އިމާރާތްތަކެއްގެ މެދުގައިވެސް ހައްޓާއި ވެއްޓާ ރައްޓެހި ދަނޑުބިންތައް ހެއްދިދާނެ!

އިންސާނީ ދިރިއުޅުން ކުރިއަރައި ތަރައްގީވަމުން ދާވަރަކަށް އެންމެ ބޮޑު ބަދަލެއް އަންނަ އެއްތަނަކަށް ވެފައި އޮންނަނީ އެ ބަޔަކު ދިރިއުޅޭ މާހައުލު، ނުވަތަ ވެއްޓެވެ. އުސް އިމާރާތްތަކުން ފެށިގެން، ސިޓީތަކާއި އަވަށްތައް ފުރަމުން ދާއިރު، ފެހިކަން ގަދަ ދަނޑުބިންތަކަކީ އަމިއްލަ އަތުން ތަރައްގީކުރަމުންދާ ދުނިޔޭގެ ފޮނި މީރުކަން ދެކިލުމަށްޓަކައި، ދުޅަހެޔޮ ހާލުގައި ދެމިހުރުމަށް ކޮންމެހެން ބޭނުންވާ ތަންތަން ކަމާމެދު ގިނަ ފަހަރަށް އޮންނަނީ ވިސްނައިނުލެވިއެވެ. މިސްރުގެ ވެރިރަށް ގާހިރާގެ އުތުރުގެ ސަރަހައްދެއްގައި އަމަލީގޮތުން މި މަސައްކަތް ފެށި އެއް ބަޔަކީ "ޕްލާންޓް އަ ޓްރީ ފޮރ ސޯޝަލް ޑިވެލޮޕްމަންޓް ފައުންޑޭޝަން" (ޕްލާންޓް އަ ޓްރީ) ނުވަތަ އިޖުތިމާއީ ތަރައްގީއަށްޓަކައި ގަސް އިންދުމުގެ ޝިއާރުގެ ދަށުން މަސައްކަތްކުރާ ޖަމިއްޔާއެވެ.

ބައި އޭކަރަށްވުރެ ބޮޑު ސަރަހައްދަކަށް ފެތުރިފައިވާ މި ބަގީޗާ ދަނޑަކީ، މީގެ ކުރިން ކުނި ޖަމާކުރަމުންދިޔަ ސަރަހައްދެކެވެ. ނަމަވެސް މިއަދު އެއީ ކުޑަކުދިންނަށްވެސް މިނިވަންކަމާއެކު ދުވެލައިހެދުމުގެ ފުރުސަތު އޮތް، ހިތްގައިމު ބަގީޗާއެކެވެ. ޖަނަވާރުތަކަށް ކާންދިނުމާއި އާ ގަސްގަހާގެހި ދަސްކުރުމުގެ ފުރުސަތު ހޯދައިދޭ، މުނިފޫހިފިލުވައިލެވޭ އިޖުތިމާއީ މައިޒާނެކެވެ. ބަގީޗާގެ ކޮންމެ ހިސާބަކަށް ބަލައިލިކަމުގައި ވީނަމަވެސް ފެންނަނީ އެފަދަ މަންޒަރުތަކެކެވެ. އެކި އުމުރުގެ މީހުންނާއި ކުދިން، އެކި ކަންކަން ދަސްކުރުމުގައި އަވަދިނެތި އުޅޭ މަންޒަރެވެ. ދަނޑުވެރިކަމާއި، ރީސައިކަލް ކުރުމާއި، ކުޅަނދުރު ގެންގުޅުންފަދަ އެތައް ކަމެއް މި ބަގީޗާގައި ދަސްކޮށްދެއެވެ.

ފައުންޑޭޝަންގެ ބޯޑް އޮފް ޓްރަސްޓީޒްގެ ޗެއަރމަން ނަބީލް މަހްރޫސް ފާހަގަކުރެއްވި ގޮތުގައި، ވެއްޓާ ރައްޓެހި ގަސްކާނާއަކީ މިއަދު ކޮންމެހެންވެސް ބޭނުން ޖެހިފައިވާ އެއްޗެކެވެ. ގުދުރަތީގޮތުން އުފެދޭ ކުނިބުނި ނައްތާލެވުމުގެ އިތުރުން، އިމްޕޯޓަށް ކުރަންޖެހޭ ހޭދަ ކުޑަވެ، ސިއްހަތަށްވެސް އޭގެ ފައިދާ މާ ބޮޑުވީމައެވެ.

2017 ވަނަ އަހަރު ވުޖޫދުވި ފަހުން، ޕްލާންޓް އަ ޓްރީން ދަނީ ތިމާވެއްޓަށް މީހުން ހޭލުންތެރިކުރުވުމަށް އެކި ކެމްޕޭންތަކާއި މަޝްރޫއުތައް ހިންގަމުންނެވެ. ގޭގެ ޓެރަހުގައި ދަނޑު ހެއްދުމާބެހޭ ވޯކްޝޮޕްތައް ހިންގައެވެ. އަދި އެކި ހަރަކާތްތަކުގެ ތެރެއިން، މިހާތަނަށް 2 މިލިއަނަށްވުރެ ގަސްވެސް ވަނީ އިންދާފައެވެ.