ރެލިގޭޝަން ޒޯންގައި އޮތް ވެލެންސިއާ އަތުން ސެވިއްޔާ އަށް މޮޅެއް

ސްޕެނިޝް ލީގުގައި ވެލެންސިއާއާ ދެކޮޅަށް ކުޅުނު މެޗުން ސެވިއްޔާ މޮޅުވެއްޖެ އެވެ.

އާދިއްތަ ދުވަހުގެ ރޭ ވެލެންސިއާގެ ދަނޑުގައި ކުޅުނު މެޗު ސެވިއްޔާ އިން ކާމިޔާބު ކުރީ 2-0 އިންނެވެ. އެ މެޗުން މޮޅުވެގެން ރެލިގޭޝަން ޒޯނުން ސަލާމަތްވުމުގެ ފުރުސަތު ވެލެންސިއާ އަށް އޮތެވެ. ނަމަވެސް މެޗުން ބަލިވެ ވެލެންސިއާ އޮންނަން ޖެހުނީ ރެލިގޭޝަން ޒޯންގަ އެވެ.

މެޗުގައި ސެވިއްޔާ އިން ދެ ލަނޑު ވެސް ޖަހާފައި ވަނީ ދެ ވަނަ ހާފުގަ އެވެ. އެ ޓީމަށް ލީޑު ނަގައިދިނީ 55 ވަނަ މިނެޓުގައި ލޮއިކް ބާޑޭ އެވެ. އެއީ ސެވިއްޔާ އަށް ލިބުނު ކޯނަރެއްގައި ހުރަސްވި ބޯޅައެއް ވެލެންސިއާގެ ޑިފެންޑަރު ޖޯސް ލުއިސް ގަޔާގެ ފައިގައި ޖެހި، ބާޑޭ އަށް ލިބުނު ވަގުތު އޭނާ ބޯޅަ ގޯލަށް ފޮނުވާލައިގެން ޖެހި ލަނޑެކެވެ. ސެވިއްޔާގެ ދެ ވަނަ ލަނޑު 75 ވަނަ މިނެޓުގައި ޖެހީ ސޫސޯ އެވެ. އެއީ ވެލެންސިއާގެ އޭރިޔާ ތެރެއިން ގޮންޒާލޯ މޮންޓިއޭލް ދިން ބޯޅައެއް ތިރިިތިރިން ގޯލުގެ ކަނަށް ފޮނުވާލައިގެން ސޫސޯ ޖެހި ލަނޑެކެވެ.

މޮޅާއެކު ސެވިއްޔާ އޮތީ ލީގު ތާވަލްގެ 12 ވަނައިގަ އެވެ. އެއީ މިހާތަނަށް އެ ޓީމު ކުޅުނު 29 މެޗުން 35 ޕޮއިންޓާއެކު އެވެ. ވެލެންސިއާ އޮތީ 27 ޕޮއިންޓާއެކު 18 ވަނައިގަ އެވެ.