އަދުގެ ދުނިޔޭގައި ކަން ހިނގަމުން ދާ ގޮތުން، މޫސުމީ ނޭދެވޭ ބަދަލުތަކުގެ ނަންގަތަސް، އެއީ ސިޔާސީ ކަމެއްގެ ގޮތުގައި ބައެއް މީހުންނަށް އޮންނަނީ ސިފަވެފައެވެ. ނަމަވެސް، މިއަދު ޤަބޫލު ކުރަން ޖެހިފައި އޮތް ހިތި ޙަޤީޤަތަކީ، މޫސުމީ ނޭދެވޭ ބަދަލުތަކުގެ އަސަރުތަކުން މިންޖުވެ، ސަލާމަތުގެ އައްސޭރިއެއްގައި ހުރި ހަމަ އެކަކުވެސް މި ދުނިޔެމަތީގައި ނެތް ކަމެވެ. އޭޕްރިލް 21 ވަނަ ދުވަހު، ދުނިޔޭގެ މޫސުމާ ބެހޭ އިދާރާ (ޑަބްލިއުއެމްއޯ)އިން އާންމު ކުރި ރިޕޯޓުންވެސް ދިނީ ހަމަ އެ އިންޒާރެވެ.
ހުކުރު ދުވަހު ޑަބްލިއުއެމްއޯއިން އާންމު ކުރި އަހަރީ ރިޕޯޓުގައި ވާ ގޮތުން، 2022 ވަނަ އަހަރަކީ އިންތިހާ ހަނަފަސްކަމާއި، ފެންބޮޑުވުމުގެ ހާދިޘާތަކާއި، އާދަޔާ ޚިލާފު ގަދައަށް ފިނިހޫނުމިން މައްޗަށް ދިއުން ހިމެނޭހެން މޫސުމީ ގޮތުން ނޭދެވޭ އެކިއެކި ބަދަލުތައް، މީގެ ކުރިއާ ޚިލާފު މަތީ މިންވަރަކަށް، ދުނިޔޭގެ ހުރިހާ ބައްރަކުން ތަޖުރިބާ ކުރި އަހަރެކެވެ. މިކަމުގެ ނަތީޖާއެއްގެ ގޮތުން، އެތައް ބިލިއަން ޑޮލަރެއްގެ ގެއްލުން ވެފައި ވާ ކަމަށްވެސް ދުނިޔޭގެ މޫސުމާ ބެހޭ އިދާރާގެ އަހަރީ ރިޕޯޓްގައި ވަނީ ފާހަގަ ކޮށްފައެވެ.
ދުނިޔޭގެ އެންމެ ދެކުނު ތަނޑި، ނުވަތަ އެންޓާކްޓިކް ސަރަޙައްދުގެ ކަނޑުގައި ގަނޑުފެން އެކުލެވޭ މިންވަރު ހުރީ މިހާތަނަށް ރެކޯޑް ކުރެވިފައި ވާ އެންމެ ދަށް މިންވަރުގައެވެ. ވިލާތު ބައްރުގައި ދެމެމުންދާ ގަނޑުފެނުގެ ކޯރުތައް ވިރެމުން ދާ ނިސްބަތްވެސް ހުރީ ޗަރޓުގެ އިންތަކުން ބޭރުގައެވެ. 2015 އިން 2022ގެ ނިޔަލަށް ހޭދަވި 8 އަހަރު ދުވަހުގެ މުއްދަތަކީ، ދުނިޔެ އެންމެ ހޫނުވެގެން ދިޔަ ކަމަށް ރެކޯޑް ކުރެވުނު މުއްދަތެވެ. 2022 ވަނަ އަހަރަކީ، ގަނޑުފެނުގެ ކޯރުތައް ވިރި، ކަނޑުގެ ލޮނުގަނޑުތައް އުފުލުން ރެކޯޑް މިންވަރަކަށް އުފުލިގެން ދިޔަ އަހަރަކަށް ވާ އިރު، އެތައް ހާސް އަހަރަކަށް އެކަން ދެމިގެން ދާނެ ކަމަށްވެސް ޑަބްލިއުއެމްއޯގެ ރިޕޯޓްގައި ފާހަގަ ކޮށްފައި ވެއެވެ.
