އިނގިރޭސިވިލާތުގެ ބޮޑުވަޒީރުގެ ނައިބު އިސްތިއުފާ ދެއްވައިފި
22 އެޕްރީލު 2023 | ހޮނިހިރު 02:23ރާބް އިސްތިއުފާ ހުށަހަޅުއްވާފައި ވަނީ، އެކުގައި މަސައްކަތް ކުރާ ފަރާތްތަކަށް ގަނާކުރައްވާ ކަމަށް ކުރެވޭ ތުހުމަތުތަކުގެ ތަހުޤީޤެއް ސަރުކާރުން ފަށާފައިވާތީ އެ ކަމާ ގުޅިގެން
އިނގިރޭސިވިލާތުގެ ބޮޑުވަޒީރުގެ ނައިބު ޑޮމިނިކް ރާބް
އިނގިރޭސިވިލާތުގެ ބޮޑުވަޒީރުގެ ނައިބު ޑޮމިނިކް ރާބް އިސްތިއުފާ ދެއްވައިފިއެވެ.
ޖަސްޓިސް މިނިސްޓަރުކަންވެސް ކުރައްވަމުން ގެންދަވާ ރާބް އިސްތިއުފާ ހުށަހަޅުއްވާފައި ވަނީ، އެކުގައި މަސައްކަތް ކުރާ ފަރާތްތަކަށް ގަނާކުރައްވާ ކަމަށް ކުރެވޭ ތުހުމަތުތަކުގެ ތަހުޤީޤެއް ސަރުކާރުން ފަށާފައިވާތީ އެ ކަމާ ގުޅިގެންނެވެ.
މިއާއެކު ރާބު ވަނީ ބޮޑުވަޒީރު ރިޝީ ސުނަކުގެ ސަރުކާރުން މިހާތަނަށް ވަކިވެވަޑައިގެންނެވި އެންމެ އިސް ބޭފުޅާ އަށް ވެފަ އެވެ. ރާބްގެ އިސްތިއުފާގެ ސިޓީ ފޮނުއްވާފައި ވަނީ، ގަނާކުރުމުގެ ތުހުމަތުގައި އޭނާއާ ދެކޮޅަށް ފަށާފައިވާ ތަހުޤީޤުގެ ރިޕޯޓު ހާމަކުރަން ތައްޔާރުވެފައިވާ ދަނޑިވަޅެއްގައެވެ. ރާބް އާ ދެކޮޅަށް ތަހުގީގު ފަށާފައި ވަނީ ހުސްވި 2022 ވަނަ އަހަރުގެ ނޮވެންބަރު މަހުއެވެ. ސަރުކާރުގެ އިސް މަގާމުތައް ފުރުއްވާ ގިނަ ޢަދަދެއްގެ ބޭފުޅުންތަކެއް ރާބް އާ ދެކޮޅަށް ގަނާކުރުމުގެ ތުހުމަތު ކުރައްވާފައިވެއެވެ.
ރާބް ވަނީ މީގެތެރެއިން ގިނަ ތުހުމަތުތައް ދޮގު ކުރައްވާފައެވެ. އަދި، އެއްވެސް މީހަކާ ދިމާލަށް ހުތުރު ބަހުން ވާހަކަ ދައްކާ، އަޑުހަރުކޮށް އިންޒާރުދީ، ޒުވާބުކޮށް، ބިރު ދައްކައި، އަތް އިސްކޮށްފައި ނުވާނެ ކަމުގައި ވެސް ރާބް ވިދާޅުވެއެވެ. ނަމަވެސް، އެ ފަދަ ކަމެއް ކުރެވިފައިވާ ނަމަ، އެ ކަމަކަށް މައާފަށް އެދިވަޑައިގަންނަވާ ކަމުގައި ވެސް ރާބް ވިދާޅުވިއެވެ.
ރާބް އަކީ ސުނަކްގެ ސަރުކާރުގައި މިހާތަނަށް އިސްތިއުފާ ދެއްވި އެންމެ އިސް ބޭފުޅާއެވެ. ފާއިތުވި ހައެއްކަ މަހުގެ ތެރޭގައި ސުނަކުގެ ސަރުކާރުގެ އިސް މަގާމުތައް ފުރުއްވާ ތިން ބޭފުޅަކު ވަނީ އިސްތިއުފާ ދެއްވާފައެވެ. މި ކަމާ ގުޅިގެން، ވެރިކަން ކުރާ ކޮންޒަރވެޓިވް ޕާޓީ ކުރިއަރުވަން ސުނަކް ކުރައްވަމުން ގެންދަވާ މަސައްކަތްތަކަށް ނޭދެވޭ އަސަރުތަކެއް ކޮށްފައިވާ ކަމުގައި މަސްރަޙު ދިރާސާކުރާ ފަރާތްތަކުން ގަބޫލުކުރެއެވެ. އަދި، ރާބްގެ އިސްތިއުފާއަކީ ސުނަކްގެ ސަރުކާރަށް ލިބުނު ބޮޑު ވެއްޓުމެއްގެ ގޮތުގައި ވެސް އެ ފަރާތްތަކުން ސިފަކުރެއެވެ.
ސުނަކްގެ ނައިބުގެ ހައިސިއްޔަތުން ރާބް އަދާކުރައްވާފައި ވަނީ ރަމްޒީ ދައުރެކެވެ. ވެރިކަމުގެ ކަންކަމާ އޭނާ ހަވާލުވެ ވަޑައިގަންނަވާފައި ވަނީ، ޤާނޫނު ހަދާ މަޖިލީހުގެ މަސައްކަތްތަކުން ސުނަކް ދުރުވެ ވަޑައިގަންނަވަން ޖެހޭ ހާލަތްތަކުގައި އެކަންޏެވެ. ނަމަވެސް، ރާބް އަކީ ސުނަކްގެ ވަރަށް ގާތް ބޭފުޅެކެވެ. އަދި، ބޮޑުވަޒީރު ކަމުގެ މަގާމަށް ސުނަކް ކުރެއްވި ކެމްޕޭނުގައި ރާބް ވަނީ އިސް ދައުރެއް އަދާކުރައްވާފައެވެ.
