އެޗްޑީއެފްސީގެ ބޯޑަށް ބޭފުޅަކު އައްޔަން ކޮށްފި
ޑިރެކްޓަރުންގެ ބޯޑަށް އައްޔަން ކޮށްފައިވާ ބޭފުޅަކީ މ. ހަނިފަރު މުހައްމަދު ރަޝީދު
އެޗްޑީއެފްސީ
ހައުސިން ޑިވެލޮޕްމެންޓް ފައިނޭންސް ކޯޕަރޭޝަން (އެޗްޑީއެފްސީ)ގެ ޑިރެކްޓަރުންގެ ބޯޑަށް ބޭފުޅަކު އައްޔަންކޮށްފިއެވެ.
ފާއިތުވި ބުރާސްފަތި ދުވަހު ޕްރައިވެޓައިޒޭޝަން ބޯޑުން އެޗްޑީއެފްސީގެ ޑިރެކްޓަރުންގެ ބޯޑަށް އައްޔަން ކޮށްފައިވާ ބޭފުޅަކީ މ. ހަނިފަރު މުހައްމަދު ރަޝީދުއެވެ.
ރަޝީދު އެ މަގާމަށް އައްޔަންކޮށްފައި މި ވަނީ މީގެ ކުރިން އެ މަގާމު އަދާކުރައްވަމުން ގެންދެވި ޅ. ހިންނަވަރު، ލަންދޫގެ، ޚާލިދު ސުލައިމާންގެ ބަދަލުގައެވެ.
މުހައްމަދު ރަޝީދު ވަނީ ބެޗްލާ އޮފް ލޯސް ، ބެޗްލާ އޮފް ބިޒްނަސް އަދި ޑިޕްލޮމާ އިން އެކައުންޓިން ހާސިލްކުރައްވާފައެވެ. އެޗްޑީއެފްސީގެ ބޯޑު މެންބަރު ކަމަށް އައްޔަންކުރުމާއި ހަމައަށް އޭނާ އަދާކުރެއްވީ ހުޅުމާލެ ސޯމިލްސް ޕްރައިވެޓް ލިމިޓެޑްގެ ޖެނަރަލް މެނޭޖަރގެ މަޤާމް އެވެ.
މުހައްމަދު ރަޝީދު ވަނީ މީގެކުރިން ޔޫމެޓް ކޮންސްޓްރަކްޝަން ޕްރައިވެޓް ލިމިޓެޑްގެ ޖެނަރަލް މެނޭޖަރުކަން ވެސް އަދާކުރައްވާފައެވެ. އަދި ޓިމްބަ ހައުސް ޕްރައިވެޓް ލިމިޓެޑްގެ އެގްޒެކްޓިވް ޑިރެކްޓަރުކަމުގެ މަޤާމުވެސް އޭނާ ވަނީ ފުރުއްވާފައެވެ.
2004 ވަނަ އަހަރު ރައީސުލްޖުމްހޫރިއްޔާގެ ގަރާރަކުން އުފެއްދާފައިވާ އެޗްޑީއެފްސީ އަކީ ހައުސިން ސްކީމުތަކަށް ކޮންވެންޝަނަލް އުސޫލުން ލޯނާއި އަދި އިސްލާމީ ޝަރީއާ ހުއްދަ ކުރާ އުސޫލާއި އެއްގޮތަށް ފައިނޭންސް ފެސިލިޓީ ވެސް ދޫކުރާ ކުންފުންޏެކެވެ. އަދި އެޗްޑީއެފްސީގެ ހިއްސާދާރުންގެ ގޮތުގައި ހިމެނެނީ ދިވެހި ސަރުކާރާއި އޭޝިއަން ޑިވެލޮޕްމެންޓް ބޭންކް އަދި އިސްލާމިކް ފައިނޭންސް ކޯޕަރޭޝަން (އައިއެފްސީ)ގެ އިތުރުން އިންޑިއާގެ އެޗްޑީއެފްސީ އެވެ.
