ރަފައެލް ލެއާއޯގެ ދެ ލަނޑުން މޮޅުވެ އޭސީ މިލާނުން އިޓާލިއަން ލީގުގެ ގަދަ ހަތަރެއްގެ އުންމީދު ބޮޑުކޮށްފި އެވެ.

މިލާންގެ ދަނޑުގައި އާދިއްތަ ދުވަހުގެ ރޭ ކުޅުނު މެޗުގައި އެ ޓީމުން ވަނީ 2-0 އިން ލީސް ބަލިކޮށްފަ އެވެ. މެޗު ފަށައިގެން ފުރަތަމަ ހާފުގެ 40 ވަނަ މިނެޓުގައި މިލާނަށް ލީޑު ނަގައިދިނީ މިފަހުން މޮޅަށް ކުޅެމުން އަންނަ ޕޯޗުގަލްގެ ޒުވާން ފޯވާޑު ލެއާއޯ އެވެ. އެއީ ސަންޑްރޯ ޓޮނާލީ ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. ދެ ވަނަ ހާފަށް ނިކުމެ ވެސް މިލާނުން ވަނީ އިތުރު ލަނޑު ޖެހުމަށް މަސައްކަތްކޮށްފަ އެވެ. މެޗުގެ 75 ވަނަ މިނެޓުގައި މިލާންގެ ލީޑު ލެއާއޯ ފުޅާކޮށްދިނީ ބްރަހިމް ޑިއާޒް ތަނަވަސްކޮށްދިން ފުރުސަތެއްގަ އެވެ.

މޮޅާއެކު މިލާން ވަނީ ލީގު ތާވަލްގެ ފަސް ވަނަ އަށް ޖެހިލައިފަ އެވެ. އެއީ މިހާތަނަށް ކުޅުނު 31 މެޗުން 56 ޕޮއިންޓާއެކު އެވެ. ހަމަ އެ އަދަދަށް މެޗު ކުޅެގެން ހަތަރު ވަނައިގައި އޮތް ރޯމާ އަށް ވެސް ލިބެނީ 56 ޕޮއިންޓެވެ. ރޯމާ އިން ކުރި ހޯދަނީ ލަނޑުންނެވެ. ލީގުގައި ކުރިއަށް ހުރި މެޗުތަކުން ރަނގަޅު ނަތީޖާއެއް ނެރިގެން މިލާނަށް ގަދަ ހަތަރެއްގެ ޖާގައެއް ހޯދޭނެ އެވެ.