އެފްކޮންސްގެ ޖޫރިމަނާ މަޢާފުކުރުމުގެ ވިސްނުމެއް ނެތް - ޝައުނާ
ފްކޮންސް ޖޫރިމަނާކުރަން އީޕީއޭއިން ނިންމީ 69,411,800.00 ރުފިޔާ އިން
ވިލިމާލޭ ފަރަށް ބީހުނު ޕްލެޓްފޯމް
ތިލަމާލެ ބްރިޖު އެޅުމަށް ބޭނުންކުރި ޕްލެޓްފޯމެއް ވިލިމާލެ ފަރަށް އަރައި ލިބުނު ގެއްލުންތަކާ ގުޅިގެން އެފްކޮންސް ކޮށްފައިވާ ޖޫރިމަނާ މަޢާފުކޮށްދިނުމުގެ ވިސްނުމެއް ނެތް ކަމަށް އެންވަޔަރަމަންޓް މިނިސްޓަރު އާމިނަތު ޝައުނާ މިއަދު ވިދާޅުވެއްޖެއެވެ.
ޝައުނާ އެފަދައިން ވިދާޅުވީ ރައްޔިތުންގެ މަޖިލީހުގެ އަންގާރަ ދުވަހުގެ ޖަލްސާގައި ނައިފަރު ދާއިރާގެ މެންބަރު އަހުމަދު ޝިޔާމް ކުރެއްވި ސުވާލަކަށް ޖަވާބުދެއްވަމުންނެވެ. ޝިޔާމް ވަނީ އެ ވާހަކަ ނުދައްކާ ސަރުކާރުން ތިބެނީ ވަކި ބަޔަކަށް މަންފާ ހޯދައިދިނުމަށް ކަމަށް ތުހުމަތުކުރައްވާފައެވެ.
ޝިޔާމްގެ ސުވާލަށް ޖަވާބުދެއްވަމުން ޝައުނާ ވަނީ ސަރުކާރުން ވަކިބަޔަކަށް ފައިދާވާ ގޮތަށް އެއްވެސް ނިންމުމެއް ނިންމާފައި ނުވާ ކަމަށާއި، ސަރުކާރުގެ ނިންމުންތައް ބިނާކުރަނީ އުސޫލުތަކާއި އެއްގޮތަށް ހަމަހަމަކަމާއި އެކުގައި ކަމަށް މިނިސްޓަރު ވިދާޅުވިއެވެ. އަދި އެފްކޮންސް އަށް މައާފުކުރުމުގެ ނިޔަތެއް އަދި ސިޔާސަތެއް ވެސް ނެތް ކަމަށް މިނިސްޓަރު ވަނީ ވިދާޅުވެފައެވެ.
އެންވަޔަރަމަންޓް މިނިސްޓްރީން މައުލޫމާތުދޭގޮތުގައި މި ނިންމުން އިސްތިއުނާފު ކުރުމަށް ހުށަހެޅީ އާދީއްތަ ދުވަހުއެވެ. އެހެންވެ، އެކަމާ ގުޅިގެން ބަލަން ޖެހޭ ކަންކަން ބަލަމުން އަންނަކަމަށް އެ މިނިސްޓްރީން ބުނެއެވެ.
ތިލަމާލެ ބްރިޖްގެ ޖިއޯ ޓެކްނިކަލް ދިރާސާތަކަށް ގެނެސްފައިވާ "ސެލްފް އެލެވޭޓިންގ ޕްލެޓްފޯމް" (އެސްއީޕީ)، ވިލިމާލެ ފަރަށް އެރުމުގެ ސަބަބުން ލިބުނު ގެއްލުންތަކާ ގުޅިގެން ބްރިޖުގެ މަސައްކަތްކުރަމުންދާ އެފްކޮންސް ޖޫރިމަނާކުރަން އީޕީއޭއިން ނިންމީ 69,411,800.00 (ފަސްދޮޅަސް ނުވަ މިލިއަން ހަތަރުލައްކަ އެގާރަހާސް އަށްސަތޭކަ) ރުފިޔާއިންނެވެ. އީޕީއޭއިން ވަނީ ސަރުކާރު ބަންދު ދުވަސްތައް ހިމެނޭހެން 30 ދުވަހުގެ ތެރޭގައި މި ފައިސާ އީޕީއޭއަށް ދެއްކުމަށް އެފްކޮންސްއަށް އަންގާފައެވެ. އެގޮތަށް އަންގާފައިވަނީ މިދިޔަ ނޮވެމްބަރު މަހުގެ 13ގައެވެ.
އެ ނިންމުން އިސްތިޢުނާފްކުރީ މިދިޔަ ޑިސެމްބަރު މަހެވެ.
އީޕިއޭ އިން ނެރުނު ބަޔާނެއްގައި ބުނެފައި ވަނީ ޕްލެޓްފޯމުގެ ވެރިފަރާތާއި އެ އިދާރާ ގުޅިގެން ސަރވޭއެއް ކުރި ކަމަށާއި، 14-22 އޮކްޓޯބަރ އަށް އެފްކޮންސް އިން ކުރި ދިރާސާގައި އެ އެޖެންސީގެ އޮބްޒަރވަރުން ބައިވެރިވެފައިވާނެ ކަމަށެވެ. އެގޮތުން ބެލި ބެލުމުން، ޕްލެޓްފޯމްގެ ބައިތަކުންނާއި އެތަކެތި ނެގުމަށް ކުރި މަސައްކަތުން އެ ސަރަހައްދުގެ ފަރުގެ އެކި ދިމަދިމާލުން އެކިވަރުގެ ގެއްލުން ލިބިފައިވާކަން އެނގިފައިވާ ކަމަށް އީޕީއޭ އިން ބުނެއެވެ. އީޕީއޭ އިން ބުނީ 2755 އަކަމީޓަރުގެ ސަރަހައްދަކަށް ގެއްލުން ލިބިފައިވާ ކަމަށް ކަނޑައަޅާފައިވާނެ ކަމަށެވެ.
