"ފެހި ކޮންކްރީޓް" ހަކަތައިގެ ހޭދައަށް ލުޔެއް ލިބިދާނެބާ؟

އިރުގެ އަވިން ލިއްބައިދޭ ހަކަތަ ރައްކާކޮށް، ރޭގަނޑުގެ ވަގުތުގައި އޭގެ ޒާތުގައި އަމިއްލައަށް ދިއްލާލަދޭ ކޮންކްރީޓެއް، މިޞްރުގެ ކިޔަވާ ކުދިންތަކެއް އީޖާދު ކޮށްފިއެވެ.

މިއީ އުމްރާނީ ބިނާވެށީގެ ތަރައްގީގެ މަސައްކަތްތަކުގައި ބޭނުން ކުރާ ސާމާނަކީ ތިމާވެއްޓާ ރައްޓެހި ސާމާނު ކަމުގައި ހެދުމަށް ހިފާފައި ވާ އަމާޒުގެ ތެރެއިން ކުރިއަށް ގެންދިޔަ މަޝްރޫއެއްގެ ނަތީޖާއެވެ.

ދި އެމެރިކަން ޔުނިވާސިޓީ އިން ކައިރޯ (އޭޔޫސީ)ގައި ކޮންޓްރަކްޝަން އިންޖިނޭރިންގގެ ރޮނގުން ކިޔަވަމުން ދިޔަ 4 ދަރިވަރެއްގެ ދަސްވެނިވުމުގެ ތީސީސްއެއްގެ ގޮތުގައި ތައްޔާރު ކުރި މިމަޝްރޫއަކީ، ދެމެހެއްޓެނިވި ތަރައްގީއާ ކުރިއެރުމަށް ކުރި ހިދުމަތެއް ކަމަށް އެ ދަރިވަރުން ބުނެއެވެ.

ދުވާލުގެ ވަގުތަކުގައި ލިއްބައިދޭ އިރުގެ އަވިން ހަކަތަ ރައްކާ ކޮށް، ރޭގަނޑުގެ ވަގުތުގައި އިޔާދަ ކުރަނިވި ހަކަތައިން މަގުތަކަށް އަލިކަން ގެނެސް ދިނުމަށް މި މަޝްރޫއަށް އަދާ ކުރެވިދާނެ ދައުރު ބޮޑެވެ. ސަލާމަތީ ގޮތުން ބެލި ކަމުގައި ވީ ނަމަވެސް ރައްކާތެރިކަން ގެނެސްދޭނެ ކަމަށް މަޝްރޫއުގައި ބައިވެރިވި ދަރިވަރު ޚައިރީ ވަނީ ފާހަގަ ކޮށްފައެވެ.

ތިމާވެއްޓަށް އުއްމީދު ޚަބަރެއް ގެނެސްދިން މި އާދަޔާ ހިލާފު ކޮންކްރީޓުގައި އެކުލެވިގެން ވަނީ އާންމުކޮށް ކޮންކްރީޓް އުފެއްދުމަށް ބޭނުން ކުރާ ސާމާނެވެ. ނަމަވެސް ތަފާތަކީ، އެއަށް ވިދުން ގެނުވުމަށް އެ އަޅާ އެއްޗެކެވެ.

ރޭގަނޑުގެ ވަގުތުތަކުގައި ފެހި ކުލައިގެ ވިދުމަކުން ދިއްލޭ މި ކޮންކްރީޓަކީ، ދަރިވަރުން ބުނާ ގޮތުގައި، ހައިވޭތައް ދިއްލުމަށާ، ދިގުދެމިގެންދާ ދުރު ރާސްތާ މަގުތަކުގައި ހުންނަ ބޯޑުތައް ދިއްލަން ކުރާ ހޭދަ ކުޑަކޮށްދޭނެ އީޖާދެކެވެ. އުމްރާނީ ބިނާވެށީގެ ތަރައްގީގެ މަޝްރޫއުތަކުގައި ފުޅާ ދާއިރާއެއްގައި މި ކޮންކްރީޓް ބޭނުން ކުރަން ފަށައިފިނަމަ ބޮޑުތަނުން އެނގުން ވާނެއެވެ.

މެއި 19، 2022 ވަނަ ދުވަހު މިޞްރުން އިއުލާން ކުރި މޫސުމާ ބެހޭ ގައުމީ އިސްތިރާޖު 2050 އަކީ، އިޔާދަ ކުރަނިވި ހަކަތައަށް ބަރޯސާވެ، ވަޔާއި އިރުގެ އަވިން ހަކަތަ އުފެއްދުމުގެ މަޝްރޫއުތައް އިތުރަށް ފުޅާ ކުރުމަށް ބާރުދޭ އިސްތިރާޖެކެވެ.

ތިމާވެއްޓާ ރައްޓެހި، ތަފާތު، އާ މަޝްރޫއުތަކެއް މިޞްރުން ފެންނަމުންދާ މި ދަނޑިވަޅަކީ މޫސުމީ ނޭދެވޭ ބަދަލުތަކާ ގުޅޭ ގޮތުން ބައިނަލްއަގުވާމީ ފެންވަރުގައި ސިލްސިލާ ގޮތެއްގައި ކުރިއަށް ގެންދާ އެންމެ ވަރުގަދަ އެއް ބައްދަލުވުން ކަމަށް ވާ ކޮންފަރަންސް އޮފް ޕާޓީޒް ގެ 27 ވަނަ ސަމިޓް ނުވަތަ ކޮޕް-27  އަށް މިޞްރުން ތައްޔާރު ވަމުންދާ ދަނޑިވަޅެކެވެ.

ނޮވެމްބަރު 7 އިން 18 އަށް ޝަރަމް އަލް-ޝައިޚްގައި އޮންނަ ކޮޕް-27 ސަމިޓްގެ ރިޔާސަތު ބަލަހައްޓާނީ މިޞްރުންނެވެ.