"ޑިމޮކްރަސީގެ ދަތުރުގައި 2 ފުރޭތައިގެ މެދުގައި ތާށިވެފައި"

ނޯވޭގައި އޭނާ ދިރިއުޅެމުން ދިޔަ ގޭގެ ސިޓިންގރޫމްގައި ހުޅުވާފައި ހުރި ޓީވީއިން ދުރަށް ފޮނުވަމުން ދިޔައީ، ހަނގުރާމަ ގަދަވެފައިވާ ސޫދާނުގެ ވެރިކަންކުރާ ޚާރްތޫމްގެ ހަމަނުޖެހުންތަކުގެ މަންޒަރުތަކެވެ. ސޫދާނަށް އުފަން ޚާލިދު އަލްބައްޔާ އަވަދިނެތި އުޅުނީ، މެދުއިރުމައްޗާއި މެދުއިރުމަތީގެ އިމުން ބޭރުންވެސް އެކަމަކަށް ގިނަ ބައެއްގެ ސަމާލުކަން ހުއްޓިފައިވާ މަސައްކަތެއް ކުރުމުގައެވެ. އެއީ ގިނަ ބަޔަކު ދަންނަ، ކާޓޫނު ކުރެހުމުގެ މަސައްކަތެވެ.

އަލްބައްޔާގެ އެންމެ ފަހުގެ މަސައްކަތަށް އޭނާ ދީފައިވާ ނަމަކީ "ދަ ޑޯގް ފައިޓް"އެވެ. އެ ކުރެހުމުން ފެނިގެންދަނީ ސޫދާންގައި މި ދުވަސްވަރު އެންމެ ގަދައަށް ތަޅާފޮޅަމުންދާ 2 ލީޑަރުންނެވެ. އަސްކަރިއްޔާގެ އިސްވެރިޔާ، ޖެނެރަލް އަބްދުލް ފައްތާހު އަލް-ބުރުހާނާއި ޕެރަމިލިޓްރީ ލީޑަރު، ޖެނެރަލް މުހައްމަދު ހަމްދާން ޑަގަލޯ ސިފަކޮށްދީފައި ވަނީ، ދުނިޔޭގެ ޗާޓުގައި ސޫދާންގެ ސަރަހައްދީ އިން ދައްކުވައިދޭ ބައްޓަމަށް އޮންނަ މަސް ފޮއްޗަކާހެދި ތަޅާފޮޅަމުންދާ ކުއްތާތަކެއްގެ ގޮތުގައެވެ. ސަރަހައްދީ ފެންވަރުގައި ކޮންމެ ފަރާތަކަށްވެސް އެއްބާރުލުން ދެމުންދާ ބާރުތައްވެސް އެ ކުރެހުމުގައި ހިމަނާފައިވެއެވެ.

އަލްބައްޔާގެ ކުރެހުންތައް އޭނާ ޝާއިއުކުރަނީ ސޯޝަލް މީޑިއާގައެވެ. މަގުސަދަކީ ސުލްހަވެރިގޮތެއްގައި އިހުތިޖާޖު ކުރެވިދާނެކަން ސާބިތުކޮށްދިނުމެވެ.

މުޅި މެދުއިރުމަތި ގުޑުވާލި "އަރަބި ބަހާރު"ގެ ކާޓޫނުތައް ކުރަހައިގެން ދުނިޔޭގެ ސަމާލުކަން ހޯދާފައިވާ، އުމުރުން 42 އަހަރުގެ އަލްބައްޔާ ބުނިގޮތުގައި، ކުރެހުމަކީ، އެކަމަކަށް އެމީހުން "ތަޅާފޮޅަމުންދާ" ދިއުން ދެމެހެއްޓެނިވި ގޮތެއްގައި ކުރިއަށް ގެންދެވޭނެ މަގެކެވެ.

