ސަސްގެ އަމާޒަކީ މެޗަކަށްފަހު މެޗެއް ކުޅުން ރަނގަޅުކޮށްގެން ކުރިއަށް ދިޔުން!

ސުޕަ ޔުނައިޓެޑު ސްޕޯޓްސް (ސަސް)ގެ އަމާޒަކީ މެޗަށްފަހު މެޗެއް ކުޅުން ރަނގަޅުކޮށް، ޕްރެޒިޑެންޓްސް ކަޕް މުބާރާތުގައި ކުރިއަށް ދިޔުން ކަމަށް އެ ޓީމުގެ ކޯޗު އިސްމާއީލް މަހްފޫޒް (އިންމަ) ބުނެފި އެވެ.

އިންމަ މިހެން ބުނީ މުބާރާތުގައި ސަސްގެ ދެ ވަނަ މެޗުގައި ކުލަބު އީގަލްސްއާ ދެކޮޅަށް ނުކުންނަ މެޗުގެ ކުރިން އޮތް ޕްރެސް ކޮންފަރެންސްގައި ވާހަކަ ދައްކަމުންނެވެ. މުބާރާތުގެ ފުރަތަމަ މެޗުގައި ސަސް އިން ވަނީ އެންމެ ފަހުގެ ޗެމްޕިއަން ކުލަބު ވެލެންސިއާ ބަލިކޮށްފަ އެވެ. އެހެންކަމުން ދެ ވަނަ މެޗުގައި އީގަލްސްއާ އެއްވަރުކޮށްލައިގެން ވެސް ސަސް އަށް ފައިދާ ހޯދޭނެ އެވެ. ނަމަވެސް އިންމަ ބުނީ ސަސްގެ އުންމީދަކީ އަދި ކުޅުންތެރިންގެ ރޫހަކީ އީގަލްސް މެޗުގައި ރަނގަޅު ކާމިޔާބެއް ހޯދުން ކަމަށެވެ. ވަކިން ޚާއްސަކޮށް ޓީމުގެ ކުޅުން މެޗަކަށްފަހު މެޗެއް ރަނގަޅުކޮށްގެން ކުރިއަށް ދާން ބޭނުންވާ ކަމަށެވެ. ސެމީގެ ފުރުސަތު މިހާރު ވެސް ބޮޑުވެފައިވާ ސަސް އަށް އެއްވެސް ޕްރެޝަރެއް ނޯންނާނެކަން ފާހަގަކުރަމުން އިންމަ ބުނީ، މެޗަށް ނުކުންނާނީ ރަނގަޅު ފުޓުބޯޅައެއް ކުޅުމަށް ކަމަށެވެ.

އެ ޕްރެސްގައި އިންމަ ވަނީ ސަސް އަށް ކުޅެމުން އަންނަ އަލީ އަޝްފާޤު (ދަގަނޑޭ)ގެ ވާހަކަ ވެސް ދައްކައިފަ އެވެ. އޭނާ ބުނީ، ދަގަނޑޭ އަކީ އޭނާ ކޮންމެ ޓީމެއްގައި ހުރި ނަމަވެސް މިހާރު އަރަމުން އަންނަ ޒުވާން ކުޅުންތެރިން ވަރަށް އިންސްޕަޔާވާ ކުޅުންތެރިއެއް ކަމަށެވެ. އޭނާ ބުނީ ސަސްގެ ވެސް ޒުވާން ކުޅުންތެރިން ދަގަނޑޭ މިސާލަކަށް ނަގާ ކަމަށާއި، ދަގަނޑޭއާއެކު ކުޅުމުގެ ފުރުސަތު ލިބުމަކީ އެ ކުޅުންތެރިން ވެސް އެދިއެދި ތިބި ކަމެއް ކަމަށެވެ. އެގޮތުން ޓީމުގެ ކުޅުންތެރިން އިތުރު ހިތްވަރެއް ނެރުމުގައި ދަގަނޑޭގެ ލީޑާޝިޕް އިސް ދައުރެއް އަދާ ކުރާ ކަމަށެވެ. މިހާރު ދަގަނޑޭ އަށް އޭނާގެ ރަން ޒަމާނުގެ އެންމެ މޮޅު ކުޅުން ނުދެއްކުނު ނަމަވެސް، އޭނާގެ ފަރާތުން ޓީމަށް އެތައް ގޮތަކުން ފައިދާވާނެ ކަމަށް އިންމަ ބުންޏެވެ.