ޔަޤީން ކަށަވަރު، އަހަރަމެންގެ ތެރޭގަ އެބަ އޮތް ބިންތިރި، ޖަޒީރާ ޤައުމުތައް. ނެދަލަންޑަސްއާއި ބަންގްލަދޭޝް ކަހަލަ ޤައުމުތައް. މި ޤައުމުތަކަށް ކުރާ އަސަރު ބޮޑުވާނެ. އެކަމަކު، ޢާލަމީ ކާރިޘާއެއް ކުރިމަތިވާނެ. އަނެއްކާ އަނެއްކޮޅުން، މިކަންކަމަކީ، މޫސުމީ ނޭދެވޭ ބަދަލުތަކުގެ އަސަރު ކުޑަ ކުރުމަށްޓަކާ ވަރުގަދަ ޢަޒުމުތަކެއް ކަނޑައަޅަން ލިބޭ ހިތްވަރަކަށްވެސްވޭ.ޕެޓޭރީ ޓާލާސް؛ ޑަބްލިއުއެމްއޯގެ ސެކްރެޓަރީ ޖެނެރަލް
މުޅި އަހަރު ދުވަހު ހިނގާދިޔަ މޫސުމީ ގޮތުން ނޭދެވޭ ބަދަލުތަކުގެ ހާދިޘާތަކާ ގުޅިގެން، މިހާރުވެސް އިންތިހާ ދަތީގައި ދިރިއުޅެމުންދާ 95 މިލިއަނެއްހާ މީހުންގެ ދިރިއުޅުން އިތުރު ތަކުލީފަކަށް ވެ، ގެދޮރު ގެއްލުނު މީހުންގެ އާބާދީ އިތުރުވެގެން ދިޔައެވެ.
ޑަބްލިއުއެމްއޯގެ ސެކްރެޓަރީ ޖެނެރަލް ޕެޓޭރީ ޓާލާސް ވިދާޅުވީ، މި ބަދަލުތަކަކީ 2060 ގެ އަހަރުތަކާ ހިސާބަށްވެސް ދެމިގެން ހިނގައިދާނެ ނެދެވޭ ބަދަލުތަކަކަށް ވުމުގެ ފުރުޞަތު އެބަ އޮތް ކަމަށެވެ.
ހިތާމައަކީ، މޫސުމީ ނޭދެވޭ ބަދަލުތަކުގެ އަސަރު ކުޑަކުރަން މި ކުރާ މަސައްކަތްތަކުގެ ބޭރުން، މިހާރު މި އަންނަމުންދާ ނޭދެވޭ ބަދަލުތައް، 2060ގެ އަހަރުތަކާ ހިސާބަށް ދެމިގެން ދިއުމުގެ ފުރުޞަތު އޮތުން. އަހަރަމެން ޖައްވަށް ދޫކޮށްފަ ހުރި ކާބަންޑައިއޮކްސައިޑް ފަދަ ވިހަ ގޭހުގެ މިންވަރު ގިނަ ކަމުން، މި ނޭދެވޭ އަސަރުތަކަށް ބަދަލު ގެންނަން، އެތައް އަހަރެއް ނަގާނެ.ޕެޓޭރީ ޓާލާސް؛ ޑަބްލިއުއެމްއޯގެ ސެކްރެޓަރީ ޖެނެރަލް
ދުނިޔޭގެ މޫސުމާ ބެހޭ އިދާރާއިން ބުނާ ގޮތުގައި، ދުނިޔޭގެ ކަނޑުތަކުގެ ލޮނުގަނޑު އުފުލުނު މިންވަރު، 1993 ވަނަ އަހަރުން ފެށިގެން ވަނީ ދެގުނަ އިތުރު ވެފައެވެ. މިއީވެސް ރެކޯޑް މިންވަރެކެވެ.
