ފޭސް 2ގައި ނުރައްކާތެރި އެކްސިޑެންޓެއް ހިނގައިފި

ފޭސް 2ގައި ހިނގި އެކްސިޑެންޓެއްގައި ޒުވާނަކަށް އަނިޔާވެ ފަރުވާދޭން ފަށައިފިއެވެ.

ފުލުހުން ބުނީ، ހުޅުމާލޭ ފޭސް 2 ނިރޮޅުމަގުގައި ކާރަކާއި ސައިކަލެއް ޖެހި އެކްސިޑެންޓު ވެފައިވާކަމުގެ މައުލޫމާތު ބުރާސްފަތި ދުވަހުގެ މެންދުރު 11:45 ހާއިރު ފުލުހުންނަށް ލިބިފައިވާ ކަމަށެވެ.

މި އެކްސިޑެންޓުގައި ސައިކަލު ދުއްވަން އިން 18 އަހަރުގެ ފިރިހެނަކަށް އަނިޔާވެފައިވާ ކަމަށާއި، އޭނާއަށް ހުޅުމާލޭ ހޮސްޕިޓަލުގައި ފަރުވާދެމުންދާކަމަށް ފުލުހުން ބުނެއެވެ.

މި ޙާދިސާގެ ބައެއް ފުޓޭޖު ރާއްޖެއެމްވީއަށް ލިބިފައިވާއިރު، އެކްސިޑެންޓުވި ޒުވާނާ ވެއްޓިފައި އޮންނަ މަންޒަރު ފޮޓޯތަކުންނާއި ވީޑިއޯތަކުން ފެނެއެވެ. އެތަނުގައި ގިނަ އަދަދެއްގެ ލޭވެސް ހުއްޓެވެ.

އޭރު އޭނާގެ ކޮނޑުގައި ދަބަހެއްވެސް އަޅުވާފައި އޮތެވެ.

މަންޒަރު ދުއް ބައެއް ފަރާތްތަކުން ރާއްޖެއެމްވީއަށް ކިޔާދިން ގޮތުގައި އޭނާއަށް އޮތީ ވަރަށް ބޮޑަށް އަނިޔާވެފައެވެ. އޭނާގެ ނޭފަތާއި ބޮލުންވެސް ގިނަ އަދަދެއްގެ ލޭ ފައިބާފައި ހުރިކަމަށާއި، ޙާދިސާ ހިނގިތާ މާ ގިނަ އިރެއް ނުވަނީސް އޭނާ ފަރުވާއަށް ގެންދެވުނުކަމަށް މަންޒަރު ދުއް ފަރާތްތަކުން ބުނެއެވެ.

މަންޒަރު ދުއް މީހުން ކިޔާދިން ގޮތުގައި އެކްސިޑެންޓު ހިނގީ ކާރު ފޭސް 2ގެ ބްރިޖު ކައިރިން ޔޫ-ޓާރން އެއް ނަގަން އުޅެނިކޮށް ސައިކަލުގައި ޖެހިގެންނެވެ.