އުމްރާއިން އެނބުރި އަންނަތާ 14 ދުވަހުގެތެރޭގައި ރޯގާޖެހި ހުން އަންނަނަމަ ލަސްނުކޮށް ޑޮކްޓަރަށް ދެއްކުމަށް، ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ބުނެފިއެވެ.

އެޗްޕީއޭއިން ބުނީ، އުމްރާއިން އެނބުރި އައުމަށްފަހު ބަލިތަކުން ރައްކާތެރިވުމަށް ސަމާލުކަން ދޭންޖެހޭ ކަމަށެވެ. އެގޮތުން ގިނަގިނައިން ދިޔާތަކެތި ބޭނުންކުރުމާއި، އަރާމުކުރުމާއި، ހުންގަދަނަމަ ގައިގައި ފެން ހޭކުން، އަދި ޕެރެސެޓަމޯލް ފިޔަވައި އެހެން ބޭހެއް ޑޮކްޓަރެއްގެ މަޝްވަރާއާ ނުލައި ބޭނުން ނުކުރުމަށް އެޗްޕީއޭއިން އެދިފައިވެއެވެ.

އެޗްޕީއޭއިން ބުނީ އުމްރާއިން އެބުރި އަންނަތާ 14 ދުވަހުގެތެރޭގައި ހުން އައުން، ކެއްސުން ނޭވާލާން އުނދަގޫވުން، މޭގައި ރިއްސުންފަދަ އަލާމާތެއް ފެނިއްޖެނަމަ، ލަސްނުކޮށް ޑޮކްޓަރެއްގެ މަޝްވަރާ ހޯދަންޖެހޭ ކަމަށެވެ. އަދި ޑޮކްޓަރަކަށް ދައްކާއިރު، އުމްރާއަށް ދިޔަކަމުގެ މައުލޫމާތު ދިނުމަށް އެޗްޕީއޭއިން އެދިފައިވެއެވެ.

އެޗްޕީއޭއިން ބުނީ މިނޫންވެސް އިތުރު ބައްޔެއްގެ އަލާމާތެއް ފެންނަނަމަ ޑޮކްޓަރަށް ދެއްކުމަކީ ވަރަށް މުހިންމު ކަމެއް ކަމަށެވެ.

މީގެ އިތުރުން އެޗްޕީއޭއިން ވަނީ އަރިދަފުސް ރޯގާ ޖެހިއްޖެނަމަ، ކެއްސައި ކިނބިހި އަޅާއިރު އަނގަމައްޗާއި ނޭފަތް ނިވާކުރުމަށާއި، ޓިޝޫފަދަ ތަކެތި ބޭނުންކުރުމަށްފަހު ރައްކާތެރި ގޮތުގައި ނައްތާލައި، އަދި ގިނަގިނައިން ސައިބޯނި ލައިގެން އަތްދޮވެ، ރައްކާތެރިކަމުގެ ފިޔަވަޅު އެޅުމަށް އެދިފައިވެއެވެ.

ދަތުރުމަތީގައާއި އުމްރާ އަދާކުރުމުގައި އުޅޭއިރު މާސްކް އަޅައިގެން އުޅުމަށް އެޗްޕީއޭއިން އިލްތިމާސްކޮށްފައިވާއިރު، މިދުވަސްވަރު މާލޭގެ އިތުރުން އަތޮޅުތެރޭގައި އަރިދަފުސްރޯގާއާއި ހުން ޖެހޭ ނިސްބަތްވަނީ އިތުރުވެގެން ގޮސްފައެވެ. އަދި ފާއިތުވި ދުވަސްތަކުގައި ރާއްޖޭގައި ކޮވިޑް-19ގެ ކޭސްތަކުގެ އަދަދު ވަރަށް ދަށްވިއެވެ. ނަމަވެސް މާޗް މަހުގެ ފަހުކޮޅުން ފެށިގެން މިބައްޔަށް ޕޮޒިޓިވްވާ މީހުންގެ އަދަދު ވަނީ އިތުރުވެގެން ގޮސްފައެވެ. އެޗްޕީއޭގެ ތަފާސްހިސާބުތައް ދައްކާގޮތުގައި އޭޕްރީލް 9ން 15އަށް، މުޅި ރާއްޖެއިން 148 މީހުން ޕޮޒިޓިވްވެފައިވެއެވެ.