ވިނަރެސް މޮޅުވެ، ވިންގްސް ބަލިވެއްޖެ

ފީއަލީ އެކުވެރި ޒުވާނުންގެ ގުޅުން (ފެޒްގ) އިން ބާއްވާ ފިރިހެން ވޮލީ ބޯޅަ މުބާރާތުގައި ވިނަރެސް ކުޅުނު ދެ ވަނަ މެޗުން ވެސް މޮޅުވީއިރު، ވިންގަސްގެ ދެ ވަނަ މެޗުން އެ ޓީމު ބަލިވެއްޖެ އެވެ.

މުބާރާތުގައި ވިނަރެސް ކުޅުނު ފުރަތަމަ މެޗުގައި ވަނީ ލެޖެންޑްސް އަތުން މޮޅުވެފަ އެވެ. ހޮނިހިރު ދުވަހުގެ ހަވީރު ކުޅުނު އެ ޓީމުގެ ދެ ވަނަ މެޗުގައި ވަނީ ވީ ކިންގްސް އަތުން ވެސް މޮޅުވެފަ އެވެ. މި މެޗުގެ ފުރަތަމަ ސެޓު 25-23 އިން ކާމިޔާބު ކުރީ ވެސް ވީ ކިންގްސް އެވެ. ނަމަވެސް ވިނަރެސް އިން ވަނީ ފަހަތުން އަރައި ޖެހިގެން އައި ތިން ސެޓު ވެސް ކާމިޔާބުކޮށްފަ އެވެ. ވިނަރެސް އިން ސެޓުތައް ކާމިޔާބު ކުރީ 19-25، 22-25 އަދި 18-25 އިންނެވ. މެޗުގެ މޮޅު ކުޅުންތެރިޔަކީ ވިނަރެސްގެ ޒިޔާން ޙުސެއިން އެވެ.

ވިންގްސް އިން ވެސް ވަނީ ކުޅުނު ފުރަތަމަ މެޗު ކާމިޔާބުކޮށްފަ އެވެ. އެހެންކަމުން ދެ ވަނަ މެޗު މޮޅުވެ ޕޮއިންޓުގެ ގޮތުން ވިނަރެސްއާ އެއްވަރު ކުރުމުގެ ފުރުސަތު އެ ޓީމަށް އޮތެވެ. ނަމަވެސް ލެޖެންޑްސްއާ ވާދަކޮށް އެ ޓީމު ވަނީ ތިން ސެޓު ދެ ސެޓުން ބަލިވެފަ އެވެ. މެޗުގެ ފުރަތަމަ ސެޓު ލެޖެންޑްސް އިން ކާމިޔާބު ކުރީ 25-21 އިންނެވެ. ނަމަވެސް ވިންގްސް އިން ވަނީ ޖެހިގެން އައި ދެ ސެޓު ކާމިޔާބުކޮށް، ލީޑު ނަގައިފަ އެވެ. އެއީ ދެ ވަނަ ސެޓު 21-25 އަދި ތިން ވަނަ ސެޓު 22-25 އިންނެވެ. ހަތަރު ވަނަ ސެޓު ކާމިޔާބުކޮށް މެޗުން މޮޅުވުމުގެ ފުރުސަތު ވިންގްސް އަށް އޮތްއިރު، ވާދަވެރި ކުޅުމަކަށްފަހު 25-23 އިން ހަތަރު ވަނަ ސެޓު ކާމިޔާބު ކުރީ ލެޖެންޑްސް އިންނެވެ. ނަތީޖާ ނެރުމަށް ކުޅުނު ފަސް ވަނަ ސެޓު ލެޖެންޑްސް އިން ކާމިޔާބު ކުރީ 15-10 އިންނެވެ. މެޗުގެ މޮޅު ކުޅުންތެރިޔަކީ ލެޖެންޑްސްގެ އަޙުމަދު ޝަރޫފް އެވެ.

މިހާތަނަށް ކުޅުނު ދެ މެޗުން ހަ ޕޮއިންޓާއެކު އެއް ވަނައިގައި އޮތީ ވިނަރެސް އެވެ. ދެ ވަނައިގައި ވިންގްސް އޮތީ ހަތަރު ޕޮއިންޓާއެކު އެވެ. ދެ ޕޮއިންޓާއެކު ތިން ވަނައިގައި ލެޖެންޑްސް އޮތްއިރު، ވީ ކިންގްސް އަށް ޕޮއިންޓެއް ނުލިބެ އެވެ. މުބާރާތުގެ ފައިނަލުން ޖާގަ ލިބޭނީ ކޮންމެ ޓީމެއް ކޮންމެ ޓީމަކާ ވާދަކުރުމަށްފަހު، ޕޮއިންޓު ތާވަލްގެ އެއް ވަނަ އަދި ދެ ވަނަ ޓީމަށެވެ.