އަލްބައްޔާ ސިފަކުރިގޮތުގައި، ސޫދާން މިއަދު އޮތީ 2 ފުރޭތައެއްގެ މެދުގައި ތާށިވެފައެވެ.

އަލްބައްޔާގެ ފާހަގަކޮށްލެވޭ ބައެއް މަސައްކަތްތަކުގެ ތެރޭގައި؛ އެމެރިކާގެ އެފްރިކާ ދަރިކޮޅުގެ ފުޓުބޯޅަ ކުޅުންތެރިޔާ ކޮލިން ކެޕަރނެކް، އެއް ކަކޫ މައްޗަށް ތިރިވެ އިންނައިރު، އޭނާގެ ބޮލުގެ އިސްތަށިގަނޑުން ގޮށްމުށްކަވާފައިވާ އަތްތިލައެއް ރަމްޒުކޮށްދޭ ކުރެހުން ހިމެނެއެވެ. އެއީ އެމެރިކާގައި ނިގުޅައިގަންނަމުންދާ ކަޅު ނަސްލުގެ މީހުންގެ ހައްގުތަކަށް ވަކާލާތުކުރުމުގައި ބޭނުންކުރި، ވަރުގަދަ ރަމްޒީ ކުރެހުމަކަށްވިއެވެ. މުނިފޫހިފިލުވުމުގެ ދާއިރާގައި ހަރަކާތްތެރިވާ ސްނޫޕް ޑޮގްފަދަ ފަންނުވެރިން ވަނީ، އެ ކުރެހުން ހިމަނައިގެން ތައްޔާރުކޮށްފައިވާ ޓީޝާޓުތައް ލައިގެން ޝުއޫރު ފާޅުކޮށްފައެވެ.

ގައުމުން ބޭރުގައި ދިރިއުޅުނެއްކަމަކު، އަލްބައްޔާގެ ވަޒަނަށް އޮތް ލޯބި ފަނޑުވެގެންނެއް ނުދެއެވެ. އަލްބައްޔާ ދަނީ، ކަވާކިބީ ގުރޫޕުގައި، ކުރެހުމުގެ ފަންނަ ޚާއްސަ ޕްރޮގްރާމެއް ހިންގުމުގައި އިސްކޮށް ހަރަކާތްތެރިވަމުންނެވެ. އެ ފައުންޑޭޝަންއަކީ، 2011 ވަނަ އަހަރުގެ އަރަބި ބަހާރުގެ މުޒާހަރާތަކުގެ ތެރެއިން، މީޑިއާ މެދުވެރިކޮށް، މެދުއިރުމަތީގައި ޑިމޮކްރަސީއާއި އިންސާނީ ހައްގުތައް ޕްރޮމޯޓްކުރެވިދާނެ ގޮތްތައް ބަލައި ހޯދުމަށް އުފެއްދި ފައުންޑޭޝަނެކެވެ.

ޚާރްތޫމްއިން އަދި އިންޓަރނެޓްގެ ޚިދުމަތް މެދުކަނޑާލާފައި ނެތުމަކީ އަލްބައްޔާގެ ނަސީބުކަމުގައިވެސް ދެންނެވިދާނެއެވެ. އޭނާ ދަނީ ސޯޝަލް މީޑިއާ މެދުވެރިކޮށް ގިނަ މެސެޖުތަކެއް ފޯރުކޮށްދެމުންނެވެ. އެކުވެރިންނާއި އާއިލާގެ މެންބަރުންގެ އިތުރުން، އޭނާގެ ފޮލޯވަރުންނަށް އެކިއެކި އިރުޝާދާއި ނަސޭހަތް ދީ ހަދައެވެ. ގައުމު ދޫކޮށް ދިއުމުގެ އުންމީދުގައި ތިބި މީހުންނަށް، ޗެކްޕޮއިންޓްތަކުގައި އަމަލުތައް ބަހައްޓާނެ ގޮތްތައްވެސް ކިޔައިދެއެވެ.