ރެއާާލާ ދެކޮޅަށް ޗެލްސީ އަށް މަދުވީ ލަނޑެއް: ލަމްޕާޑް

ޔުއެފާ ޗެމްޕިއަންސް ލީގުގެ ކުއާޓާ ފައިނަލްގެ ދެ ވަނަ ލެގުގައި ރެއާލް މެޑްރިޑާ ދެކޮޅަށް ކުޅުނު މެޗުން ޗެލްސީ މޮޅަށް ކުޅުނު ކަމަށާއި މަދުވީ ހަމަ އެކަނި ލަނޑެއް ކަމަށް އެ ޓީމުގެ ކޯޗު ފްރޭންކް ލަމްޕާޑު ބުނެފި އެވެ.

ލަމްޕާޑު މިހެން ބުނީ، ދެ ވަނަ ލެގުގައި ރެއާލް އަތުން ބަލިވެ މުބާރާތުން ޗެލްސީ ކެޓި މެޗަށްފަހު ވާހަކަ ދައްކަމުންނެވެ. ލަމްޕާޑު ބުނީ މެޗުގެ ފުރަތަމަ 60 މިނެޓަށް ބަލާއިރު، ފުރަތަމަ 11 ގައި ތިބި ކުޅުންތެރިން އޭނާ އިޚްތިޔާރު ކުރި ސަބަބު މިހާރު ސާފުވާނެ ކަމަށެވެ. އޭނާ ބުނީ މެޗުގައި ޗެލްސީން ކުޅުނީ ވަރަށް ބުންވަރުގައި ކަމަށާއި، ޓީމު އޮތީ ވަރަށް ބޮޑަށް ރޭވުންތެރިކޮށް ކަމަށެވެ. އެކަމުގެ ނަތީޖާއެއްގެ ގޮތުން ޗެލްސީން ރެއާލަށް ވަރަށް ބޮޑަށް އުނދަގޫ ކުރި ކަމަށާއި، މެޗުން މަދުވީ ހަމައެކަނި ލަނޑު ޖެހުން ކަމަށެވެ. ލަމްޕާޑު ބުނީ އެ 60 މިނެޓުގެ ތެރޭގައި ލަނޑެއް ނުވަތަ ދެ ލަނޑު ޖެހުން ނަމަ، މެޗުގެ މުޅި މޫނުމަތި ބަދަލުވެގެން ދާނެ ކަމަށެވެ.

މީގެ އިތުރުން ލަމްޕާޑު ބުނީ، ކުލަބެއްގެ ގޮތުން ޗެލްސީން ރަނގަޅު ކުރަން ޖެހޭ ކަންކަން މިހާރު ސާފުކޮށް ފެންނަން ހުރި ކަމަށެވެ. އޭނާ ބުނީ ރެއާލް މެޗުގައި ވެސް އެކަން ފެނިފައިވާ ކަމަށާއި، ނަމަވެސް ޗެލްސީ ބަލިވީ ރަނގަޅު މެޗެއް ކުޅުމަށްފަހު ކަމަށެވެ. އެހެންކަމުން މިއީ ކުއްލިއަކަށް ދުރަށް ފުންމައިގެން ދާންވީ ވަގުތު ކަމަށް ޤަބޫލު ނުކުރާ ކަމަށް ވެސް އޭނާ ވަނީ ބުނެފަ އެވެ. އޭނާ ބުނީ އިނގިރޭސި ޕްރިމިއާ ލީގުގައި ބާކީ ހަތް މެޗު އެބަ އޮތް ކަމަށާއި، އެ މެޗުތަކުން އެ ފެންވަރު ދެއްކުމަކީ މިވަގުތު އަޅަންވީ އެންމެ ރަނގަޅު ފިޔަވަޅު ކަމަށެވެ.

މީގެ އިތުރުން އޭނާ ބުނީ މި ސީޒަނުގައި ޗެލްސީއާ ބެހޭ ގޮތުން ވާހަކަ ދައްކާ ވަރަށް ބައިވަރު މީހުން ތިބޭނެ ކަމަށެވެ. ސަބަބަކީ ޗެލްސީ އަށް ވުރެ މި ސީޒަން އެހެން ޓީމުތައް ކާމިޔާބުވުން ކަމަށެވެ. ނަމަވެސް ހަގީގަތަކީ ޗެލްސީ މިހާރު އޮތް ޙާލަތުން ޓީމު އަރައިގަންނާނެ ކަމަށާއި، ފަހަރުގަައި އެކަމަށް ވަގުތު ކޮޅެއް ނަގައިފާނެ ކަމަށެވެ. އޭނާ ބުނީ ރެއާލާ ދެކޮޅަށް ޗެލްސީން ދެއްކި ކުޅުމާމެދު ސަޕޯޓަރުން ވެސް ހިތްހަމަ ޖެހޭނެ ކަމަށާއި، މި ސީޒަނުގައި ސަޕޯޓަރުން ދެކެން ބޭނުންނުވާ ވަގުތުތަކާ އެމީހުން ކުރިމަތިލާފައި ތިބެދާނެ ކަމަށެވެ. އޭނާ ބުނީ އެހެންކަމުން މި ސީޒަންގެ ނިމެންދެން ޗެލްސީގެ ކުޅުން ރަނގަޅު ކުރަން މަސައްކަތް ކުރާނެ ކަމަށާއި، އެއަށްފަހު އަންނަ ސީޒަނަށް ނިކުންނާނީ ވަރުގަދަކޮށް ކަމަށެވެ.

ދެ ވަނަ ފަހަރަށް ޗެލްސީގެ ކޯޗުކަމާ ލަމްޕާޑު ހަވާލުވި ފަހުން މިހާތަނަށް އެ ޓީމު ކުޅުނު އެއްވެސް މެޗަކުން މޮޅުވެފައެއް ނުވެ އެވެ. އަނެއްކޮޅުން ޗެލްސީ އޮތީ ޕްރިމިއާ ލީގުގެ 11 ވަނައިގަ އެވެ. އެހެންކަމުން ވަގުތީ ކޯޗުކަމުގައި ހުރި ލަމްޕާޑަށް ވެސް ޕްރެޝަރު ވަނީ ބޮޑުވެފަ އެވެ.