ޖަމިއްޔާ ޔޫއޭފާއިން ބުނެފި އެވެ.

ދުނިޔޭގެ އެންމެ މުއްސަނދި ލީގުތަކާއި ޓީމުތައް ހިމެނޭ ޔޫއޭފާގެ ރައީސް އެލެގްޒެންޑަރ ސެފެރިން ވިދާޅުވީ ކުޅުންތެރިންނަށް ދެވޭ އެންމެ ބޮޑު މުސާރަ ވީ އެންމެ އަވަހަކަށް ކަނޑައަޅަން ބޭނުންވާ ކަމަށެވެ.  އަދި މިކަމާ ގުޅޭ ގޮތުން ޔޫރަޕިއަން ކަމިޝަންއާ ދާދި ފަހުން މަޝްވަރާ ކުރި ކަމަށެވެ.

ކުޅުންތެރިންގެ މުސާރަ ވަކި އިމެއްގައި ހިފަހައްޓަންޖެހޭ ކަމަށް ފީފާގެ ރައީސް ޖިއާނީ އިންފަންޓީނޯ ވެސް ވަނީ މިދިޔަ މާޗު މަހު ވިދާޅުވެފަ އެވެ. އަދި އެކަމަށް ފެޑަރޭޝަންތަކުން މަސައްކަތް ކުރުމަށް އޭނާ ވަނީ ގޮވާލައިފަ އެވެ.

ދެވޭނެ އެންމެ މަތީ މުސާރަ ކަނޑައަޅާނީ ކުލަބުތަކާއި ޔޫއޭފާއިން މަޝްވަރާކޮށްގެން ކަމަށް ވެސް ސެފެރިން ވިދާޅުވި އެވެ.

ޔޫއޭފާއިން ވަނީ މި ސީޒަނުން ފެށިގެން ކޮންމެ ކުލަބެއްގެ ވެސް އާމްދަނީގެ 70 ޕަސެންޓަށްވުރެ ބޮޑު އަދަދެއް މުސާރަ އާއި ކުޅުންތެރިން ގަތުމަށް ހަރަދު ނުކުރެވޭ ގޮތަށް ގަވާއިދެއް ހަދައިފަ އެވެ. ނަމަވެސް ސެފެރިން ވިދާޅުވީ މިއީ ދާއިމީ ހައްލެއް ހޯދޭނެ ގަވާއިދެއްނޫން ކަމަށެވެ.

ޔޫރަޕުގެ ލީގުތަކުގައި ކުޅުންތެރިންގެ މުސާރަތައް އަތްނުފޯރާ ފަށަށް އަރައިގެންދާއިރު މުއްސަނދި ކުލަބުތަކާއި އާދައިގެ ކުލަބުތަގެ ތަފާތު ދަނީ ވަރަށް ބޮޑަށް ފުޅާވަމުންނެވެ. އަދި މިހާރު އެމެރިކާ އާއި އޭޝިއާގެ މުއްސަނދި ގައުމުތަކުގެ ލީގުތަކުން ދަނީ ދުނިޔޭގެ މޮޅު ކުޅުންތެރިންނަށް އެހެން ބަޔަކަށް އަތްނުފޯރާވަރުގެ މުސާރަތައް ހުށަހަޅަމުންނެވެ.