އުދައްޔުގެ މަރު: ދިފާއީ ހެކިންގެ ހެކިބަސް ނަގައިފި
ދެން މި މައްސަލައިގައި އޮންނާނީ ހެއްކާ ގުޅޭގޮތުން ވާހަކަ ދެއްކުމާއި ޚުލާސާ ބަޔާން އިއްވުން
އުދައްޔުގެ މަރުގެ މައްސަލައިގައި ދައުވާ އުފުލާފައިވާ މީހުން
ގއ. މާމެންދޫގައި ހިންގި ގްރޫޕް މާރާމާރީއެއްގައި ލިބުނު ޒަޚަމްތަކުގެ ސަބަބުން މަރުވި 17 އަހަރުގެ އަހުމަދު އުދައްޔުގެ މަރުގެ މައްސަލައިގެ އަޑުއެހުމެއް ބުރާސްފަތި ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
ބުރާސްފަތި ދުވަހު އޮތީ މި މައްސަލައިގެ ދިފާއީ ހެކިންގެ ހެކިބަސް ނެގުމެވެ. އެގޮތުން އެންމެ ފުރަތަމަ ވަނީ މި މައްސަލައިގެ ދައުވާލިބޭ ޝަރަފް ރަޝީދު އަދި މުހައްމަދު މާޒިންގެ ފަރާތުން ހުށައަޅާފައިވާ ދެ ހެއްކެއްގެ ހެކިބަސް ނަގާފައެވެ.
ފުރަތަމަ ހާޒިރުކުރި ހެކިވެރިޔާ ބުނެފައިވާ ގޮތުގައި މާރާމާރީ ހިނގި ތަނުގައި އޭނާވެސް ހުއްޓެވެ. ނަމަވެސް އެ ތަނުގައި ޝަރަފް ރަޝީދު ފެންނަން ނެތްކަމަށް އެ ހެކިވެރިޔާ ބުންޏެވެ.
ޒުވާބާއި މާރާމާރީ ހިނގި ތަނުން މާޒިންއާއި އޭނާގެ އާއިލާ ބައެއް މެމްބަރުން ފެނުނުކަމަށް އެ ހެކިވެރިޔާ ބުންޏެވެ. އެހެންނަމަވެސް، އުދައްޔުއަށް ޙަމަލާ ދިނުމާއި މަރާމާރީ ހިންގުމުގައި މާޒިން ޙަރަކާތްތެރިވެފައިވާތަން ނުފެންނަކަމަށްވެސް އެ ހެކިވެރިޔާ ބުންޏެވެ.
އެއަށްފަހު ދައުލަތުން ވަނީ ސުވާލުކޮށްފައެވެ. އެގޮތުން ޙާދިސާ ހިނގިއިރު އެތަނާ ވަރަށް ކައިރީގައި ހުރިކަމަށް ހެކިވެރިޔާ ބުނެފައިވާއިރު، އުދައްޔުއަށް އަނިޔާ ލިބުނީ ކާކުގެ ފުށުންކަން އެނގޭތޯ ދައުލަތުން ސުވާލު ކުރިއެވެ. އެ ސުވާލުގެ ޖަވާބުގައި ހެކިވެރިޔާ ބުނީ، ޙާދިސާ ހިނގި ތަނާ ކައިރީގައި ހުރިނަމަވެސް، ޙަމަލާ ދިނީ ކާކުކަން އޭނާއަށް ނޭނގޭ ކަމަށެވެ.
ޙާދިސާއާ ގުޅިގެން ދިވެހި ފުލުހުންގެ ޚިދުމަތަށް ބަޔާނެއް ދެވުނުކަން ނުވަތަ ނޫންކަން ހަނދާނުގައި ނެތްކަމަށްވެސް ދައުލަތުގެ ސުވާލުތަކުގެ ޖަވާބުގައި އޭނާ ބުންޏެވެ.
އެއަށްފަހު ދައުލަތުން ވަނީ އަލަށް އަމަލުކުރި ހެއްކާ ބެހޭ ޤާނޫނުގެ ބޭނުން ހިފައި، ތައާރުޒުވާ ބަޔާން ހުށައެޅުމަށް ފުރުސަތަކަށް އެދިފައެވެ. އެގޮތުން ފުލުހުންނަށް އޭނާ ކުރިން ދީފައިވާ ބަޔާނުގައި ބުނެފައިވަނީ އޭނާ ޙާދިސާ ހިނގި ތަނަށް އައީ މާ ފަހުން ކަމަށެވެ.
ދައުލަތުން ވަނީ އެ ނޫނަސް އޭނާގެ ބަޔާނާއި ހެކިބަހުގައި ތައާރުޒުވާ ބައެއް ކަންކަން ފާހަގަ ކުރައްވާފައެވެ.
ދެވަނައަށް ހާޒިރުކުރި ހެކިވެރިޔާވެސް ބުނެފައިވަނީ އޭނާ ޙާދިސާ ހިނގި ތަނުގައި ހުރި ކަމަށެވެ. އެތަނުގައި ޝަރަފް ރަޝީދުއާއި މާޒިންވެސް ހުރި ކަަމަށާއި، އެމީހުން އެއްވެސް މާރާމާރީއެއްގައި ބައިވެރިވިތަން ފެނިފައިނުވާކަަމަށް އެ ހެކިވެރިޔާ ބުންޏެވެ.
އެއަށްފަހު މުހައްމަދު މާޒިންގެ ފަރާތުން ހުށައަޅާފައިވާ ހެކިވެރިއަކު ވަނީ ހާޒިރުކޮށްފައެވެ. ނަމަވެސް އެ ހެކިވެރިޔާ ވަނީ ގިނަ ކަންކަން ހަނދާނުގައި ނެތްކަމަށް ބުނެފައެވެ.
އެއަށްފަހު އަހުމަދު ޝަމީމްގެ ފަރާތުން ހުށައަޅާފައިވާ ހެކިވެރިންގެ ހެކިބަސް ވަނީ ނަގާފައެވެ. އެއީ ޝަމީމްގެ ބައްޕައެވެ. އޭނާ ބުނީ، ޙާދިސާ ހިނގިރޭ އަހުމަދު ޝަމީމް ހުރީ އޭނާގެ ގޭގައި ކަމަށެވެ. ދެން ހާޒިރުކުރި ހެކިވެރިޔާވެސް ބުނެފައިވަނީ އެހެންނެވެ.
ދެން މި މައްސަލައިގައި އޮންނާނީ ހެއްކާ ގުޅޭގޮތުން ވާހަކަ ދެއްކުމާއި ޚުލާސާ ބަޔާން އިއްވުމެވެ.
ކްރިމިނަލް ކޯޓުގައި މި މައްސަލަ ބައްލަވަނީ ގާޒީ އަލީ ނަދީމެވެ.
