ޓުޗެލް އަށް ދަނޑު ގޯސް، ރެފްރީ އަށް ދިނީ "އެފް" ގްރޭޑެއް

ޔުއެފާ ޗެމްޕިއަންސް ލީގުގެ ކުއާޓާ ފައިނަލްގައި މެންޗެސްޓަރ ސިޓީއާ ދެކޮޅަށް ކުޅުނުއިރު، ދަނޑުގެ ޙާލަތު ގޯސް ކަމަށާއި، މެޗުގެ ރެފްރީ އަށް ދޭނީ "އެފް" ގްރޭޑެއް ކަމަށް ބަޔާން މިއުނިކްގެ ކޯޗު ތޯމަސް ޓުޗެލް ބުނެފި އެވެ.

އެގްރިގޭޓު ނަތީޖާ އިން ބަޔާންގެ މައްޗަށް ކުރި ހޯދައިގެން ސިޓީ ވަނީ ސެމީ ފައިނަލްގެ ޖާގަ ކަށަވަރުކޮށްފަ އެވެ. މުބާރާތުގެ ކެޓި މެޗަށްފަހު ވާހަކަ ދައްކަމުން ޓުޗެލް ބުނީ، ސިޓީއާ ދެކޮޅަށް ބަޔާނުން ކުޅުނު ދެ މެޗާ މެދު ވެސް އޭނާ ވަރަށް ހިތްހަމަ ޖެހޭ ކަމަށެވެ. ޚާއްސަކޮށް ބަޔާންގެ އަމިއްލަ ދަނޑުގައި ކުޅުނު މެޗުގައި އެ ޓީމުން ކުޅުންތެރިން ދެއްކި ކުޅުމާއި، ކުރި މަސައްކަތާމެދު ވެސް ހިތްހަމަ ޖެހޭ ކަމަށެވެ. އޭނާ ބުނީ ސިޓީ އަކީ މިވަގުތު ޔޫރަޕުގައި އޮތް އެންމެ މޮޅު އެއް ޓީމު ކަމަށާއި، ބަޔާނުން ވެސް ވަނީ ސިޓީއާ އެއް ފެންވަރެއްގައި ކުޅެފައި ކަމަށެވެ. ޚާއްސަކޮށް ފުރަތަމަ ލެގާއި، ދެ ވަނަ ލެގުގައި ވެސް ބަޔާނުން ވަނީ ސިޓީއަށް ވަރަށް ބޮޑަށް ނުރައްކާ ކޮށްފައި ކަމަށެވެ. ނަމަވެސް ބަޔާންގެ ނަސީބު ނެތްކަން ފާހަގަ ކުރަމުން ޓުޗެލް ބުނީ، ސިޓީގެ ދަނޑުގައި ވެސް އަދި ބަޔާންގެ ދަނޑުގައި ފުރަތަމަ ލަނޑު ޖަހަން އެ ޓީމަށް ފުރުސަތު ލިބުނު ކަމަށެވެ.

މީގެ އިތުރުން އޭނާ ބުނީ، އެއް ފެންވަރެއްގައި ބަޔާންގެ ކުޅުންތެރިންނަށް ކުޅުން ހިފަހައްޓަން އުނދަގޫވުމުގައި ދެ ސަބަބެއް އޮތް ކަމަށް ޤަބޫލު ކުރާ ކަމަށެވެ. އެގޮތުން މެޗު ކުޅުނު ދަނޑުގެ ޙާލަތު ގޯސްކަމަށް ޤަބޫލު ކުރާ ކަަމަށެވެ. ދެން ޓުޗެލް ބުނީ ރެފްރީގެ ވާހަކަ އެވެ. އޭނާ ބުނީ މެޗުގައި ރެފްރީގެ އަމަލާމެދު އެހާ ހިތްހަމަ ނުޖެހޭ ކަމަށާއި، ރެފްރީ އަށް ދޭނީ ވެސް "އެފް" ގްރޭޑެއް ކަމަށެވެ.

އޭނާ ބުނީ އެންމެ މޮޅު ޓީމު ބަލި ކުރާ ވާހަކަ ދައްކައިގެން އެކަން ކުރަން ބޭނުންވާނަމަ، ލިބޭ ފުރުސަތު ތަކުގެ ބޭނުން ހިފަން ޖެހޭނެ ކަމަށެވެ. އަދި އެކަމުގައި ކޮންމެ ވެސް މިންވަރަކަށް ނަސީބު އެހީވާނެ ކަމަށެވެ. އެހެން ނަމަވެސް ބަޔާނަށް ނަސީބު ދެރައީ ކަމަށާއި، ޓީމާއެކު ކުރިއަށް އޮތް ތަނުގައި ކަންކަން ރަނގަޅުކޮށްގެން ކުރިއަށް ދާނެ ކަމަށެވެ.

ބަޔާންގެ ކޯޗުކަމަށް ޓުޗެލް ހަމަޖެއްސީ ވެސް އެ ޓީމުގެ ނަތިޖާތަށް ދަށްވެ، ޗެމްޕިއަންސް ލީގު ކާމިޔާބު ކުރުމަށް އިސްކަން ދޭތީ އެވެ. ނަމަވެސް ޓުޗެލްއާއެކު ބަޔާނަށް މިހާތަނަށް އެދެވޭ ނަތީޖާއެއް ނުނެރެވެ އެވެ.