މާފުށީ ޖަލުގައި ހުކުމް ތަންފީޒުކުރަމުންދިޔަ ބިދޭސީއަކު މަރުވެއްޖެ
21 އެޕްރީލު 2023 | ހުކުރު 13:40މަރުވެފައިވަނީ ބަންގްލަދޭޝްގެ ރައްޔިތެއް ކަމުގައިވާ އަމީނުލް އިސްލާމް (29 އަހަރު)
މާފުށި ޖަލު
މާފުށީ ޖަލުގައި ހުކުމް ތަންފީޒު ކުރަމުންދިޔަ މީހަކު މަރުވެފައިވާ ކަމަށް މޯލްޑިވްސް ކަރެކްޝަނަލް ސަރވިސް އިން ބުނެފިއެވެ.
ކަރެކްޝަންސް އިން ހުކުރު ދުވަހު ބުނެފައިވާ ގޮތުގައި މަރުވެފައިވަނީ ބަންގްލަދޭޝްގެ ރައްޔިތެއް ކަމުގައިވާ އަމީނުލް އިސްލާމް (29 އަހަރު)އެވެ. ހެނދުނުގެ ސައިވަގުތު އޭނާ ހޭނުލައި އޮތުމާ ގުޅިގެން ގޮވަން އުޅުމުން އެއްވެސް ހަރަކާތެއް ނުކުރާތީ، އެމަޖެންސީގައި މާފުށީ ހެލްތް ސެންޓަރަށް ގެންދިޔަ ކަމަށާއި އޭނާ މަރުވެރިކަމަށް ޑޮކްޓަރު ކަނޑައަޅާފައިވަނީ 2:10 ގައި ކަމަށް އެ އިދާރާއިން ބުންޏެވެ.
މާފުށީ ހެލްތް ސެންޓަރާ ހަވާލާދީ ކަރެކްޝަންސް އިން ބުނީ އޭނާ މަރުވެފައިވަނީ ހިތް ހުއްޓިގެން ކަމަށެވެ.
އަމީނުލް އިސްލާމްއަކީ ބަދުއަޚްލާގީ އަމަލު ހިންގުމާ ގުޅިގެން ހަތް އަހަރު ދުވަހުގެ ޙުކުމެއް ތަންފީޒުކުރަމުން ދިޔަ މީހެކެވެ. އޭނާއަކީ އެއްވެސް ބައްޔަކަށް ފަރުވާ ހޯދަމުން އަންނަ މީހެއް ނޫން ކަމަށް ކަރެކްޝަންސް އިން ފާހަގަކުރެއެވެ.
އޭނާ ހެލްތް ސެންޓަރަށް ގެންދިއުމާ ގުޅިގެން، އެކަން އިންސްޕެކްޓަރ އޮފް ކަރެކްޝަނަލް ސަރވިސް އާއި މޯލްޑިވްސް ޕޮލިސް ސަރވިސް އާއި ހިއުމަން ރައިޓްސް ކޮމިޝަން އޮފް ދަ މޯލްޑިވްސް އަދި ނެޝަނަލް އިންޓެގްރިޓީ ކޮމިޝަނަށް އަންގާފައިވާނެ ކަމަށް ވެސް ކަރެކްޝަނުން ބުންޏެވެ.
