މި ސީޒަންގައި މެންޗެސްޓަރ ސިޓީގެ އާލިން ހާލަންޑާ އެހެން އެއްވެސް ކުޅުންތެރިޔަކާ އަޅާ ނުކިޔޭނެ ކަމަށް އާސެނަލްގެ ކޯޗު މިކޭލް އާޓެޓާ ބުނެފި އެވެ.
އާޓެޓާ މިހެން ބުނީ އިނގިރޭސި ޕްރިމިއާ ލީގުގައި މެންޗެސްޓަރ ސިޓީގެ އިއްތިހާދު ސްޓޭޑިއަމްގައި އެ ޓީމާ ދެކޮޅަށް ނިކުންނަ މެެޗުގެ ކުރިން އޮތް ޕްރެސް ކޮންފަރެންސްގަ އެވެ. އޭނާ ބުނީ، މި ސީޒަނުގައި ހާލަންޑުގެ ކުޅުމާއި، އޭނާ ލަނޑު ޖަހާފައިވާ އަދަދުތަކަަށް ބަލާއިރު ވެސް އެހެން ކުޅުންތެރިޔަކާ އަޅާ ކިޔެން ނެތް ކަމަށެވެ. އާޓެޓާ ބުނީ ހާލަންޑަށް އެ ފެންވަރުގެ މޮޅު ކުޅުމެއް ދެއްކެނީ އެވަރުގެ ސެޓަޕެއް އޮތުމުން ކަމަށެވެ. އެގޮތުން އޭނާ ވަށައިގެން ކުޅެން ތިބި ކުޅުންތެރިން ކުރާ މަސައްކަތާއި، އޭނާ އަށް އިރުޝާދު ދޭން ހުންނަ ކޯޗުގެ މޮޅުކަން އާޓެޓާ ވަނީ ފާހަގަކޮށްފަ އެވެ. އެހެންކަމުން ހާލަންޑުގެ ފެންވަރާއި، ކޮލެޓީ އަކީ ކޮންމެ މީހަކަށް ވެސް އިނގޭނެ އެއްޗެއް ކަމަށް އާޓެޓާ ވަނީ ބުނެފަ އެވެ. އެކަން ފާހަގަ ކުރަމުން އާޓެޓާ ބުނީ ސިޓީ އަކީ ވަރަށް މޮޅު ޓީމެއް ކަމަށާއި، އަމުދުން ހާލަންޑާ އެކު އެމީހުންނަށް ތަފާތު އެތައް ކަމެއް ކުރެވޭނެ ކަމަށެވެ. އޭނާ ދެކޭ ގޮތުގައި ސިޓީ އަކީ ފިޒިކަލީ ވެސް ވަރަށް ވަރުގަދަ ޓީމެއް ކަމަށާއި، ބޯޅަ އާއެކު ހުސް ތަންތަން ހޯދައިގެން އަވަހަށް ލަނޑު ޖަހައިގެން މެޗު އަނބުރާލުމުގެ ފެންވަރު ސިޓީގައި އޮންނާނެ ކަމަށް އާޓެޓާ ވަނީ ބުނެފަ އެވެ.
ނަންބަރުތަކަށް ބެލި ނަމަވެސް، އެއްވެސް ކުޅުންތެރިޔަކާ އަޅާ ކިޔޭކަށް ނެތް. އޭނާ (ހާލަންޑު) އަށް އެ ފެންވަރުގައި ކުޅެވެނީ އޭނާ އަށް އެކަމަށް އެކަށީގެންވާ ފެންވަރުގެ ސެޓަޕެއް އޮތުމުން. އޭނާ ވަށައިގެން ކުޅެން ތިބި ކުޅުންތެރިން، އޭނާ އަށް އިރުޝާދު ދޭ ކޯޗު. ކޮންމެ ގޮތެއް ވިޔަސް އެންމެނަށް އިނގޭނެ އޭނާގެ ހުރި ފެންވަރު.މިކޭލް އާޓެޓާ / އާސެނަލްގެ ކޯޗު
މީގެ އިތުރުން އާޓެޓާ ބުނީ އާސެނަލުން ތައްޔާރު ވަނީ ސިޓީގެ ފަރާތުން ކުރިމަތިވާނެ ދުށްތުރާތައް ދެނެގަނެގެން ކަމަށާއި، އަނެއްކޮޅުން ސިޓީގެ ބަލި ފައިތައް ވެސް ދެނެގަނެގެން ކަމަށެވެ. ސިޓީ ކަހަލަ ޓީމަކާ ދެކޮޅަށް ކުޅޭއިރު، އެކަން ފެށޭނީ ގޯލް ކީޕަރާ ހަމައިން ކަމަށާއި، ކީޕަރުގެ އަތުގައި ބޯޅަ އޮންނައިރު ވެސް ނުރައްކާވާނެ މިންވަރު އިނގޭނެ ކަމަށެވެ. ސިޓީއާ ދެކޮޅަށް ކުޅޭ މެޗުގައި އެންމެ ކުދިކުދި ކަންކަން ވެސް ކޮންޓްރޯލް ކުރުމަށް މަސައްކަތް ކުރަން ޖެހޭނެކަން ފާހަގަކޮށް އާޓެޓާ ބުނީ، އާސެނަލުން ފޯކަސް ކުރަން ޖެހޭނީ އެމީހުންގެ ކުޅުން ދައްކަން ކަމަށެވެ. އާޓެޓާ ބުނީ އެ މެޗަކީ އާސެނަލަށް ވެސް ވަރަށް މުހިންމު މެޗެއް ކަމަށާއި، އެއީ ތަފާތު ރެޔަކަށް ވާނެ ކަމަށެވެ. ނަމަވެސް އޭނާ ބުނީ އެ މެޗަކީ ލީގު ޗެމްޕިއަނުން ކަނޑައެޅޭނެ މެޗުގެ ގޮތުގައި ނުދެކޭ ކަމަށެވެ. އެހެންކަމުން އެ މެޗުން އާސެނަލް މޮޅުވި ނަމަވެސް، ލީގު ކަށަވަރު ނުވާނެ ކަމަށް އާޓެޓާ ވަނީ ބުނެފަ އެވެ.
އާސެނަލް މިވަގުތު އޮތީ ލީގު ތާވަލްގެ އެއް ވަނައިގަ އެވެ. އެއީ ސިޓީއަށް ވުރެ ދެ މެޗު އިތުރަށް ކުޅެގެންނެވެ. ދެ ޓީމުގެ ދެމެދު ފަސް ޕޮއިންޓުގެ ފަރަގު އޮތް އިރު، ލީގު ހޯދުމުގެ އަމިއްލަ ބާރު ދަމަހައްޓަން ބޭނުންވާނަމަ އާސެނަލަށް ޖެހޭނީ މެޗުން މޮޅުވާށެވެ. އަނެއްކޮޅުން އާސެނަލްގެ މައްޗަށް ކުރި ހޯދައިގެން ލީގު ދިފާއު ކުރުމުގެ އުންމީދު ސިޓީ އަށް ބޮޑުވާނެ އެވެ.
