މި މަހުގެ 24 ވަނަ ދުވަހަށް ގިނަ ބަޔަކު މާލެ އަރަންޖެހޭ:ޝިފާޒު
މަޖިލީހުގެ އިތުބާރު ނެތްކަމުގެ ވޯޓު ނަގާއިރު ގިނަ ބަޔަކު މެމްބަރުންނަށް ހިތްވަރުދޭން ޖެހޭ
މިއަދު ހަވީރު ބޭއްވި ސައިގައި ޝިފާޒު ވާހަކަ ދައްކަވަނީ
ރައްޔިތުންގެ މަޖިލީހުގެ ރައީސް އަބްދުﷲ މަސީހްގެ އިތުބާރު ނެތް ކަމުގެ މައްސަލާގައި ވޯޓު ނަގާ ދުވަހު ވިހާވެސް ގިނަ ބަޔަކު މާލެ އެރުމަށް އެމްޑީޕީގެ ނައިބު ރައީސް މުހައްމަދު ޝިފާޒު ގޮވާލައްވައިފި އެވެ.
މި މަހުގެ 24 ވަނަ ދުވަހަށް ގިނަ ބަޔަކު މާލެ އެރުމަށް ޝިފާޒު ގޮވާލެއްވީ ގުޅިފައިވާ ސިޔާސީ ޕާޓީތަކުން ހުކުރު ދުވަހު ހަވީރު ބޭއްވި "ހަވީރު ސައި"ގައި ވާހަކަ ދައްކަވަމުންނެވެ. އޭނާ ވިދާޅުވީ ރައްޔިތުންގެ މަޖިލީހުގެ ރައީސްގެ އިތުބާރު ނެތް ކަމަށް ވޯޓު ދޭން ތިބި މެމްބަރުނަށް ހިތްވަދޭން ޖެހޭ ކަމަށެވެ. އިސްލާހީ މަސައްކަތުގައި ބައިވެރިވެވަޑައިގެން އުޅުއްވާ މެމްބަރުންނަށް ހިތްވަރުދިނުމުގެ ޝުއޫރުތައް އިއްވުމަށް އެއްވުންތައް ބާއްވަންޖެހޭ ކަމަށްވެސް ވިދާޅުވި އެވެ.
އޭގެ އިތުރުން ޖުލައި 24 ވަނަ ދުވަހާ ހަމައަށް ގުޅިފައިވާ ޕާޓީތަކުން ކުރިއަށްގެންދާނެ ސިޔާސީ ހަރަކާތްތަކެއް އެކުލަވާލާފައިވާ ކަމަށް ވެސް ޝިފާޒު ވަނީ ފާހަގ ކުރައްވާފަ އެވެ.
"ރައްޔިތުންގެ މަޖިލިސް ސީދާ ރައްޔިތުންގެ ތަނެއްގެ ގޮތުގައި ބަދަލު ކުރުމަށް އެކުރާ މަސައްކަތުގައި، އެ ދުވަހު ރައްޔިތުންނަށް ހިތްވަރު ދިނުމަށްޓަކައި މުޅި މާލެއަށް ރާއްޖޭގެ ރައްޔިތުން ޖަމާވެ، އެ ރައްޔިތުންގެ ސަޕޯޓު އެ ރައްޔިތުންގެ މަންދޫބުންނަށް ދެއްކެން އޮތް މިންވަރެއްގައި ދެއްކުން އެއީ އަޅުގަނޑުމެން ކުރާނެ މަސައްކަތް،" ޝިފާޒު ވިދާޅުވި އެވެ.
ގާނޫނު އަސާސީގައި ރައްޔިތުންނަށް ހިޔާލުފާޅުކުރުމަށް ތަންދޭ ކަމަށް ފާހަގަ ކުރައްވައި ޝިފާޒު ވިދާޅުވީ ރައްޔިތުންގެ މަންދޫބުންގެ ގޮތުގައި ރައްޔިތުންގެ މަޖިލީހުގައި ތިއްބެއްވި ގިނަ އަދަދެއްގެ މެމްބަރުން އެވަނީ ރައީސް އަބްދުﷲ ޔާމީންގެ ވެރިކަމަށް ނޫނެކޭ ވިދާޅުވެފައެވެ.
"އިރާދަ ކުރެއްވިއްޔާ މި އަނިޔާވެރި ވެރިކަން ނިމުމުގެ ފެށުން ދެން ފެށޭ ރައްޔިތުންގެ މަޖިލީހުން ތިޔަ ބޭފުޅުނަށް ފެނިގެންދާނެ ކަމުގެ ފުރިހަމަ އުއްމީދާއި ޔަގީންކަން އަޅުގަނޑުމެންގެ އެބަ އޮތް،" އޭނާ ވިދާޅުވި އެވެ.
