މިދިޔަ އަހަރަށްވުރެ މިއަހަރު، ފަގީރުންގެ ދަފްތަރުގައި ރަޖިސްޓްރީވެފައިވާ މީހުންގެ އަދަދު މަދު
20 އެޕްރީލު 2023 | ބުރާސްފަތި 16:13މާލެ ސިޓީ ފަގީރުންގެ ދަފްތަރުގައި 1738 މީހުން ރަޖިސްޓްރީވެފައިވޭ
އިސްލާމިކް މިނިސްޓްރީ
މިދިޔަ އަހަރަށްވުރެ މިއަހަރު, ފަގީރުންގެ ދަފްތަރުގައި ރަޖިސްޓްރީވެފައިވާ މީހުންގެ އަދަދު މަދުވެފައިވާކަމަށް އިސްލާމިކް މިނިސްޓްރީން ބުނެފިއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި, އިސްލާމިކް މިނިސްޓްރީގެ ފަރާތުން ފަންޑް މެނޭޖަރު އަބްދުﷲ އަލީ ވިދާޅުވީ ކޮންމެ އަހަރަކުވެސް ފަގީރުންގެ ދަފްތަރު އެކުލަވާލާ ކަމަށާއި، ދަފްތަރުގައި ޖެހެން ބޭނުންވާ މީހުންނަށް އެފުރުސަތު ހުޅުވާލާކަމަށެވެ.
އަބްދުﷲ ވިދާޅުވީ މިހާރު މާލެ ސިޓީގެ ފަގީރުންގެ ދަފްތަރުގައި 1738 މީހުން ރަޖިސްޓްރީވެފައި ވާކަމަށާއި، އަތޮޅުތެރޭގައި 6710 މީހުން ރަޖިސްޓްރީވެފައި ވާކަމަށެވެ. އަދި ވިދާޅުވީ މިދިޔަ އަހަރަށްވުރެ މިއަހަރު ފަގީރުންގެ އަދަދު މަދުވެފައިވާކަމަށެވެ.
ފަގީރުންގެ ދަފްތަރުގައި ރަޖިސްޓްރީ ވެފައިވާ މީހުންގެ އަދަދު މި އަހަރު މަދުވެފައިވާއިރު، ފަގީރުންގެ ލިސްޓުގައި ތިބި މީހުން އަމިއްލަ ފައިމައްޗަށް ތެދުވެވޭނެ ގޮތްތައް ހޯދައިދިނުމުގެގޮތުން ''ޒަކާތު ނަފާ''ގެ ނަމުގައި ހާއްސަ ޕްރޮގްރާމެއް އިސްލާމިކް މިނިސްޓްރީން ކުރިއަށް ގެންދިޔައެވެ. މި ޕްރޮގްރާމްގެ އަމާޒަކީ ފަގީރުންގެ ދަފްތަރު އެއްކޮށް ހުސްކޮށްލުމެވެ.
ޒަކާތު ނަފާގެ ނަމުގައި ކުރިއަށްގެންދާ ޕްރޮގްރާމްގެ ދަށުން؛ ދަނޑުވެރިކަމާއި، ފެހުމާއި، ފަރުމަސްވެރިކަމާއި އަދިވެސް އަމިއްލަ ފައިމައްޗަށް ތެދުވެ އެމީހުންނަށް އަމިއްލައަށް ކުރެވޭނެ މަސައްކަތްތައް ކުރުމަށް މަގުފަހިކޮށްދޭނެއެވެ.
