ބަސަރާ ފެހިކުރަން ހިތްވަރުދިނުމަށް މަލުގެ ފެއަރއެއް

ހަނަފަސްވަމުންދާ ބަސަރާ ފެހިކުރުމަށް މީހުންނަށް ހިތްވަރު ދިނުމުގެ ގޮތުން މަލުގެ ފެއަރއެއް ބާއްވައިފިއެވެ.

މަލުގެ ފެއަރގެ ފެންނަނީ އެކި ވައްތަރުގެ ފިނިފެންމަލާއި، ބަގީޗާތަކެވެ. ފްލަވަރ ފެއަރ ނުވަތަ މަލުގެ ފެއަރގެ ނަމުން ނަންދީގެން ކުރިއަށް ގެންދާ މިފަދަ ފަސްވަނަ ފެއަރގެ އެއްމަގުސަދަކީ އާންމުން އެމީހުންގެ ބަގީޗާތައް ފެހިކުރުމަށް ހިތްވަރުދިނުމެވެ.

ބަސަރާގެ ރައްޔިތެއްކަމުގައިވާ ފާތިމާ އަލީ ބުނީ, ފުރަތަމަ ފެނުނީ ފޮޓޯއެއް ކަމަށެވެ. އަދި ބައެއް މީހުންގެ ފަރާތުން އެވާހަކަ އަޑު އިވުނު ކަމަށެވެ. އަދި އެތަނަށް ދިޔަ ކަމަށާއި، އެތަން ވަރަށް ރީތި ކަމަށެވެ. ވަށައިގެން މާތަކުން އޮތީ ފުރިފައި ކަމަށާއި، ބަލާލަން ރީތި އެތައް ތަނެއް އެތާގައި ހުރި ކަމަށެވެ.

ކުރިން ޓީޗަރަކަށް އުޅުނު ހަސަން އަލް ދަހެރް ބުނީ ގިނައިން ގަސް އިންދާ ވަރަކަށް ފެހިކަން ގިނަވާނެ ކަމަށާއި, ކޮންކްރީޓުން ކަންކަން ކުރުން ހުއްޓާލަން ވެއްޖެކަމަށެވެ. އަދި ގަލާއި، ހިލައިން މަގުތައް ހެދުމާއި ސިމެންތި ބޭނުންކުރުން ހުއްޓާލަންޖެހޭ ކަމަށެވެ. އޭނާގެ އުއްމީދަކީ ކަމާބެހޭ ފަރާތްތަކުން އެމީހުން ގަސް އިންދުމަށް ކުރަމުންދާ މަސައްކަތް ބަލައިގަތުމެވެ.

މޫސުމަށް އަންނަ ބަދަލުތަކާއި، ހަނގުރާމައާއި ތެލުގެ ކާރުޚާނާތައް, ބަސަރާ ހަނަފަސްވުމުގެ ސަބަބެއް ކަމުގައި ވެގެންދިޔައެވެ. ބަސަރާއަކީ މީގެ ކުރިން އެތަނުގެ ބަގީޗާތަކާއި، މޭވާގެ ބަގީޗާތަކާއި ކަދުރު ރުއްތަކުން މަޝްހޫރުވެފައިވާ ތަނެއް ކަމަށް އެ ޕްރޮވިންސްގެ އެގްރިކަލްޗަރ ޑައިރެކްޓަރޭޓް ފާހަގަކުރައްވައެވެ.

ކަޒެމް ވިދާޅުވީ ބަސަރާ ހިމެނޭ ސަރަހައްދަކީ ދަނޑުވެރިކަމަށް ޚާއްސަ ސަރަހައްދެއް ކަމަށެވެ. އަދި އެ މާހައުލަކީ އެންމެންނަށް ވެސް ހިތްގައިމު މާހައުލެއް ކަމަށެވެ. ނަމަވެސް ހަނަފަސްވާން ދިމާވީ ތެލުގެ ސަބަބުންނާއި، ފެން ލޮނުވުމުގެ އިތުރުން، ހަނގުރާމަ އަދި އިތުރު އެކި ސަބަބުތަކާއި ގުޅިގެން ކަމަށެވެ. ހަނަފަސްވުމުގެ ސަބަބުން ބަސަރާގައި ވަރަށް ބޮޑަށް ހޫނުގަދަވެއެވެ. އަދި އެ މާހައުލަކީ ވަރަށް އުނދަގޫ މާހައުލަކަށް ވެފައިވާ އިރު، މިކަން ހައްލުކުރެވެން އޮތީ ގަސް އިންދައިގެންކަމަށް ކަޒެމް ވިދާޅުވިއެވެ.

މަލުގެ އިތުރުން މި ފެއަރގައި އެކި ވައްތަރުގެ ގަސް އަދި ހޫނު މޫސުމުގައި ހެއްދޭ ވައްތަރުގެ ގަސްތައް ވެސް ބަހައްޓާފައި ހުއްޓެވެ. މި ހަރަކާތުގައި 30ށްވުރެ ގިނަ ކުންފުނިން ބައިވެރިވެއެވެ.

ކަޒެމް ވިދާޅުވީ ދުނިޔެ ފެހިކުރުމުން އިންސާނުންނަށް ނަފްސާނީގޮތުން ހެޔޮ އަސަރުތައް ކުރާ ކަމަށެވެ. އޭނާ ވިދާޅުވީ ގަސް ހައްދަން ބޭނުންވާ މީހުންނަށް އެފުރުސަތުވެސް އެބައޮތް ކަމަށެވެ. އަދި ހަމައެކަނި މާ ހެއްދުން އެކަންޏެއް ނޫން ކަމަށާއި, މޭވާ ގަސްތައް ވެސް ބަގީޗާގައި ހެއްދޭނެ ކަމަށާއި، އެއިން މޭވާ ލިބޭނެ ކަމަށެވެ.

ގަސް ހެއްދުމުން ގަދަ ވައިން ސަލާމަތްވާނެކަން ކަޒެމް ފާހަގަކުރެއްވިއެވެ. އަދި މި ފެއަރ އާންމުންނަށް ރަމަޟާން މަހުގައި އެއްކޮށް ހުޅުވާލެވިފައިވާ ކަމަށާއި، އެތަނަށް އަންނަ ފަރާތްތަކަށް މާ ގަނެ އެތަނުގައި ހިތްހަމަޖައްސާލައި ވަގުތު ހޭދަކުރެވޭނެކަމަށެވެ.