21 އަހަރުގެ ދިގު ޚިދުމަތަކަށްފަހު ގާޒީ ޙަސަން ސައީދު ފަނޑިޔާރުކަމުން ރިޓަޔަރ ކުރައްވައިފި
23 އެޕްރީލު 2023 | އާދީއްތަ 04:43ޙަސަން ސައީދު މީގެ ކުރިން ވަނީ ފެމިލީ ކޯޓުގެ އިސްގާޒީކަންވެސް ކުރައްވާފައި
Ghaazee hassan ކްރިމިނަލް ކޯޓުގެ ގާޒީ ޙަސަން ސައީދު
ކްރިމިނަލް ކޯޓުގެ ގާޒީ ޙަސަން ސައީދު ފަނޑިޔާރުކަމުން ރިޓަޔަރ ކުރައްވައިފިއެވެ.
21 އަހަރުގެ ދިގު ޚިދުމަތަކަށްފަހު ގާޒީ ޙަަސަން ސައީދު ފަނޑިޔާރުކަމުން ރިޓަޔަރ ކުރެއްވީ 23 އޭޕްރީލް 2023 ގައެވެ. އެއީ މަޤާމުން މުސްކުޅިވެވަޑައިގެންނެވުމާއި ގުޅިގެންނެވެ. ރިޓަޔަރ ކުރެއްވިއިރު ހުންނެވީ ކްރިމިނަލް ކޯޓުގެ ގާޒީއެއްގެ މަޤާމުގައެވެ.
ޖުޑީޝަލް ސަރވިސް ކޮމިޝަން (ޖޭއެސްސީ) އިން ވަނީ ޙަސަން ސައީދު ޝަރުއީ ދާއިރާއަށް ކޮށްދެއްވި ޚިދުމަތްތައް ފާހަގަކޮށް އެ ކޮމިޝަނުގެ މެންބަރުންނާއި މުވައްޒަފުންގެ ނަމުގައި ތަހުނިޔާ ދަންނަވާފައެވެ.
ޙަސަން ސައީދު މީގެ ކުރިން ވަނީ ފެމިލީ ކޯޓުގެ އިސްގާޒީކަންވެސް ކުރައްވާފައެވެ.
ގާޒީ ޙަސަން ސައީދު ފެމިލީ ކޯޓުގެ އިސްގާޒީ ކަމުގައި ހުންނެވި ދުވަސްވަރުގައި ހިނގި ކަމަކާ ގުޅިގެން ކޮމިޝަނުން ބެލި މައްސަލައެއްގައި ދާދި ފަހުން އެ ކޮމިޝަނުން ވަނީ ޙަސަން ސައީދު 14 ދުވަހަށް ސަސްޕެންޑުކުރުމަށްވެސް ނިންމާފައެވެ.
އެއީ 2018 ވަނަ އަހަރު ގާޒީ ޙަސަން ސައީދު އިސްގާޒީ ކަމުގައި ހުންނެވިއިރު ފެމިލީ ކޯޓުގެ ފަރާތުން އެ ކޯޓުގެ މުވައްޒަފުން ރާއްޖެއިން ބޭރަށް ފޮނުވައިގެން ކައިވެންޏެއް ކޮށްދިން މައްސަލައެއްގައެވެ.
އެހެންނަމަވެސް ކޮމިޝަނުގެ ނިންމުމަކީ ރަނގަޅު ނިންމުމެއް ނޫންކަމަށް ފަނޑިޔާރުންގެ އިސްތިއުނާފު މަޖިލީހުން ވަނީ ނިންމާވަފައެވެ.
މިދިޔަ ބުރާސްފަތި ދުވަހު ފަނޑިޔާރުންގެ އިސްތިއުނާފު މަޖިލީހުން ނިންމި ނިންމުމުގައި ބުނެފައިވަނީ، ގާޒީ ޙަސަން ސައީދުގެ އަމަލަކީ ޤާނޫނު އެއްފަރާތްކޮށްގެން، ޤާނޫނުގެ ސަރީޙަ ނައްސަކާ ޚިލާފުވެވަޑައިގެން ހިންގަވާފައިވާ އަމަލެއް ނޫން ކަމަށެވެ.
އެ އަމަލަކީ ގާޒީއަށް ލިބިވަޑައިގެންފައިވާ އިލްމެއްގެ އަލީގައި ރަނގަޅު ގޮތް ދެނެގަތުމަށް ކުރެވެން އޮތް މަސައްކަތް ކުރެއްވުމަށްފަހު، ގާޒީގެ އިޖުތިހާދުން ނިންމެވި ނިންމެވުމެއްކަން ފާހަގަކޮށް ފަނޑިޔާރުންގެ އިސްތިއުނާފު މަޖިލީހުން ނިންމި ނިންމުމުގައި ބުނެފައިވަނީ، ދެވަނަ ނަޒަރަކުން ބަލާއިރު އެ ނިންމުން ރަނގަޅުވުމާއި، ނުބައިވުމުގެ ފުރުސަތުވެސް އޮތް ކަމަށެވެ.
އެ ނިންމުން ރަނގަޅުވިޔަސް އަދި ނުބައިވިޔަސް، އެ ނިންމުން ނިންމުމުގައި ފަނޑިޔާރު ތަބާވާން ޖެހޭ ސުލޫކީ މިންގަނޑާ ޚިލާފު ކަމެއް ހިނގާފައިނުވާނަމަ، އެ އަމަލަކީ ޢައިރު ސުލޫކީ އަމަލެއްކަމުގައި ނުބެލެވޭނެކަމަށް އެ މަޖިލީހުގެ އިއްތިފާޤުން ވަނީ ނިންމާވައެވެ.
ފަނޑިޔާރުންގެ އިސްތިއުނާފު މަޖިލީހުގައި މި ނިންމެވުން ނިންމަވާފައިވަނީ ފަނޑިޔާރު އަލީ ރަޝީދު ހުސައިން، ފަނޑިޔާރު މުޙައްމަދު ފައިސަލް އަދި ފަނޑިޔާރު އަހުމަދު ޝަރީފެވެ.
