މޯލްޑިވްސް ގަރލް ގައިޑް އެސޯސިއޭޝަނުގެ ޔަންގް ލީޑަރުން އިސްނަގައިގެން ކުރިޔަށް ގެންދާ އީދު ޕްރޮޖެކްޓްގެ ހަރަކާތުގައި، ރައީސުލްޖުމްހޫރިއްޔާގެ އަނބިކަނބަލުން އަދި ޗީފް ގައިޑް ފަޒްނާ އަހުމަދު ބައިވެރިވެވަޑައިގެންފިއެވެ.

މި ހަރަކާތަކީ 2000ވަނަ އަހަރުން ފެށިގެން ކޮންމެ އަހަރެއްގެވެސް ވަޅު އީދު ދުވަހު، ގަރލް ގައިޑް އެސޯސިއޭޝަނުން، ކ. ގުރައިދޫގައި ހުންނަ ޚާއްސަ އެހީއަށް ބޭނުންވާ މީހުންގެ މަރުކަޒުގައި ތިބޭ މީހުންނާއެކު އީދުގެ އުފާ ހިއްސާކޮށް، އެފަރާތްތަކަށް އީދު ހަދިޔާ ދިނުމުގެގޮތުން ކުރިޔަށްގެންދާ ޕްރޮޖެކްޓެކެވެ.

މޯލްޑިވްސް ގަރލް ގައިޑް އެސޯސިއޭޝަނުންގެ ޔަންގް ލީޑަރުން އިސްނަގައިގެން ކުރިޔަށް ގެންދާ މިހަރަކާތުގައި ބައިވެރިވެވަޑައިގެން، ރައީސުލްޖުމްހޫރިއްޔާގެ އަނބިކަނބަލުން އަދި ޗީފް ގައިޑް ފަޒްނާ އަހުމަދު ވަނީ، މަރުކަޒުގައި ތިބި މީހުންނާ ބައްދަލުކުރައްވައި، އެ މީހުންނާއެކު އީދުގެ އުފަލުގައި ބައިވެރިވެވަޑައިގެންފައެވެ. މީގެތެރޭގައި، އީދު ހަދިޔާ ބަދަލުކުރުމާއި އެމީހުންގެ ހާލުއަހުވާލު އޮޅުންފިލުއްވުން ހިމެނެއެވެ. އަދި އެ ފަރާތްތަކާއެކު އީދުގެ އެކި ކަހަލަ ކުޅިވަރުތަކުގައިވެސް އެކަމަނާ ބައިވެރިވެވަޑައިގަތެވެ.

މޯލްޑިވްސް ގަރލް ގައިޑް އެސޯސިއޭޝަނުން ވަނީ، ކޯވިޑް-19ގެ ދުވަސްވަރުވެސް މިހަރަކާތް މެދުކަނޑާނުލައި ކުރިޔަށްގެންގޮސްފައެވެ. މިގޮތުން 2020 ވަނަ އަހަރާއި 2021 ވަނަ އަހަރު މިހަރަކާތް ކުރިޔަށް ގެންގޮސްފައިވަނީ ވަރޗުއަލްކޮށެވެ. 2019 ވަނަ އަހަރުވެސް، ޚާއްސާ އެހީއަށް ބޭނުންވާ މީހުންގެ މަރުކަޒަށް ޒިޔާރަތްކުރައްވައި، އަމަލީގޮތުން މިހަރަކާތުގައި ރައީސުލްޖުމްހޫރިއްޔާގެ އަނބިކަނބަލުން ބައިވެރިވެވަޑައިގެންފައިވާއިރު، ކޮވިޑާ ގުޅިގެން ވަރޗުއަލްކޮށް މިހަރަކާތް ކުރިޔަށް ގެންދިޔައިރުވެސް އެކަމަނާ މިހަރަކާތުގައި ބައިވެރިވެވަޑައިގަތެވެ.

މޯލްޑިވްސް ގަރލް ގައިޑް އެސޯސިއޭޝަންގެ އީދު ޕްރޮޖެކްޓްގެ ތެރެއިން، ކޮންމެ އަހަރެއްގެވެސް ވަޅު އީދު ދުވަހު ބާއްވާ މިހަރަކާތް މެދުނުކެނޑި ކުރިޔަށްގެންދިޔަ މިއީ 24 ވަނަ ފަހަރެވެ. މިއީ އެއް ދުވަހަށް ކުރިޔަށްގެންދިޔަ ހަރަކާތެކެވެ.