އިންތިޚާބުން ހާމަވެގެން ދިޔައީ ސަރުކާރާއެކު ރައްޔިތުން ތިބިކަން: ރައީސް
16 އެޕްރީލު 2023 | އާދީއްތަ 04:05ފުރަތަމަ ފަހަރަށް މިދާއިރާގެ ގޮނޑި އެމްޑީޕީއަށް ކާމިޔާބުވުމަކީ ޕާޓީއަށް ލިބުނު ވަރަށް ބޮޑު ކުރިއެރުމެއްކަމަށް ވިދާޅުވި
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު އަދި ގުރައިދޫ ދާއިރާގެ ގޮނޑި ކާމިޔާބުކުރެއްވި އިބްރާހީމް ޝާޒް
ގުރައިދޫ ދާއިރާގެ ގޮނޑި އެމްޑީޕީއަށް ކާމިޔާބުވެގެން ދިޔުމުން ހާމަވެގެންދިޔައީ ސަރުކާރާއެކު ދާއިރާގެ ރައްޔިތުން ތިބިކަންކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.
ހޮނިހިރު ދުވަހު ކުރިޔަށްދިޔަ ކ.ގުރައިދޫ ދާއިރާގެ ބައި އިލެކްޝަން އެމްޑީޕީގެ ކެންޑިޑޭޓް އިބްރާހީމް ޝާޒް ކާމިޔާބުކުރައްވާފައިވަނީ ޕީޕީއެމްގެ ކެންޑިޑޭޓް ހުސައިން ރިޒާ އާދަމާ ވާދަކުރައްވައެވެ. މިއީ މިދާއިރާގެ ގޮނޑި 14 އަހަރަށްފަހު އެމްޑީޕީއަށް ކާމިޔާބުކުރެވުނު ފުރަތަމަ ފަހަރެވެ.
ޝާޒް އިންތިޚާބު ކާމިޔާބުކުރެއްވުމުން ރައީސް ކުރެއްވި ޓްވީޓެއްގައި ވަނީ ޝާޒް އަށް ހޫނު މަރުޚަބާއެއް ވިދާޅުވެފައެވެ. އަދި ފުރަތަމަ ފަހަރަށް މިދާއިރާގެ ގޮނޑި އެމްޑީޕީއަށް ކާމިޔާބުވުމަކީ ޕާޓީއަށް ލިބުނު ވަރަށް ބޮޑު ކުރިއެރުމެއްކަމަށް ވިދާޅުވިއެވެ.
މިއިންތިޚާބުގެ ވަގުތީ ނަތީޖާ ދައްކާގޮތުން ޕީޕީއެމް ކެންޑިޑޭޓް ހުސައިން ރިޒާއަށް ލިބިވަޑައިގެންނެވީ 1226 ވޯޓެވެ. ޝާޒް އަށް 1346 ވޯޓު ލިބިވަޑައިގެންނެވިއިރު ދެން އިންތިޚާބުގައި ވާދަކުރެއްވި އެމްއެންޕީގެ ކެންޑިޑޭޓް އަލީ އަރީފް އަށް ލިބިވަޑައިގެންނެވީ 122 ވޯޓެވެ. މިއިންތިޚާބުގައި 3423 މީހުންނަށް ވޯޓުލެވެއެވެ. ވޯޓުލާފައިވަނީ 2755 މީހުންނެވެ.
ގުރައިދޫ ދާއިރާގެ ގޮނޑި އެމްޑީޕީއަށް ކާމިޔާބުވުމާއެކު ރައްޔިތުންގެ މަޖިލީހުގައި ތިއްބެވި އެމްޑީޕީގެ މެންބަރުންގެ އަދަދު ވަނީ 68ށް އަރާފައެވެ.
