ފަހު ހާފުގައި އެގޮތަށް ދިމާވާނެކަން އެނގޭ، ރަނގަޅު ކަންތައްތަކެއް ޓީމުން ފެނުނު: އިންމަ

ޕްރެޒިޑެންޓްސް ކަޕްގައި ކުލަބު އީގަލްސްއާ ދެކޮޅަށް ކުޅުނު މެޗުގެ ފަހު ހަފުގައި ސުޕަ ޔުނައިޓެޑު ސްޕޯޓްސް (ސަސް) އުނދަގޫ ހާލަތެއް ކުރިމަތިވާނެކަން ކުރިން ވެސް އެނގޭ ކަމަށާއި، ޓީމުގެ ފަރާތުން މެޗުގައި ރަނގަޅު އެތައް ކަމެއް ފެނުނު ކަމަށް އެ ޓީމުގެ ކޯޗު އިސްމާއީލް މަހްފޫޒް (އިންމަ) ބުނެފި އެވެ.

ދެ ލަނޑުގެ ލީޑެއް އޮއްވާ އީގަލްސް އަތުން ބަލިވި މެޗަށްފަހު ވާހަކަ ދައްކަމުން އިންމަ ބުނީ، މެޗުގައި ކުޅުންތެރިން ވަރަށް ބައިވަރު ރަނގަޅު ކަންތައް ކުރި ކަމަށާއި، ނަމަވެސް ވަކި ހިސާބަކުން އުނދަގޫވެ، ޕްރެޝަރު އަންނާނެ ކަން ކުރިން ވެސް އެނގޭ ކަމަށެވެ. އޭނާ ބުނީ ފަހު ހާފުގައި ކުޅުންތެރިންގެ ފަރާތުން ވަރަށް ބޮޑަށް ވަރުބަލިކަން ވެސް ފެނުނު ކަމަށާއި، މެޗުގެ ކޮންސަންޓްރޭޝަން ގެއްލުނީ އެހިސާބުން ކަމަށެވެ. އޭނާ ފާހަގަ ކުރި ގޮތުގައި ކުޅުންތެރިންނަށް ވަރުބަލިކަން އިހުސާސް ކުރެވެން ފަށާ ހިސާބުން، މެޗާމެދު ވިސްނަމުން އަންނަ އައުން ގެއްލޭނެ އެވެ. ޕްރީ ސީޒަންގައި ފަރިތަކުރުމަށް ލިބުނު މިންވަރަށް ބަލާއިރު، ސަސްގެ ކުޅުންތެރިން ފަރާތުން މެޗުގައި ފެނުނީ ހިތްހަމަޖެހޭ ވަރުގެ ކުޅުމެއްކަން ފާހަގަކުރަމުން އިންމަ ބުނީ، ކުރިއަށް އޮތް ތަނުގައި އެކަމަށް މަސައްކަތް ކުރާނެ ކަމަށެވެ.

މީގެ އިތުރުން އިންމަ ބުނީ ސަސްގެ އަލީ އަޝްފާޤު (ދަގަނޑޭ) އަށް މެޗުގައި ލިބުނީ ކަކުލުގެ އަނިޔާއެއް ކަމަށެވެ. އެހެން ނަމަވެސް އަނިޔާގެ މާ ބޮޑު ތަފްސީލެއް ނޭންގޭ ކަމަށާއި، އެކަމުގައި އިތުރު އެއްޗެއް ބުނެވޭނީ މެޑިކަލް ޓީމުގެ ފަރާތުން ލިބޭ ފީޑު ބެކަށް ފަހު ކަމަށް ވެސް އިންމަ ބުންޏެވެ. އޭނާ ބުނީ ސަސް އިން ސެމީ ފައިނަލަށް ނިކުންނާނީ ރަނގަޅު ކުރަން ހުރި ކަންކަން ރަނގަޅުކޮށްގެން، އީގަލްސް މެޗަށްވޔރެ ފުރިހަމަ ކުޅުމެއް ދެއްކުމަށް ކަމަށެވެ.

ފުރަތަމަ މެޗުގައި ކުލަބު ވެލެންސިއާ އަތުން މޮޅުވެފައި އޮތުމުން ސަސް އަށް ސެމީގެ ފުރުސަތު ބޮޑެވެ. ވެލެންސިއާ އަށް ސެމީ އިން ފުރުސަތު ލިބޭނީ ތަފާތު ބޮޑު ނަތީޖާ އަކުން އީގަލްސްގެ މައްޗަށް ކުރި ހޯދައިގެންނެވެ.