މީގެ އިތުރުން އިންމަ ބުނީ ސަސްގައި ތިބި ދިވެހި ހުރިހާ ކުޅުންތެރިންނަށް ވެސް އޭނާ އިތުބާރު ކުރާ ކަމަށެވެ. އޭނާ ބުނީ ޓީމަށް ބިދޭސީ ކުޅުންތެރިން ގެންނަކަމުގައި ވަނީނަމަ ގެންނަން ޖެހޭނީ، އެ ޓީމުގައި ތިބި ދިވެހި ކުޅުންތެރިންނަށް ވުރެ ފެންވަރު ރަނގަޅު ކުޅުންތެރިން ކަމަށެވެ. އަދި އެ ފެންވަރުގެ ކުޅުންތެރިން ގެނައުމަށް މިވަގުތު ސަސްގައި މާލީ ފޯރުންތެރިކަމެއް ނެތް ކަމަށެވެ. އެހެން ނަމަވެސް ޓްރާންސްފާގެ މުއްދަތުގައި ސަސް އިން އެކަމަށް މަސައްކަތް ކުރާނެ ކަމަށެވެ. އިންމަ ފާހަގަ ކުރި ގޮތުގައި އީގަލްސް ވަނީ ސީޒަން ފެށުމުގެ ކުރިން ވަރަށް ރަނގަޅަށް ތައްޔާރުވެފަ އެވެ. ނަމަވެސް ސަސް މިހާރު އޮތް ހާލަތަށް ބަލާއިރު ވެސް އީގަލްސް މެޗަށް ޖެހިލުންވާންޖެހޭ ސަބަބެއް ނެތް ކަމަށް ވެސް އިންމަ ވަނީ ބުނެފަ އެވެ.

މީގެ އިތުރުން އިންމަ ބުނީ ޗެރިޓީ ޝީލްޑު މެޗަށްފަހު މިހާތަނަށް އީގަލްސް އިން މެޗެއް ނުކުޅެ އޮތް ނަމަވެސް، ސަސް އިން ނުކުންނާނީ ވަރަށް ރަނގަޅަށް ތައްޔާރުވެފައި އޮތް ޓީމަކާ ދެކޮޅަށް ކަމަށެވެ. އޭނާ ބުނީ އެ މެޗަށް ނުކުންނައިރު ސަސް އިން ހުޝިޔާރު ވާން ޖެހޭ ކަންތައްތަކެއް ވެސް ހުންނާނެ ކަމަށާއި، ޚާއްސަކޮށް ސަސްގެ ފިޒިކަލް ލެވެލް ބައްޓަންކުރާނީ ކިހިނެއްކަމާމެދު ސަމާލުވާން ޖެހޭ ކަމަށެވެ. އޭނާ ބުނީ އެއީ އެ ޓީމުގެ ކަންބޮޑުވުމެއް ކަމަށާއި، އެހެން ނަމަވެސް އެ ކަންބޮޑުވުމަކީ މި ހާލަތުގެ ގޮތުން ގެންގުޅެވޭނެ ކަމެއް ނޫން ކަމަށެވެ.

ސަސް އިން އީގަލްސްއާ ދެކޮޅަށް ނުކުންނާނީ ބުދަ ދުވަހުގެ ރޭ ދިހައެއް ޖަހާއިރު އެވެ.