މިސީޒަންގައި ލިވަޕޫލުން ކުޅުނު އެންމެ މޮޅު މެޗުގައި ލީޑްސް ޔުނައިޓެޑް އަތުން ފުރިހަމަ މޮޅެއް ހޯދައިފިއެވެ.

އިނގިރޭސި ޕްރިމިއަރ ލީގުގައި 6-1 ން ލީޑްސް ޔުނައިޓެޑް ބަލިކުރި މެޗު ކޯޗު ކްލޮޕް ސިފަކުރީ ލިވަޕޫލުން މިސީޒަންގައި ކުޅުނު އެންމެ މޮޅު މެޗުގައެވެ. މެޗުގައި ލިވަޕޫލުން ގޯލާ އަމާޒުކޮށް ފޮނުވާލި ހަތް ޝޮޓްގެ ތެރެއިން ހަ ޝޮޓް ވަނީ ގޯލަކަށް ބަދަލުކޮށްފައެވެ. ނަތީޖާތަށް ދަށް ނަމަވެސް މިސީޒަންގައި ލިވަޕޫލުން ވަނީ 9-0 ން ބޯންމައުތް އަދި 7-0 ން މެންޗެސްޓަރ ޔުނައިޓެޑް ބަލިކޮށްފައެވެ. އެކަމަކު ކޯޗު ކްލޮޕަށް ލިވަޕޫލް ކުޅުނު އެންމެ މޮޅު މެޗަކީ ރެލިގޭޝަނާ ހަނގުރާމަކުރަމުންދާ ލީޑްސް ޔުނައިޓެޑް އަތުން މޮޅުވި މެޗެވެ. ކްލޮޕް ބުނީ ގިނަ ގޮތްގޮތަށް ބަލާއިރު ލީޑްސް މެޗަކީ އެންމެ މޮޅު މެޗު ކަމަށާއި, ކުޅުމާމެދު ވަރަށް ބޮޑަށް ހިތްހަމަޖެހޭ ކަމަށެވެ.

މެޗުގައި ލިވަޕޫލްގެ މުޙައްމަދު ސަލާހުއާއި, ޖޮޓާ ކޮންމެ ކުޅުންތެރިއަކު ދެ ލަނޑު ޖެހިއެވެ. މެޗުގައި ލިވަޕޫލްގެ ފުރަތަމަ ލަނޑު ޖެހީ ގަކްޕޯއެވެ. ފަހު ލަނޑު މެޗުގެ ފަހު މިނިޓްގައި ޖެހީ ނޫނޭޒްއެވެ. ލީޑްސް ޔުނައިޓެޑްގެ ހަމައެކަނި ލަނޑު ދެވަނަ ހާފް ފަށައިގެން ދެވަނަ މިނިޓްގައި ޖެހީ ސިނިސްޓޭރާއެވެ. އޭރުވެސް ލިވަޕޫލުން ވަނީ ދެ ލަނޑުގެ ލީޑެއް ހޯދާފައެވެ.

މެޗުން މޮޅުވިޔަސް ލިވަޕޫލް އޮތީ ލީގު ތާވަލްގެ އަށް ވަނާގައެވެ. އެކަމަކު ހަތްވަނާގައި އޮތް ބްރައިޓަންއާ ދެމެދު އޮތީ ދެ ޕޮއިންޓްގެ ފަރަގެކެވެ. ލީޑްސް ޔުނައިޓެޑް އޮތީ 29 ޕޮއިންޓާއެކު 16 ވަނާގައެވެ. ރެލިގޭޝަނާ ދެމެދު އޮތީ ދެ ޕޮއިންޓްގެ ފަރަގެކެވެ.